پسيحياتر ماماندارىمىز زەرتتەي كەلە, ادامدار قيىن جاعدايلارعا تاپ بولىپ تورىققاندا ءتۇرلى قاتەلىكتەرگە ۇرىناتىنىن, ءتىپتى ءوز-وزىنە قول سالۋعا دەيىن باراتىنىن, بىراق تىكەلەي پسيحيتريالىق كومەك كورسەتەتىن مەديتسينالىق مەكەمەلەرگە قارالۋعا قايمىعاتىنىن العا تارتىپ كەلەدى. ەندىگى جەردە دەنساۋلىق ساقتاۋ سالاسى سوزدەن ناقتى ىسكە كوشىپ, ءبىر ايدان بەرى الماتى, تاراز جانە سەمەي قالالارىندا call-ورتالىقتاردى ىسكە قوستى, دەپ حابارلايدى Egemen.kz.
ەگەر كۇيزەلىس قاجىتىپ, مازاسىز كۇي دەگبىرىڭىزدى قاشىرىپ, ومىردەن ءتۇڭىلىپ جۇرسەڭىز, 3580 نومىرىنە جەدەل حابارلاسۋعا بولادى. ەلىمىزدە پسيحولوگيالىق كومەككە مۇقتاج تۇرعىندار ءۇشىن ساپالى اقپاراتتىق قىزمەت كورسەتەتىن 3580 call-ورتالىعى ىسكە قوسىلدى. بۇل جوبا «قازاقستان رەسپۋبليكاسىندا پسيحيكالىق دەنساۋلىقتى ساقتاۋدىڭ بىرىڭعاي اقپاراتتىق قىزمەتىن پيلوتتاۋ» دەپ اتالادى, 23 جەلتوقساندا جۇمىسىنا كىرىستى.
الماتى قالاسى, جامبىل جانە اباي وبلىستارىنىڭ پسيحيكالىق دەنساۋلىق ورتالىقتارى مەن وسى ءۇش ءوڭىردىڭ جاستار مەديتسينالىق ورتالىقتارىنىڭ قىزمەتتەرى بىرىڭعاي اقپاراتتىق جۇيەگە بىرىكتىرىلىپ, حالىققا پسيحيكالىق دەنساۋلىق سالاسى بويىنشا اقپاراتتىق قىزمەت كورسەتىپ جاتىر.
– وسى باستاما ارقىلى 25 مامان رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىندا «قاشىقتان پسيحولوگيالىق كەڭەس بەرۋدىڭ تەوريالىق جانە پراكتيكالىق نەگىزدەرى» بويىنشا ءبىلىم الىپ, كاسىبي ءبىلىمىن جەتىلدىرەتىن ترەنينگتەردە شىڭدالدى. بۇعان قوسا, سۇراق-جاۋاپ بويىنشا ماماندارعا ارنالعان ءبىلىم بازاسى ازىرلەندى. جوبا رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى, ۇلتتىق قوعامدىق دەنساۋلىق ساقتاۋ ورتالىعى جانە دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى ەلدىك كەڭسەسىنىڭ تەحنيكالىق قولداۋىمەن دۇنيەگە كەلدى. ءاربىر ۇيىم ددۇ ەۋروپالىق وڭىرلىك بيۋروسىمەن كومپيۋتەرلىك تەحنيكانى وتەۋسىز تۋرالى كەلىسىمگە قول قويدى. جۇمىس ورىندارىن قۇرال-جابدىقپەن جابدىقتاۋ ماسەلەسى شەشىلدى. بۇل تۇرعىنداردىڭ پسيحيكالىق دەنساۋلىق بويىنشا اقپاراتتى جەدەل جانە ساپالى ماعلۇماتپەن قامتاماسىز ەتۋ ماقساتىندا اشىلعان بىرىڭعاي ورتالىق. ءاربىر قوڭىراۋ شالعان ادامنىڭ مالىمەتتەرى قۇپيا ساقتالادى. سوندىقتان قينالعاندا 3580 نومىرىنە حابارلاسىپ پسيحولوگيالىق كومەككە جۇگىنىڭىزدەر, – دەيدى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ باس ديرەكتورى قۋانىش التىنبەكوۆ.
اتالعان جوبا حالىقتىڭ پسيحيكالىق دەنساۋلىق ساقتاۋ سالاسى بويىنشا قىزمەتكە قولجەتىمدىلىگىن ارتتىرىپ, اقپاراتتاندىرۋدى دا كوزدەيدى. ءارى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ سايتىندا قاشىقتان پسيحولوگيالىق كومەك كورسەتۋ تەتىكتەرى ازىرلەنىپ جاتىر. سونىمەن قاتار قاناتقاقتى جوبا اياقتالعاننان كەيىن ونىڭ قىزمەتىنە تالداۋ جاساۋ ارقىلى قىزمەتىن دامىتىپ, وسى جىلى ەلىمىزدىڭ بارلىق وڭىرىندە بىرىڭعاي اقپاراتتىق قىزمەتىن اشۋ جوسپارلانىپ وتىر.