بيۋدجەت ەسەبى تانىستىرىلدى
سەنات توراعاسىنىڭ ورىنباسارى مۇحامبەت كوپەەۆتىڭ قاتىسۋىمەن قازاقستان رەسپۋبليكاسى ۇكىمەتى جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2009 جىلعا ارنالعان رەسپۋبليكالىق بيۋدجەت جونىندەگى ەسەبىنىڭ تانىستىرىلىمى ءوتتى. شاراعا قارجى جانە بيۋدجەت كوميتەتىنىڭ توراعاسى قايرات يششانوۆ جەتەكشىلىك ەتتى, دەپ حابارلادى وسى پالاتانىڭ ءباسپاسوز قىزمەتى.
تاقىرىپ بويىنشا دەپۋتاتتار ەسەپ كوميتەتىنىڭ توراعاسى و.وكسىكباەۆتىڭ ەسەبىن تىڭدادى. مەكەمە باسشىسىنىڭ ايتۋىنشا, وتكەن جىل ىشىندە رەسپۋبليكالىق بيۋدجەتتىڭ ورىندالۋى ەلىمىزدىڭ الەۋمەتتىك-ەكونوميكالىق دامۋىنا ءوزىنىڭ وڭ اسەرىن تيگىزدى. قارالىپ وتىرعان كەزەڭ ىشىندەگى باقىلاۋ شارالارىنىڭ قورىتىندىلارىن بايانداي كەلىپ, ەسەپ كوميتەتىنىڭ باسشىسى “2009-2011 جىلدارعا ارنالعان رەسپۋبليكالىق بيۋدجەت تۋرالى” زاڭ باپتارىنىڭ ورىندالۋ ماسەلەلەرىنە كەڭىرەك توقتالدى.
بيۋدجەت قاراجاتىنىڭ ءتيىمدى جۇمسالۋىن, ستراتەگيالىق جوسپارلاردىڭ جۇزەگە اسىرىلۋىن, ماقساتتى ترانسفەرتتەردىڭ يگەرىلۋىن, مەملەكەت اكتيۆتەرىن باسقارۋ تەتىكتەرىن ازىرلەۋدى باقىلاۋدىڭ جەتكىلىكسىزدىگىن اتاپ وتكەن و.وكسىكباەۆ رەسپۋبليكالىق بيۋدجەت قارجىلارى مەن مەملەكەت اكتيۆتەرىن ءتيىمسىز پايدالانۋدىڭ سەبەپتەرىن اتادى. ولاردىڭ قاتارىندا ەسەپ كوميتەتىنىڭ باسشىسى كۆازيمەملەكەتتىك سەكتور سۋبەكتىلەرىنىڭ ستراتەگياسى جوقتىعىن, ينۆەستيتسيالىق جوبالاردى تاڭداۋ بارىسىندا نارىق سەگمەنتتەرىن ماركەتينگتىك تالداۋدىڭ ءالسىزدىگىن, دامۋ ينستيتۋتتارىنىڭ بوس قارجىنى ەكىنشى دەڭگەيلى بانكتەردەگى دەپوزيتتەرگە ورنالاستىرۋ ءۇردىسىن اتادى.
تانىستىرىلىم بارىسىندا دەپۋتاتتار بيۋدجەت قارجىلارىنىڭ يگەرىلمەۋىنە, بيۋدجەت تۇسىمدەرىنىڭ ازايۋىنا, جەرگىلىكتى بيۋدجەتتەردى اكىمشىلەندىرۋ جۇيەسىن, مەملەكەتتىك ساتىپ الۋلاردى جەتىلدىرۋگە قاتىستى ماسەلەلەردى كوتەردى.
2009 جىلعى بيۋدجەتتىڭ كىرىس بولىگى 100,4 پايىزعا ورىندالدى. وعان نەگىزىنەن الدىن الا بەكىتىلگەن جوسپاردى 2,7 پايىزعا, شىعىنداردى 98,1 پايىزعا تومەندەتۋ ارقىلى ناقتىلاۋمەن قول جەتكىزىلدى. يگەرىلمەگەن قارجى كولەمى 59,4 ملرد.تەڭگەنى قۇرادى (39 بيۋدجەت باعدارلامالارى اكىمشىلەرىنىڭ تەك 9-ى عانا قارجىنى تولىق يگەردى).
2009 جىلى 510,9 ملرد. تەڭگە كولەمىندەگى دەفيتسيتتى وتەۋگە 650,4 ملرد. تەڭگەنى قۇرايتىن مەملەكەتتىك زايم تارتىلدى. سونىمەن قاتار, 2008 جىلمەن سالىستىرعاندا بيۋدجەت قاراجاتىنىڭ ەركىن قالدىعى 8,5 ەسەگە ۇلعايىپ, 56 ملرد. تەڭگەنى قۇرادى.
سەگىز مىڭعا جۋىق ادام ءۇيلى بولادى
سەنات توراعاسىنىڭ ورىنباسارى مۇحامبەت كوپەەۆتىڭ قاتىسۋىمەن وتكەن “دوڭگەلەك ۇستەل” بارىسىندا مەملەكەتتىك تۇرعىن ءۇي قۇرىلىسى ساياساتىن تۇرعىن ءۇي قۇرىلىسى جيناقتاۋ جۇيەلەرى ارقىلى جەتىلدىرۋ ماسەلەلەرى تالقىلاندى. شاراعا ەكونوميكالىق جانە وڭىرلىك ساياسات كوميتەتىنىڭ ءتورايىمى نۇرلىعايىم جولداسباەۆا جەتەكشىلىك ەتتى, دەپ حابارلادى وسى پالاتانىڭ ءباسپاسوز قىزمەتى.
شارا بارىسىندا م.كوپەەۆ تالقىلانىپ وتىرعان تاقىرىپ تۇرعىن ءۇي قۇرىلىسىن دامىتۋ سالاسىنداعى مەملەكەتتىك ساياساتتىڭ باعىتتارىن ايقىنداعان مەملەكەت باسشىسىنىڭ جولداۋى تۇرعىسىندا وتە ماڭىزدى بولىپ وتىرعانىن اتاپ ءوتتى. ول قادامنىڭ ماڭىزدى قۇرامداس بولىگى رەتىندە ازاماتتاردىڭ, “قازاقستاننىڭ تۇرعىن ءۇي قۇرىلىس جيناق بانكىنىڭ”, مەملەكەتتىڭ جانە قۇرىلىس كومپانيالارىنىڭ تەڭ قۇقىلى ارىپتەستىك قاعيداتىن ۇستانعان تۇرعىن ءۇي قۇرىلىسى جيناقتاۋ جۇيەلەرى ەكەنىن اتادى.
قۇرىلىس سەكتورىن قولداۋعا, ۇلەسكەرلەردىڭ احۋالىن شەشۋگە, تۇرعىن ءۇي قۇرىلىسى باعدارلاماسىن جۇزەگە اسىرۋعا باعىتتالعان ماڭىزدى مەملەكەتتىك شارالاردى ايتا كەلىپ, ۆيتسە-سپيكەر داعدارىسقا قارسى باعدارلاما اياسىندا قۇرىلىس كومپانيالارىنا ەكىنشى دەڭگەيلى بانكتەر ارقىلى 184 ملرد. تەڭگەدەن استام قارجى, ال 2009 جىلى ۇلتتىق قوردان قۇرىلىس سالاسىن دامىتۋعا 360 ملرد. تەڭگە بولىنگەندىگىن جانە يپوتەكالىق نەسيەلەر بويىنشا مولشەرلەمەلەر تومەندەتىلگەنىن اتاپ ءوتتى.
م.كوپەەۆتىڭ ايتۋىنشا, تۇرعىن ءۇي قۇرىلىسى جيناقتاۋ جۇيەسىن دامىتۋ ءتيىستى زاڭنامالىق بازامەن قامتىلدى. اتاپ ايتقاندا, تۇرعىن ءۇي قۇرىلىسى جيناقتاۋ جۇيەسىندەگى قاتىناستاردى رەتتەۋ مەن قۇقىقتىق نەگىزدەر “قازاقستان رەسپۋبليكاسىنداعى تۇرعىن ءۇي قۇرىلىسى جيناق اقشاسى تۋرالى” زاڭمەن بەلگىلەنگەن.
دەپۋتاتتار ع.ەسىم, ا.باشماكوۆ, ج.تورەگەلدينوۆ, ق.وماروۆ جانە ا.ساۆچەنكو تۇرعىن ءۇي قۇرىلىسىن ودان ءارى دامىتۋعا, تۇرعىن ءۇي قۇرىلىسى جيناقتاۋ جۇيەسىنە جۇرتشىلىقتىڭ قاتىسۋى ءۇشىن قولايلى جاعدايلار جاساۋ مەن اتالعان باعدارلامانىڭ حالىقتىڭ از قامتىلعان بولىگىنە قولجەتىمدىلىگىن ارتتىرۋعا قاتىستى ءوز ويلارىمەن ءبولىستى.
تالقىلاۋلار بارىسىندا قۇرىلىس جانە تۇرعىن ءۇي كوممۋنالدىق شارۋاشىلىق ىستەرى اگەنتتىگىنىڭ توراعاسى س.نوكين, “قازاقستاننىڭ تۇرعىن ءۇي قۇرىلىس جيناق بانكى” اق باسقارما ءتورايىمى ن.ناۋرىزباەۆا, “سامۇرىق-قازىنا” ۇلتتىق ءال-اۋقات قورى” اق باسقارۋشى ديرەكتورى ق.ايتىكەنوۆ ءسوز سويلەدى.
ن.جولداسباەۆا اتالعان جۇيەنى ودان ءارى جەتىلدىرۋ قاجەتتىگى تۋىنداپ وتىرعاندىعىن اتاپ ءوتتى. بۇل باعىتتا “قازاقستاننىڭ تۇرعىن ءۇي قۇرىلىس جيناق بانكى” ازاماتتاردىڭ, بانكتىڭ, جەرگىلىكتى اتقارۋشى ورگانداردىڭ جانە قۇرىلىس كومپانيالارىنىڭ تەڭ قۇقىلى ارىپتەستىك قاعيداتىنا نەگىزدەلگەن تۇرعىن ءۇي قۇرىلىس جيناق جۇيەسىن جۇزەگە اسىرۋدىڭ جاڭا باعدارلاماسىن ءازىرلەدى. 2010-2013 جىلدارعا ارنالعان وسى باعدارلامانى جۇزەگە اسىرۋ بارىسىندا 540 مىڭنان استام شارشى مەتر تۇرعىن ءۇي ىسكە قوسىلىپ, باسپاناعا مۇقتاج ازاماتتار 8 مىڭعا جۋىق پاتەرلەردى الاتىن بولادى.
تالقىلاۋلار ناتيجەلەرى بويىنشا ءتيىستى ۇسىنىمدار ازىرلەندى.
جاۋاپكەرشىلىك تاعى ءبىر ەكشەلدى
اۋرۋحانالاردىڭ ءدارى-دارمەكپەن ناشار قامتاماسىز ەتىلۋى جانە وسى سالاداعى جاعدايدىڭ وڭدى قالىپتاسپاۋى سەناتتىڭ الەۋمەتتىك-مادەني دامۋ كوميتەتىنىڭ توراعاسى اقان بيجانوۆتىڭ توراعالىعىمەن پالاتا دەپۋتاتتارى مەن دەنساۋلىق ساقتاۋ ءمينيسترى, “سك-فارماتسيا” جشس ديرەكتورى مەن بىرقاتار ءدارى-دارمەك وندىرەتىن كومپانيالار باسشىلارىنىڭ كەزدەسۋ وتكىزۋىنە تۇرتكى بولدى.
ەلىمىزدىڭ فارمرىنوگىنداعى بۇگىنگى اينالىم 1 ميلليارد اقش دوللارىن قۇراسا, سونىڭ 400 ميلليونى كەپىلدەندىرىلگەن تەگىن مەديتسينالىق كومەك اياسىنداعى مەملەكەتتىك ساتىپ الۋلار ۇلەسىنە تيەسىلى ەكەن. ال قالعان سوما كوممەرتسيالىق ساتىپ الۋلارعا جاتادى. “سك-فارماتسيا” جاۋاپكەرشىلىگى شەكتەۋلى سەرىكتەستىگىنىڭ باسشىسى ۆاديم زۆەركوۆ فارمرىنوك حاوستى دامىپ, ءدارى-دارمەكتىڭ 90 پايىزى سىرتتان تاسىلىپ كەلگەندىگىن ورتاعا سالدى. وسى جاعدايدى تۇزەتۋ ماقساتىندا اتالعان سەرىكتەستىك قۇرىلىپ, وتكەن جىلدان بەرى جۇمىس ىستەپ كەلە جاتقانى بەلگىلى. مۇنداي تاجىريبە دامىعان ەلدەردە بار بولسا, گەرمانيا مەن فرانتسيادا ساتىپ الۋمەن 2 كومپانيا اينالىسادى. ال ۇلىبريتانيا مەن مالايزيا سياقتى ەلدەردە مۇنىمەن تەك ءبىر كومپانيا شۇعىلدانادى ەكەن.
قازاقستان دا وسى تاجىريبەنى باسشىلىققا الىپ, اتالعان جشس بىلتىردان بەرى جۇمىسىنا كىرىسىپ كەتكەن-ءدى. الايدا ارتىنشا شۋ شىعىپ, وڭىرلەر ءدارى-دارمەكسىز ءبىراز ابىگەرگە تۇسكەنى ءمالىم. مۇنىڭ سەبەبىن ديرەكتور وڭىرلەردەگى اۋرۋحانالار تاپسىرىستارىن كەش جولداعاندىعىمەن تۇسىندىرۋگە تىرىستى. ونىڭ سوزىنە قاراعاندا, بىلتىر تاپسىرىستار ءتىپتى قاراشا ايىنىڭ سوڭىنا دەيىن سوزىلعان. نەگىزىنەن ستاتسيونارلىق ەمحانالار مەن اۋرۋحانالار بۇل مىندەتتى 20 قاراشاعا دەيىن ءبىتىرۋى ءتيىس ەكەن. نە كەرەك, كونكۋرس 20 جەلتوقساندا ءوتىپ, ءدارى-دارمەكتىڭ 745 ءتۇرى بويىنشا جەتكىزىپ بەرەتىن 39 كومپانيا انىقتالعان. وسى رەتتە العاش رەت باعانى تومەندەتۋ جونىندەگى اۋكتسيون دا وتكىزىلگەنى بەلگىلى بولدى.
ءبىر ديستريبيۋتەردىڭ ساتىپ الۋىندا ءبىر كەمشىلىك مەديتسينالىق ۇيىمدار تاپسىرىس بەرگەن ءدارى-دارمەكتەر مەن قاجەتتى سانالاتىنداردىڭ اراسىنداعى الشاقتىق, دەيدى ۆ.زۆەركوۆ. مىسالى, ءدارى-دارمەكتىڭ 451 ءتۇرى بويىنشا تاپسىرىس از كورسەتىلسە, قاجەتتى ءمولشەر ونداعان, ءتىپتى جۇزدەگەن ەسە كوپ قاجەت كورىنەدى. مۇنداي سايكەسسىزدىكتەر 5 ميلليارد تەڭگەگە جەتكەن. ماسەلەن, كەلىسىم-شارتتا ءبىر ءدارى بويىنشا 4900 امپۋلا كەرەك دەپ كورسەتىلسە, شىن مانىندە 60 000-ى قاجەت بولىپ شىققان. ءتىپتى, مەديتسينالىق ۇيىمدارعا قاجەت ەمەس ءدارى-دارمەكتەر دە جەتەرلىك ەكەن. قالاي بولعان كۇندە دە “سك-فارماتسيا” جشس ديرەكتورى فارمرىنوكتا قازاقستاندىق قۇرامدى 10-نان 23 پايىزعا جەتكىزگەندىكتەرىن, ال ءدارى-دارمەك ساتىپ الۋدا بيۋدجەتتىڭ 4,5 ميلليارد تەڭگەسىن ۇنەمدەۋگە قول جەتكىزىلگەنىن العا تارتتى.
دەنساۋلىق ساقتاۋ ءمينيسترى جاقسىلىق دوسقاليەۆ ۇكىمەت قاۋلىسىنا سايكەس ءار تاراپتىڭ جاۋاپكەرشىلىگى بەكىتىلگەندىگىن ەرەكشە اتاپ ءوتتى. ونىڭ سوزىنە قاراعاندا, ەگەر اۋرۋحاناعا ءدارى-دارمەك جەتپەي جاتقان جاعدايدا باس دارىگەر ونى ءوز ەسەبىنەن ساتىپ الا الادى. ارتىنان “سك-فارماتسيا” سول ساتىپ الىنعان ءدارىنىڭ تولىق قۇنىن جانە 20 پايىزدىق ايىپپ ۇلىن تولەپ بەرۋى ءتيىس. بۇل ءوز كەزەگىندە جشس-نىڭ جاۋاپكەرشىلىگىن ارتتىرادى.
دەپۋتاتتاردىڭ كەلتىرگەن ءمالىمەتتەرىنە قاراعاندا, كەيبىر دارىلەر جوق, ال باس دارىگەردىڭ ونى بەلگىلەنگەن سومادان ارتىق اقشاعا ساتىپ الۋعا قۇقى دا جوق كورىنەدى. سوندىقتان مۇنداي اۋىرتپالىق ەمدەلۋشىلەردىڭ وزىنە تۇسەدى ەكەن. سونداي-اق اۋىلدىق ەلدى مەكەندەردە كادر تاپشىلىعى دا ەرەكشە اڭگىمە وزەگىنە اينالدى. وسىنىڭ ءبارىن العا تارتا وتىرىپ, دەپۋتاتتار ولاردىڭ شەشىلۋى قاجەتتىگىنە ەرەكشە ەكپىن بەردى.
اسقار تۇراپباي ۇلى.
قازاقستان ۇستانىمدارىنا نازار
ءماجىلىس دەپۋتاتى حالىقارالىق كونفەرەنتسيادا ءسوز سويلەدى
ءازىربايجان استاناسى – باكۋ قالاسىندا “پارلامەنتتىك ديپلوماتيا – تيۋركپا” اتتى حالىقارالىق كونفەرەنتسيا بولىپ ءوتتى. وعان ءازىربايجان, قازاقستان, ءتۇركيا پارلامەنتتەرىنىڭ دەپۋتاتتارى, كورنەكتى قوعام قايراتكەرلەرى, عالىمدار, ديپلوماتيالىق, سونىمەن قاتار, باق وكىلدەرى قاتىستى. كونفەرەنتسيا جۇمىسىنا قازاقستاننان قاتىسقان پارلامەنت ءماجىلىسىنىڭ دەپۋتاتى قىلىشباي بيسەنوۆ “پارلامەنتتىك ديپلوماتيا جانە حالىقارالىق بايلانىستار – قازاقستاننىڭ مودەلى” دەگەن تاقىرىپتا بايانداما جاسادى. دەپۋتاتتىڭ بايانداماسىندا پارلامەنتتىك ديپلوماتيا مەن حالىقارالىق بايلانىستىڭ قازاقستاندىق مودەلى تۋرالى ايتىلدى.
ءماجىلىس دەپۋتاتى كونفەرەنتسياعا قاتىسۋشىلارعا قازاقستان رەسپۋبليكاسى پارلامەنتى اتىنان سالەم جولداپ, تۇركيالىق ءارىپتەستەرىن تۇركيا پارلامەنتىنىڭ 90 جىلدىق مەرەيتويىمەن قۇتتىقتادى.
ءارى قاراي باياندامادا الەمدىك ساياسي جانە ەكونوميكالىق ۇدەرىستەردىڭ جاھاندانۋ جاعدايىنداعى ءوزارا بايلانىستارى, يادرولىق قارۋدى تاراتپاۋ, قاۋىپسىزدىكتى قامتاماسىز ەتۋ, وسى پروبلەمالاردىڭ شەشىلۋى تىعىز ينتەگراتسيا مەن ءوزارا ىنتىماقتاستىق ءناتيجەسىندە عانا مۇمكىن بولاتىنى اتاپ ءوتىلدى. قازاقستان بۇگىنگى كۇنى ءدال وسى ماقساتتى پوزيتسيا ۇستانىپ وتىر. ونى قازاقستان رەسپۋبليكاسىنىڭ پرەزيدەنتى ن.ءا.نازارباەۆ ءوزىنىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا ءمۇمكىندىكتەرى” اتتى حالىققا جولداۋىندا اتاعان بولاتىن.
ق.بيسەنوۆتىڭ بايانداماسىندا ايتىلعانىنداي, سوڭعى جىلدارداعى پارلامەنتاريزم ءرولىنىڭ ارتۋى بۇل حالىقارالىق قوعامداستىقتىڭ وبەكتيۆتى زاڭدىلىقتى دامۋ بارىسى بولىپ تابىلادى. جالپىالەمدىك دامۋ ۇدەرىسىنىڭ ءبىر بولىگى بولا وتىرىپ, پارلامەنتارالىق بايلانىستار پارلامەنتتىك ديپلوماتيانىڭ, ونىڭ ۇلتتىق ماسەلە عانا ەمەس, جاھاندىق ماسەلەلەردى شەشۋدەگى ءرولىنىڭ ارتۋىمەن سيپاتتالادى. دەپۋتات قازاقستان پارلامەنتىنىڭ الەمدىك ۇدەرىستەردەن تىس قالمايتىندىعىن اتاپ كورسەتتى.
ءارى قاراي ق.بيسەنوۆ قازاقستاندىق پارلامەنتشىلەردىڭ جۇمىس تاجىريبەسىمەن ءبولىستى. ول ءبىزدىڭ پارلامەنتشىلەردىڭ حالىقارالىق ماسەلەلەرگە بەلسەنە ارالاسۋى ولاردى شەشۋ عانا ەمەس, دەموكراتيالىق باي تاجىريبەسى بار مەملەكەتتەردىڭ تاجىريبەسىمەن تانىسۋعا مۇمكىندىك بەرەتىنىن اتاپ ءوتتى. بۇل جاعدايدا قازاقستاننىڭ وڭ تاجىريبەسى جەتەرلىك. مىسالى, قازاقستاننىڭ باستاماسىمەن ومىرگە كەلگەن مادەنيەتارالىق, دىنارالىق ۇنقاتىسۋدىڭ قازاقستاندىق مودەلى باتىس پەن يسلام الەمىنىڭ جالپىۇلتتىق كەلىسىمگە كەلۋىنە الىپ كەلدى, بۇل ءوز كەزەگىندە ءبىزدىڭ مەملەكەتتىلىگىمىزدىڭ نەگىزى بولىپ قالىپتاستى. اتالعان ساياساتتى جۇزەگە اسىرۋدىڭ تەتىگى ءبىزدىڭ ەلىمىزدە جاڭا ساياسي ينستيتۋت – قازاقستان حالقى اسسامبلەياسىنىڭ قۇرىلۋى بولىپ تابىلادى.
ءسوزىنىڭ سوڭىندا ق.بيسەنوۆ قوناقتار مەن كونفەرەنتسياعا قاتىسۋشىلاردى قازاقستان رەسپۋبليكاسى پارلامەنتى دەپۋتاتتارىنىڭ ءارى قاراي دا پارلامەنتارالىق قىزمەتتى دامىتاتىندىعىنا, ءارتۇرلى ەلدەرمەن ەكىجاقتى جانە كوپجاقتى ىنتىماقتاستىق نەگىزىندە ۇلتتىق مۇددەلەردىڭ ساقتالۋىنا جۇمىس جاسايتىندىقتارىنا سەندىردى.
ساۋلە دوسجانوۆا, جۋرناليست.
تورالقاداعى دەپۋتاتتار ەسەبى
“نۇر وتان” حالىقتىق-دەموكراتيالىق پارتياسىنىڭ پارلامەنت ءماجىلىسىندەگى فراكتسياسى تورالقاسىنىڭ كەڭەيتىلگەن وتىرىسى بولىپ ءوتتى.
وتىرىستا دەپۋتات ۆالەري دوسكالوۆتىڭ بايانداۋىندا “نۇر وتان” حدپ پارلامەنت ماجىلىسىندەگى فراكتسياسى جانىنداعى قوعامدىق ۇيىمدارمەن بايلانىس ءجونىندەگى كەڭەستىڭ 2010 جىلعى 22 ساۋىردە وتكىزگەن “تۇرعىن ءۇي قاتىناستارىن رەتتەيتىن زاڭنامانى ىسكە اسىرۋدىڭ پراكتيكالىق اسپەكتىلەرى” تاقىرىبىنداعى “دوڭگەلەك ۇستەلدىڭ” قورىتىندىلارى قارالدى. “دوڭگەلەك ۇستەلگە” قاتىسۋشىلار قۇرىلىس سالاسى مەن رەسپۋبليكانىڭ تۇرعىن ءۇي-كوممۋنالدىق شارۋاشىلىعىن دامىتۋدا كەزدەسەتىن پروبلەمالى ماسەلەلەردى شەشۋ جونىندەگى ءوز ۇسىنىستارىن ۇكىمەت اتىنا جولداۋ تۋرالى شەشىم قابىلدادى.
سونداي-اق فراكتسيا تۋرالى ەرەجەگە سايكەس, پارلامەنت ءماجىلىسىنىڭ دەپۋتاتتارى – “نۇر وتان” حدپ فراكتسياسى مۇشەلەرى سانسىزباي ەسىلوۆ پەن ەلەنا تاراسەنكونىڭ 2007 جىلدىڭ قىركۇيەك ايى مەن 2010 جىلدىڭ مامىر ايى ارالىعىندا فراكتسيا قۇرامىندا اتقارعان جۇمىستارى تۋرالى ەسەپتەرى دە تىڭدالدى.
سونىمەن قاتار, تورالقا مۇشەلەرى الداعى ماۋسىم ايىندا وتەتىن “ەل پرەزيدەنتىنىڭ 2010 جىلعى 29 قاڭتارداعى “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى قازاقستان حالقىنا جولداۋىندا جۇكتەلگەن مىندەتتەر تۇرعىسىندا “جول كارتاسى” باعدارلاماسىنىڭ ىسكە اسۋ بارىسى تۋرالى” ماسەلە بويىنشا فراكتسيا جينالىسىنا دايىندىق شارالارىن دا تالقىلادى.
ءلايلا ەدىلقىزى.
فورۋمعا قاتىسۋشىلار اراسىنداعى كەزدەسۋ
ماجىلىستە قازاقستان حالقى اسسامبلەياسىنان سايلانعان دەپۋتاتتار مەن اسسامبلەيانىڭ ۇيىمداستىرۋىمەن “تاريحتان تاعىلىم – وتكەنگە تاعزىم” اتتى حالىقارالىق فورۋمعا قاتىسۋشىلار اراسىندا كەزدەسۋ ءوتتى.
كەزدەسۋدى جۇرگىزگەن دەپۋتات قايرات سادۋاقاسوۆ فورۋم قوناقتارىنا الەمدە تەڭدەسى جوق بىرلىك پەن دوستىقتىڭ ينستيتۋتى بولىپ وتىرعان قازاقستان حالقى اسسامبلەياسى 1995 جىلى 1 ناۋرىزدا ەلباسى ن.نازارباەۆتىڭ جارلىعىمەن قۇرىلعانىن, ودان ماجىلىسكە سايلانعان توعىز دەپۋتاتتىڭ بۇگىندە ەلىمىزدىڭ زاڭ شىعارۋ ورنىندا قوعامنىڭ الەۋمەتتىك, ەكونوميكالىق ماسەلەلەرىنە قاتىستىپ وتىرعانىن ءمالىم ەتتى. بۇگىندە اسسامبلەيادان سايلانعان دەپۋتاتتار “جاڭا قازاقستان” اتتى دەپۋتاتتىق توپ قۇرعان, ونىڭ قۇرامىنا “نۇر وتان” حدپ-دان سايلانعان التى دەپۋتات قوسىلعان. فورۋم جۇمىسىنا ساتتىلىك تىلەگەن دەپۋتاتتار قوناقتارمەن پىكىر الماستى.
شاراعا رەسەي فەدەراتسياسى مەملەكەتتىك دۋماسىنىڭ دەپۋتاتتارى, تمد-عا قاتىسۋشى ەلدەردىڭ جانە شەتەلدىڭ بىلىكتى عالىمدارى قاتىسۋدا, دەپ حابارلادى ءماجىلىستىڭ ءباسپاسوز قىزمەتى.