قازىرگى الەمدەگى كىتاپحانالاردىڭ ءرولى تۇبەگەيلى وزگەردى. بۇرىن كىتاپحانا قورىندا ساقتالعان مۇراعاتتارعا قول جەتكىزۋ ءۇشىن ءبىرشاما ۋاقىت كەتەتىن. جاڭا تەحنولوگيالار كەلگەلى كىتاپتار مەن قۇجاتتار ەلەكتروندى تۇرگە اۋدارىلىپ, ارنايى جەلىلەردە ورنالاستىرىلاتىن بولدى. ءسويتىپ بارلىق دەرەكتەر قورى ەلەكتروندىق رەسۋرستار تىزىمىنە قوسىلدى.
مۇنداي زاماناۋي تەحنولوگيالار كىتاپحاناعا كەلگەن وقىرمانداردىڭ ۋاقىتىن ۇنەمدەپ قانا قويماي, قاجەتتى كىتاپتارمەن قامتاماسىز ەتەدى. بۇل سونداي-اق كىتاپحاناشىلارعا كىتاپحانا قويماسىنداعى كەز كەلگەن كىتاپ نەمەسە جۋرنالدىڭ ناقتى قاي سورەدە تۇرعانىن, ونى قاي ەلدىڭ ۆيرتۋالدى كىتاپحانا سورەسىنەن قالاي تاۋىپ الۋعا بولاتىندىعى جايىندا اقپارات بەرە الاتىن مۇمكىندىگىنە جول اشتى.
وسى تۇرعىدا ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي كىتاپحاناسى قازىرگى زامان تالابىنا ساي جابدىقتالعان ءارى تمد ەلدەرى قاتارىنداعى ۋنيۆەرسيتەت كىتاپحانالارى اراسىندا كوشباسشى اتانىپ وتىر. كىتاپحانا قورىنىڭ سانى بۇگىندە 2,5 ميلليون داناعا جەتتى. ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي كىتاپحاناسى ۋنيۆەرسيتەتپەن بىرگە 1934 جىلى قۇرىلدى. 2012 جىلى شىعىس ءستيلىنىڭ ەلەمەنتتەرىمەن ۇيلەسىپ, جاڭا تەحنولوگيالارمەن جانە كوممۋنيكاتسيالىق شەشىمدەرمەن جابدىقتالعان جالپى اۋدانى 17 856,6 شارشى مەتر بولاتىن جاڭا بەس قاباتتى عيماراتقا كوشتى. ءال-فارابي كىتاپحاناسى جاڭا تەحنولوگيالاردى بەلسەندى مەڭگەرۋدە. كىتاپحانادا RFID-تەحنولوگيا نەگىزىندە اۆتوماتتاندىرۋ جۇيەسى ەنگىزىلىپ, ناتيجەسىندە «يربيس 64» اۆتوماتتاندىرىلعان كىتاپحانالىق-اقپاراتتىق جۇيەسى (اكاج) ينتەگراتسيالانۋ جانە ۋنيۆەرسيتەت قىزمەتكەرلەرى مەن ءبىلىم الۋشىلارىنىڭ ۋنيۆەرسيتەتتىك بىرىڭعاي يدەنتيفيكاتسيالىق كارتالارىن (ID-كارتا) وقىرمان بيلەتتەرى رەتىندە پايدالانۋ ماسەلەلەرى ىسكە اسىرىلدى. ءداستۇرلى وقىرمان فورمۋليارىنىڭ ورنىنا بارلىق قىزمەت كورسەتەتىن بولىمشەلەر ءۇشىن بىرىڭعاي ەلەكتروندىق وقىرمان فورمۋليار كەلدى. وندا قۇجاتتار مەن كىتاپتاردى قايتارۋ مەرزىمى, ساقتاپ باقىلاۋ, بەرىلگەن ۋاقىتى تۋرالى بارلىق اقپارات تولىق كورسەتىلگەن. وسىلايشا, وقىرماننىڭ بىرىڭعاي بازاسى ءاربىر وقۋ زالىندا, ابونەمەنتتە تىركەۋ كارتوتەكالارىن جۇرگىزۋ قاجەتتىلىگىنەن ارىلدى, ال بىرىڭعاي فورمۋليار بارلىق قىزمەت كورسەتۋ پۋنكتتەرىندە قايتارۋ مەرزىمىن باقىلاۋعا جانە ادەبيەتتى قايتارۋدى كەشىكتىرۋگە بايلانىستى جاعىمسىز جاعدايلاردىڭ الدىن الۋعا مۇمكىندىك بەردى. سونىمەن قاتار وقۋ زالىندا RFID تەحنولوگيالار نەگىزىندە جۇمىس ىستەيتىن جانە وقىرماندارعا تاڭدالعان ادەبيەتتى ءوز بەتىنشە تىركەۋگە جانە ونى ءۇش كۇنگە دەيىن رەسىمدەۋگە مۇمكىندىك بەرەتىن وزىنە ءوزى قىزمەت كورسەتۋ ستانسالارى ورناتىلعان.
سونىمەن قاتار «پلانسكان ا2-300» كوشىرۋ اپپاراتتارى مەن پلانەتارلىق سكانەر ورناتىلعان. ونىڭ كومەگىمەن كىتاپحانا پايدالانۋشىلارى تاڭداعان ادەبيەتتىڭ قاجەتتى بەتتەرىن تەگىن سكانەرلەپ, ءوزىنىڭ USB-فلەش-جيناقتاعىشقا جىبەرە الادى. وسىلايشا, زامانعا ساي جاسالعان بەتبۇرىس, وقىتۋشىلار مەن ستۋدەنتتەردىڭ عىلىمعا دەگەن قىزىعۋشىلىعىن ودان سايىن ارتتىرا تۇسۋىنە ىقپال ەتەدى.
تولقىن مۇقاجانوۆا,
ءال-فارابي اتىنداعى قازۇۋ دوتسەنتى, تاريح عىلىمدارىنىڭ كانديداتى,
ۇلپان جاپسارباي,
ءال-فارابي اتىنداعى قازۇۋ ماگيسترانتى