ەپيلەپسيا اۋرۋى تۋرالى ەستىمەگەن ادام جوق شىعار. اۋرۋدىڭ بۇل تۇرىنە وپەراتسيا جاساۋ وڭاي ەمەس. بۇل رەتتە وتاندىق مەديتسينا سالاسىنىڭ دامۋى ءۇشىن وزىق ەلدەرمەن تاجىريبە الماسۋدىڭ پايداسى زور. جاقىندا الماتىدا الەمگە ايگىلى شاريتە كلينيكاسىنىڭ نەيروحيرۋرگى, پروفەسسور ۋلريح تومالە ەپيلەپسيانىڭ كۇردەلى ءتۇرى بار بەس بالاعا وپەراتسيا جاسادى.
الماتىنىڭ № 2 قالالىق بالالار كلينيكالىق اۋرۋحاناسىندا ءۇش كۇن بويى گەرمانيادان كەلگەن پروفەسسوردىڭ قاتىسۋىمەن «ەپيلەپسيانىڭ فارماكورەزيستەنتتى ءتۇرى بار بالالارداعى از ءينۆازيۆتى فۋنكتسيونالدىق گەميسفەروتوميا» بالالار نەيروحيرۋرگياسى بويىنشا بىرەگەي شەبەرلىك ساباعى ءوتتى.
فارماكورەزيستەنتتى ەپيلەپسيا كەزىندە دۇرىس تاڭدالعان ەپيلەپسياعا قارسى پرەپاراتتار ءتيىمسىز جانە ەپيلەپسيالىق ۇستامالاردى باقىلاۋدى قامتاماسىز ەتە المايدى. الەمدىك ستاتيستيكاعا سايكەس ەپيلەپسيانى ءدارى-دارمەكپەن ەمدەۋ ناۋقاستاردىڭ 70-80 پايىزىنا ءتيىمدى. قالعان 20-30 پايىزىندا ەپيلەپسيانىڭ فارماكورەزيستەتتى ءتۇرى بار. ەگەر باسقا ەمدەۋ ۇستامالاردى باقىلاۋعا كومەكتەسپەسە, ەپيلەپسيانى حيرۋرگيالىق ەمدەۋ تاعايىندالادى. كەيىنگى جىلدارى ەپيلەپسيا حيرۋرگياسى بويىنشا جاڭا تەحنولوگيالار ازىرلەندى. ولار بۇرىن مۇنداي ەمدەۋ مۇمكىن بولماعان پاتسيەنتتەردىڭ ساۋىعىپ كەتۋىنە مۇمكىندىك بەرەدى دەيدى ماماندار.
ء«بىزدىڭ بەس كىشكەنتاي بالامىزعا وپەراتسيا جاسالدى. بەرليندەگى «شاريتە» كلينيكاسىنان كەلگەن قوناق, پروفەسسور تومالەنىڭ جەتەكشىلىگىمەن وتكىزىلگەن شەبەرلىك ساباعىنىڭ بارىسىندا ۇستامالارى ءجيى بولاتىن ەپيلەپسيامەن اۋىراتىن بالالاردىڭ ميىنا اۋىر, كۇردەلى وتا ءساتتى جۇرگىزىلدى. بالالار – قازىر نەيروحيرۋرگيا بولىمىندە. بولاشاقتا مۇنداي بالالارعا ءبىز ءوز بەتىمىزشە وتا جاسايمىز دەپ ويلايمىن», دەپ اتاپ ءوتتى №2 قالالىق بالالار كلينيكالىق اۋرۋحاناسىنىڭ باس دارىگەرى, بەلگىلى قازاقستاندىق نەيروحيرۋرگ مارات راباندياروۆ.
ءيا, مۇنداي تاجىريبە الماسۋدىڭ ءبىر پايداسى – بولاشاقتا ەپيلەپسيامەن اۋىراتىن بالالاردىڭ اتا-انالارى ەمدەلۋگە شەتەلدىك كلينيكالارعا بارۋ, كوپ قاراجات جۇمساۋ, شەتەلدە ءوزىن قولايسىز سەزىنۋ سەكىلدى اۋرەشىلىكتەن قۇتىلادى.
ەلىمىزدە 18 جاسقا دەيىنگى بالالار ءمامس جۇيەسىندە مەملەكەت تاراپىنان ساقتاندىرىلعان. سونداي-اق №2 قالالىق بالالار كلينيكالىق اۋرۋحاناسىنىڭ پراكتيكاسىنا ەنگىزىلگەن ەپيلەپسيا حيرۋرگياسى بويىنشا وپەراتسيالار پاتسيەنتتەردى ىرىكتەگەننەن كەيىن مىندەتتى الەۋمەتتىك مەديتسينالىق ساقتاندىرۋ اياسىندا تەگىن جۇرگىزىلەدى.
ايتا كەتەيىك, پروفەسسور ۋلريح-ۆيلگەلم تومالە – بالالار ەپيلەپسياسىن حيرۋرگيالىق ەمدەۋ سالاسىنداعى الەمگە بەلگىلى مامان. پراكتيكالىق بالالار نەيروحيرۋرگى جولىنىڭ بارلىق كەزەڭىنەن وتكەن تومالە 8 جىلدان اسا ۋاقىت بويى شاريتە ۋنيۆەرسيتەتتىك كلينيكاسىنىڭ پەدياتريالىق نەيروحيرۋرگيالىق قىزمەتىن باسقاردى.