قاراعاندى مەديتسيناسى ەرتەدەن ەلگە ءماشھۇر. كاسىبىي ءارى جوعارى بىلىكتى ماماندارىنىڭ اتاعىنا سوناۋ كەڭەس كەزىندە-اق شارتاراپتاعىلار قانىق-تىن. بىردەن-ءبىر تانىمال تۇلعالار تالاي دەرتكە داۋا تاپقانى بەلگىلى. بۇگىندە سول ابىروي بيىگىنەن قاراعاندى ءوڭىرىنىڭ دارىگەرلەرى ءبىر سۇيەم دە تومەن تۇسپەدى. زامان تالابىنا ساي جاڭا تەحگولوگيالار كومەگىمەن ءبىر كەزدەرى كۇردەلى سانالعان وپەراتسيالاردى ءساتتى جاساپ كەلەدى. لاپاروسكوپيا – وسى كۇنى قاراعاندىلىق دارىگەرلەر كەڭ قولداناتىن ءتاسىل. توقىشەك پاتولوگياسى, شاپ جارىعى سەكىلدى دەرتتەردى ەمدەۋدە لاپاراسكوپيا ءتاسىلى تانىمال.
جاقىندا قاراعاندى وبلىستىق كلينيكالىق اۋرۋحاناسىندا توقىشەك پاتولوگياسى بار ناۋقاستارعا لاپاروسكوپيا جاسالدى. قاراعاندىلىق جانە وزگە دە شەتەل دارىگەرلەرىنە بۇل شەبەرلىك ساباعىن ماسكەۋلىك حيرۋرگ ارتەم گونچاروۆ وتكىزدى. قاراعاندى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلاعانداي, ارتەم گونچاروۆ جاساعان ءۇش تومەن ءينۆازيۆتى وپەراتسيا تىكەلەي ترانسلياتسيالانعانىن اتاپ وتكەن ءجون.
ءبىرىنشى وپەراتسيا ستوماسى بار ناۋقاسقا جاسالدى. حيرۋرگتىڭ الدىندا سىرتقا شىعىپ كەتكەن ىشەكتىڭ ءبىر بولىگىن ىشكە قايتارىپ, ونىڭ قىزمەتىن قالپىنا كەلتىرۋ مىندەتى تۇردى.
– ول ءۇشىن قابىرعانى سوگىپ, ادەتتەگىدەي ءداستۇرلى وپەراتسيا جانە لاپاروسكوپيا ارقىلى ماقساتقا جەتۋگە بولادى. لاپاروسكوپيادا كىشكەنتاي تىلىكتەر عانا جاسالادى. ونىڭ ۇستىنە, لاپاروسكوپيا ادامنىڭ جىلدام جازىلۋىنا ىقپال ەتەدى. اسقىنۋلاردىڭ الدىن الادى, كوسمەتيكالىق تۇرعىدا جاقسى ناتيجە كورسەتەدى, – دەيدى رەسەي فەدەراتسياسى پرەزيدەنتى ءىس باسقارماسىنىڭ ورتالىق كلينيكالىق اۋرۋحانا جانە ەمحاناسىنىڭ كولوپروكتولوگيا ءبولىمىنىڭ مەڭگەرۋشىسى ارتەم گونچاروۆ.
قاراعاندى دارىگەرلەرىنىڭ ايتۋىنشا, توقىشەككە كۇردەلى وتالاردى اشىق تۇردە جاساپ كەلگەن. ەندى ماسكەۋلىك حيرۋرگتىڭ شەبەرلىك ساعاتى لاپاروسكوپيالىق ءادىستىڭ كوكجيەگىن كەڭەيتە تۇسكەنىن جاسىرمادى.
– بۇل وپەراتسيا لاپاروسكوپيانىڭ جاڭا مۇمكىندىكتەرىن كورسەتتى. توقىشەككە بۇرىن كۇردەلى وپەراتسيالاردى اشىق تۇردە جاسايتىن ەدىك. ەندى كەيبىر ماسەلەلەردى تالقىلاۋدان سوڭ لاپاروسكوپيالىق تەحنولوگيا قولدانىلاتىن بولادى, – دەيدى قاراعاندى وبلىستىق كلينيكالىق اۋرۋحانا ديرەكتورىنىڭ حيرۋرگيا جونىندەگى ورىنباسارى بوريس تسحاي.
ايتالىق, بۇل كۇندەرى قاراعاندىدا شاپ جارىعىن لاپاروسكوپيامەن ەمدەيدى. قاراعاندى دارىگەرلەرى وسىنداي جەتى وپەراتسيا جاساعان. قاراعاندى قالاسىنىڭ №1 كوپسالالى اۋرۋحاناسىنداعى وپەراتسيالار ءساتتى وتكەنىن ايتادى دارىگەرلەر. ولار شاپ جارىعى اسقىنباعان جاعدايدىڭ توقسان پايىزىندا لاپاروسكوپياعا جۇگىنەتىندىكتەرىن جەتكىزدى.
– بارلىق وپەراتسيا ءساتتى بولدى. ءبىزدىڭ اۋرۋحاناداعى لاپاروسكوپيالىق ءادىس – اسقىنباعان شاپ جارىعىن ەمدەۋدىڭ التىن ستاندارتىنا اينالۋدا. ناۋقاستاردىڭ 90%-ىنا لاپاروسكوپيالىق وپەراتسيا جاساۋعا تىرىسامىز. وپەراتسيا بارىسىندا وزىق قۇرالدار قولدانىلادى. اتاپ ايتقاندا, امەريكالىق ءوندىرىستىڭ ەڭ جوعارى ساپالى تورلى يمپلانتتارى پايدالانىلادى. لاپاروسكوپيانى قولدانۋ پاتسيەنتتەر ءۇشىن جاراقات الۋ قاۋپىن ازايتادى. سونىمەن بىرگە وڭالۋ ۋاقىتى جىلدام, – دەيدى № 1 كوپسالالى اۋرۋحانانىڭ حيرۋرگيا ءبولىمىنىڭ مەڭگەرۋشىسى اراستۋن مۇساەۆ.
مۇنداي وپەراتسيا جاساۋعا ءبىر ساعات ۋاقىت كەتەدى ەكەن. وپەراتسيا جاسالعان كۇنى-اق ناۋقاس توسەگىنەن تۇرىپ, جۇرە الادى. ال وتادان سوڭ ءۇشىنشى-ءتورتىنشى كۇنى اۋرۋحانادان شىعادى.
تاعى ءبىر اتاپ ايتارلىعى, بۇل وپەراتسيالار مىندەتتى مەديتسينالىق ساقتاندىرۋ اياسىندا جاسالادى. وعان تولەنەتىن قارجى مەديتسينالىق ساقتاندىرۋ قورىنان بەرىلەدى. مەديتسينالىق ساقتاندىرۋ قورىنىڭ قاراعاندى فيليالىنىڭ مالىمدەۋىنشە, وسى وپەراتسيانىڭ ارقايسىسىنا 150 مىڭ تەڭگەدەن استام قاراجات اۋدارىلعان.
قاراعاندى وبلىسى