قىرعىزستان پارلامەنتىنىڭ بۇرىنعى دەپۋتاتى فەليكس كۋلوۆ رەسپۋبليكا اتاۋىن وزگەرتۋدى ۇسىنىپ وتىر. بۇل ويىمەن ول Facebook پاراقشاسىندا ءبولىستى, دەپ حابارلايدى Egemen.kz.
فەليكس كۋلوۆ حالىقارالىق ارەنادا ەلدەردىڭ اتاۋلارى ءجيى شاتاستىرىلاتىنىن اتاپ وتكەن. ول جاقىندا عانا ۇيىمداستىرىلعان «الەم ارۋى» سۇلۋلىق بايقاۋىندا جۇرگىزۋشىنىڭ قىرعىز قاتىسۋشىسىن قازاقستاننان دەپ تانىستىرعانىن ەسكە الدى. سونداي-اق ونىڭ ايتۋىنشا, اعىلشىن تىلىندە ايتىلۋىنىڭ ۇقساستىعىنا بايلانىستى قىرعىزستاندى كۇردىستانمەن دە ءجيى شاتاستىرادى.
ء«بىر كەزدەرى مەن كۋبا رەسپۋبليكاسى, كومي رەسپۋبليكاسى, ساحا رەسپۋبليكاسى (ياكۋتيا) سەكىلدى اتاۋلاردى نەگىزگە الىپ, ءبىزدىڭ ەلىمىزگە قىرعىز رەسپۋبليكاسى دەپ رەسمي اتاۋ بەرۋدى ۇسىنعانمىن. سول كەزدەگى ساياسي قارسىلاستارىم مەنى بىردەن سىنعا الدى. بىراق كەيىنىرەك بۇل تاقىرىپ مەزگىل وتكەن سايىن بەلسەندى تۇردە تالقىلانا باستادى.
ءبىزدىڭ كونستيتۋتسيامىزدا ەلدىڭ رەسمي تىلدەگى اتاۋى «كىرگىزسكايا رەسپۋبليكا (قىرعىزستان)», ال مەملەكەتتىك تىلدە «قىرعىز رەسپۋبليكاسى (قىرعىزستان)» دەپ ايتىلادى. حالىقارالىق كەڭىستىكتە ەل اتاۋى «قىرعىز رەسپۋبليكاسى» بولسا, بارلىق تىلدە بىردەي جازىلىپ, بىردەي ايتىلادى. تۇسىنەمىن, ەل اتاۋىن وزگەرتۋ ءتيىمسىز دەپ ايقايلايتىن سىنشىلار مىندەتتى تۇردە تابىلادى. بالكىم, بۇگىنگى كۇن وعان ىڭعايلى بولا قويماس. بىراق نەگە بولاشاقتى ويلاماسقا؟», دەدى ساياساتكەر.
ايتا كەتەيىك, ەلدىڭ اتاۋىن وزگەرتۋ تۋرالى پىكىرتالاس ءبىرىنشى رەت تۋىنداپ وتىرعان جوق. وسى جىلدار ىشىندە ساياساتكەرلەر مەن قوعام قايراتكەرلەرى قىرعىزستاننىڭ اتىن قىرعىزستان قۇراما شتاتتارى, اسپاناستى تاۋلار ەلى, قىرعىزدار ەلى, قىرعىز حالىق رەسپۋبليكاسى (قحر) دەپ وزگەرتۋدى ۇسىندى. سونداي-اق ولار بىشكەك اتاۋىن تۋرداكۋن نەمەسە ماناس دەپ وزگەرتۋدى ۇسىنعان. بۇرىنعى ادىلەت ءمينيسترى مارات قايىپوۆ تا 2020 جىلى كونستيتۋتسيا جوباسىن تالقىلاۋ بارىسىندا ەلدىڭ اتاۋىن «قىرعىز رەسپۋبليكاسى» دەپ وزگەرتۋدى ۇسىنعان ەدى.