ەلوردانىڭ كوممۋنالدىق قىزمەتتەرى قار مەن مۇزدى كۇرەۋ بويىنشا كۇشەيتىلگەن رەجيمدە تاۋلىك بويى جۇمىس ىستەپ جاتىر. 16 قاڭتار كۇنى تاڭەرتەڭ قالا كوشەلەرى مەن جولدارىن تازارتۋعا 2 مىڭنان استام جول جۇمىسشىسى جۇمىلدىرىلدى, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
قالادا قار كۇرەۋ جۇمىسىنا 2 مىڭنان استام جول جۇمىسشى مەن مىڭنان استام ارنايى تەحنيكا جۇمىلدىرىلدى.
16 قاڭتارعا قاراعان ءتۇنى ەلوردادان 37 مىڭ تەكشە مەتردەن استام قار شىعارىلدى, بۇل 2 678 اۋىر جۇك كولىگىنە تەڭ.
قىس باستالعالى بەرى بارلىعى 2 ملن تەكشە مەتردەن استام قار شىعارىلدى, ول ءۇشىن پوليگوندارعا 164 مىڭنان استام رەيس جاسالدى.
سونىمەن قاتار قالاداعى تروتۋارلاردا تۇرعىنداردىڭ ىڭعايلى ءجۇرۋى ءۇشىن قۇم-تۇز قوسپاسىن سەبۋ جۇمىسى ۇنەمى جۇرگىزىلەدى.