كەشە ستامبۋلدا تۇركى ينۆەستيتسيالىق قورىنىڭ پرەزيدەنتى باعداد امىرەەۆتىڭ توراعالىعىمەن تۇركى ينۆەستيتسيالىق قورىنا مۇشە مەملەكەتتەردىڭ ەكونوميكا جانە قارجى مينيسترلىكتەرى مەن ءتيىستى قارجى ينستيتۋتتارىنىڭ جوعارى لاۋازىمدى تۇلعالارىنىڭ وتىرىسى ءوتتى, دەپ جازادى Egemen.kz تۇركى ينۆەستيتسيالىق قورى پرەزيدەنتىنىڭ كەڭسەسىنىڭ ءباسپاسوز ءبولىمى تاراتقان دەرەككە سىلتەمە جاساپ.
2022 جىلعى 11 قاراشادا سامارقاندتا وتكەن تۇركى ينۆەستيتسيالىق قورىن قۇرۋ تۋرالى 9-شى سامميتتە وتس مەملەكەت باسشىلارى كەڭەسىنىڭ قابىلداعان شەشىمىنە سايكەس ءتيىستى مينيسترلىكتەردىڭ جوعارى لاۋازىمدى تۇلعالارى ينۆەستيتسيالىق قوردى قۇرۋ تۋرالى كەلىسىمنىڭ تۇپكىلىكتى جوباسىن تالقىلادى.
العاشقى باس قوسۋعا ءازىربايجان رەسپۋبليكاسى ەكونوميكا مينيسترلىگىنىڭ جەتەكشى كەڭەسشىسى تەبريك باباەۆ, قازاقستان رەسپۋبليكاسى ۇلتتىق ەكونوميكا مينيسترلىگى حالىقارالىق ەكونوميكالىق ىنتىماقتاستىق دەپارتامەنتىنىڭ باسشىسى ەرجان ءابىش مىرزا, قىرعىز رەسپۋبليكاسى ەكونوميكا ءمينيسترىنىڭ ورىنباسارى قانات ابدۋلراحمانوۆ, تۇركيانىڭ قازىناشىلىق جانە قارجى مينيسترلىگى باس ديرەكتورىنىڭ سىرتقى ەكونوميكالىق بايلانىستار جونىندەگى ورىنباسارى بەنگۋ ايتەكين حانىم جانە وزبەكستان رەسپۋبليكاسى ينۆەستيتسيالار جانە سىرتقى ساۋدا مينيسترلىگىنىڭ زاڭ دەپارتامەنتىنىڭ باسشىسى ساردور رۋزيەۆ مىرزا قاتىستى.