2022 جىلدىڭ قاڭتار-قازان ايلارىندا مەملەكەتتىك باسقارۋ, قورعانىس جانە مىندەتتى الەۋمەتتىك قامسىزداندىرۋ سالالارىنا سالىنعان ينۆەستيتسيا 93,3 ملرد تەڭگەگە جەتىپ, ءبىر جىل بۇرىنعى كورسەتكىشتەن 2,4 ەسە اسىپ تۇسكەن.
وڭىرلىك بولىنىستە سەكتورداعى ينۆەستيتسيانىڭ باسىم بولىگى تۇركىستان وبلىسىنا تيەسىلى بولىپ شىقتى: 24,5 ملرد تەڭگە, جىلدىق اقشالاي ءوسىم – 5,4 ەسە كوپ. كوش باسىندا 23,3 ملرد تەڭگە ينۆەستيتسيانى يەلەنگەن (جىلدىق ءوسىم – 2,4 ەسە) ەلوردا مەن ءبىر جىلدا 15,9 ملرد تەڭگە قارجى قۇيىلعان الماتى قالاسى (جىلدىق ءوسىم – 4,3 ەسە) بار. ەڭ تومەن كورسەتكىش بىلتىر عانا قۇرىلعان ۇلىتاۋ وبلىسىندا – 16,7 ملن تەڭگە.
قارجىلاندىرۋ كوزى بولىنىسىنە كەلەر بولساق, كۇردەلى سالىمداردىڭ 62,1 پايىزى رەسپۋبليكالىق بيۋدجەت ەسەبىنەن بەرىلسە, 28,4 ملرد تەڭگە – جەرگىلىكتى بيۋدجەتتەن, 5,6 ملرد تەڭگە – بانكتىك ەمەس قاراجاتتان, 1,4 ملرد تەڭگە كاسىپورىننىڭ جەكە قاراجاتىنان تۇسكەن.
ەكونوميكانىڭ وركەندەۋىندە تىكەلەي شەتەلدىك ينۆەستيتسيانىڭ ۇلەسى دە جوعارى. سىرتقى ىستەر مينيسترلىگىنىڭ مالىمەتى بويىنشا, 2005-2010 جىلدارى تىكەلەي شەتەلدىك ينۆەستيتسيانىڭ 70 پايىزى مۇناي-گاز سالاسىنا قۇيىلعان. ال سوڭعى ءۇش جىلدا ءۇردىس وزگەرىپ, مۇناي-گاز سالاسىنا جىبەرىلگەن ينۆەستيتسيا كولەمى 45 پايىزدى قۇراپ وتىر. ونىڭ ەسەسىنە ينۆەستيتسيا ءۇشىن تالاستا ساۋدا, اقپارات, بايلانىس, وڭدەۋشى سەكتور العا شىعا باستادى. قازاقستانعا ينۆەستيتسيا سالىپ وتىرعان ۇزدىك 10 ەل قاتارىنا نيدەرلاند, اقش, شۆەيتساريا, بەلگيا, سينگاپۋر, قىتاي, وڭتۇستىك كورەيا, فرانتسيا, ۇلىبريتانيا جانە رەسەي كىرەتىنىن دە ايتا كەتەيىك.
«ينۆەستيتسيالىق ساياساتتى جۇزەگە اسىرۋ تۋرالى ايتار بولساق, ءبىز ينۆەستيتسيا تارتۋعا قاتىستى ءۇش دەڭگەيلى جۇيە بويىنشا جۇمىس اتقارامىز. شەت ەلدەردە ءبىزدىڭ 108 ينستيتۋتىمىز ەكونوميكالىق ديپلوماتيا ساياساتىن جۇرگىزەدى. جىل قورىتىندىسى بويىنشا 3 مىڭنان استام جاڭا كومپانيامەن جۇمىس جۇرگىزدىك», دەيدى سىرتقى ىستەر ءمينيسترىنىڭ ورىنباسارى الماس ايداروۆ.
جالپى العاندا, بىلتىر جىل باسىندا بولعان قاڭتار وقيعاسىنا, وعان ىلە-شالا باستالعان اۋقىمدى گەوساياسي داعدارىسقا قاراماستان ينۆەستورلاردىڭ قازاقستانعا قاتىستى نيەتى ءتۇزۋ. 2021 جىلمەن سالىستىرعاندا تىكەلەي شەتەلدىك ينۆەستيتسيا كولەمى 28 پايىزعا وسكەن. تارتىلعان سوما كولەمى – 23,7 ملرد دوللار. مەملەكەت باسشىسى الداعى 7 جىلدا 150 ملرد دوللار ينۆەستيتسيا تارتۋدى ۇكىمەت الدىنا ۇلكەن تاپسىرما ەتىپ قويىپ وتىر.