جاڭا جىلدىڭ العاشقى كۇندەرى جاۋىندى بولىپ, وبلىس ورتالىعىنىڭ كەيبىر اۋماعى مەن بىرقاتار اۋىلدىق ەلدى مەكەندە ەلەكتر جارىعى ءوشتى, توقتاۋسىز جاۋعان نوسەردەن تۇرعىن ۇيلەر اۋلاسى سۋعا تولدى. سونگەن جارىق سالدارىنان جىلۋ, اۋىز سۋمەن قامتۋ قىزمەتتەرى دە توقتاپ قالدى.
ايتەۋىر جەدەل قيمىلداعان سالا ماماندارىنىڭ ارقاسىندا الەۋمەتتىك نىساندار مەن تۇرعىن ۇيلەرگە جارىق بەرىلىپ, ارنايى تەحنيكالار قالا كوشەسىن كولكىگەن سۋدان تازارتتى.
جىلدىڭ العاشقى جۇمىس كۇنى وبلىس اكىمى نۇرلىبەك نالىباەۆ شۇعىل جيىن وتكىزىپ, مەرەكە كۇندەرى تۇرعىندارعا قولايسىزدىق تۋدىرعان كوممۋنالدىق قىزمەتكە جاۋاپتىلار جۇمىسىن سىنعا الىپ, ناقتى تاپسىرمالار بەردى.
جيىندا وبلىس باسشىسىنىڭ ورىنباسارى مارحابات جايىمبەتوۆ, قالا اكىمى اسىلبەك شامەنوۆ, ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى رۋسلان نۇرماعانبەتوۆ ناقتى جاعدايدى باياندادى.
وبلىس اكىمىنىڭ ورىنباسارى مارحابات جايىمبەتوۆ اقاۋعا 70-85 پايىزى توزىعى جەتكەن ەلەكتر جەلىسى سەبەپ بولعانىن ايتتى. ال ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى ترانسفورماتورلىق قوسالقى ستانتسيالاردى جاڭالاۋ جۇمىستارىنا قارجى قاجەتتىگىن ءسوز ەتتى.
بۇل جاۋاپقا قاناعاتتانباعان وبلىس اكىمى جاۋاپتى سالا باسشىلارى كوممۋنالدىق مەكەمەلەردىڭ قىسقا تولىق دايىندىعى تۋرالى ەسەپ بەرگەنىمەن, تابيعات قۇبىلىسى جاعدايدى ناقتى كورسەتكەنىن ايتىپ ءوتتى.
– قىسقا جاساعان دايىندىقتىڭ دەڭگەيىن ءبىر-اق كۇن جاۋعان جاۋىن كورسەتىپ كەتتى. بۇل – بارلىعىمىزعا سىن! وسىعان دەيىن دە تىرشىلىكتى قامتاماسىز ەتۋ جۇيەلەرىنىڭ تۇراقتى جۇمىس ىستەۋ قاجەتتىگىن ۇنەمى ەسكەرتىپ كەلەمىن. ەلەكتر جۇيەلەرىنىڭ توزعانى بەلگىلى. توزۋ كورسەتكىشىن 68-دەن 30 پايىزعا دەيىن تومەندەتۋ ءۇشىن 153 ملرد تەڭگە قاجەت. ۇكىمەت باسشىسىنىڭ وڭىرگە جۇمىس ساپارى بارىسىندا دا وسى ماسەلەنى كوتەرىپ, قاراجات سۇرادىق. ونىڭ ىشىندە مامانداردىڭ قارجى ماسەلەسى دە قامتىلعان. بۇل ءبىر كۇندە شەشىلەتىن ماسەلە ەمەس. سوندىقتان قول قۋسىرىپ وتىرماي, قولداعى باردى ۇقساتىپ, كەز كەلگەن جاعدايعا دايىن بولۋىمىز قاجەت ەدى. كەزىندە قالاداعى ۇلكەن ترانسفورماتورلاردىڭ كۇردەلى جوندەۋ جۇمىستارىنا رەسپۋبليكالىق جانە وبلىستىق بيۋدجەتتەن بولىنگەن 4 ملرد تەڭگە ۋاقتىلى يگەرىلمەي, كەرى قايتارىلدى. وسىدان 2 جىل بۇرىن دۇرىس جاسالماعان جۇمىستىڭ زاردابىن قازىر تارتىپ وتىرمىز. ماسەلەنىڭ وتكىر ەكەنىن ەسكەرىپ, شۇعىل جوندەۋ جۇمىستارىنا 500 ملن تەڭگە بولگەنىمىزبەن, ودان دا قايتارىم بولمادى. قالا اكىمى, باسقارما باسشىسى نەمقۇرايدىلىق تانىتپاعاندا بيۋدجەت قاراجاتىن بەكىتكەن ۋاقىتتا قوسالقى ستانتسيالاردىڭ جاعدايىن رەتكە كەلتىرۋگە قارجى قاراستىرار ەدىك, – دەدى وبلىس باسشىسى.
شۇعىل جيىندا ءاربىر قوسالقى ستانتسيانىڭ جاعدايىنا تالداۋ جاسالىپ, ماماندار كۇشىمەن رەتكە كەلتىرۋ قاجەتتىگى ايتىلدى. ءتىپتى بۇل جۇمىستاردى دەمەۋشىلەردى جۇمىلدىرۋ ارقىلى دا ۇيلەستىرۋگە بولادى.
وبلىس اكىمى ەلدى ابىگەرگە سالعان اقاۋعا جول بەرگەن باسشىلاردىڭ جۇمىسى كوڭىل كونشىتپەيتىنىن ايتىپ, ورىنباسارى مارحابات جايىمبەتوۆ پەن قالا اكىمى اسىلبەك شامەنوۆكە اۋىزشا قاتاڭ ەسكەرتۋ, ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسىنا, قىزىلوردا ەلەكتر جەلىلەرىن تاراتۋ كومپانياسىنىڭ جەتەكشىسىنە, قالا اكىمىنىڭ ورىنباسارى مەن جاۋاپتى ءبولىم باسشىسىنا قاتاڭ سوگىس جاريالادى.
وبلىس اكىمىنىڭ ءبىرىنشى ورىنباسارى سەرىك قوجانيازوۆتىڭ توراعالىعىمەن ارنايى كوميسسيا قۇرىلىپ, اقاۋ سەبەپتەرى مەن ونى جويۋ ءۇشىن ۇسىنىس بەرىلەتىن بولدى. كوميسسيا قۇرامىنا بىلىكتى مامانداردان بولەك جاعدايدى جەتە بىلەتىن سالا ارداگەرلەرى دە ەندى.
قىزىلوردا