كەشە قالا اكىمدىگىنىڭ ۇلكەن ءماجىلىس زالىندا ءى استانالىق يننوۆاتسيالىق فورۋم بولىپ ءوتتى. ونى استانا قالاسىنىڭ اكىمدىگى مەن قازاق ۇلتتىق جاراتىلىستانۋ عىلىمدارى اكادەمياسى ۇيىمداستىردى. فورۋمعا ەلىمىزدىڭ جەتەكشى تەحنيكالىق جوعارى وقۋ ورىندارىنىڭ رەكتورلارى, بەلگىلى عالىمدار, عىلىمي-زەرتتەۋ ورتالىقتارى مەن يننوۆاتسيالىق قورلاردىڭ باسشىلارى جانە قازاقستاننىڭ بارلىق وڭىرلەرىندەگى ءىرى كاسىپورىنداردىڭ وكىلدەرى, بارلىعى 200-دەن استام دەلەگات قاتىستى.
ءى استانالىق يننوۆاتسيالىق فورۋمدا قالا اكىمى يمانعالي تاسماعامبەتوۆ, سىرتقى ىستەر ءمينيسترىنىڭ ءبىرىنشى ورىنباسارى, قازاق ۇلتتىق جاراتىلىستانۋ عىلىمدارى اكادەمياسىنىڭ پرەزيدەنتى نۇرتاي ابىقاەۆ, يندۋستريا جانە جاڭا تەحنولوگيالار ۆيتسە-ءمينيسترى نۇرمۇحامەت ابدىبەكوۆ, “اتامەكەن” وداعى” ۇلتتىق ەكونوميكالىق پالاتاسىنىڭ توراعاسى ازات پەرۋاشەۆ, قازاق ۇلتتىق جاراتىلىستانۋ عىلىمدارى اكادەمياسىنىڭ ۆيتسە-پرەزيدەنتى, “پاراسات” ۇلتتىق عىلىمي-تەحنيكالىق حولدينگى” اق-تىڭ باسقارما توراعاسى نۇرالى بەكتۇرعانوۆ جانە باسقالار سويلەدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باستاماسى بويىنشا العاش رەت وتكىزىلىپ وتىرعان بۇل فورۋمنىڭ باستى ماقساتى, ەلىمىزدىڭ باس قالاسىنىڭ ەكونوميكاسىنا زاماناۋي وزىق تەحنولوگيالاردى كەڭىنەن ەنگىزىپ, ەلوردامىزدا يننوۆاتسيالىق قىزمەتتى جانداندىرۋ ماقساتىنداعى ديالوگ الاڭىن قۇرۋ بولىپ تابىلادى. وسى ورايدا ەلوردانىڭ يننوۆاتسيالىق قىزمەتىن دامىتۋ ءۇشىن عىلىم, ءبىلىم جانە جوعارى تەحنيكالىق ينستيتۋتتاردىڭ, وزىق تەحنولوگيالارمەن جۇمىس ىستەيتىن جەتەكشى كاسىپورىنداردىڭ ورتاق ماقسات جولىنداعى قىزمەتتەرىن ۇيلەستىرىپ, استانا قالاسىنىڭ ەكونوميكاسىنا يننوۆاتسيالىق تەحنولوگيالاردى ەنگىزۋگە بارىنشا قولايلى جاعداي تۋعىزۋ, ومىرگە كەلگەن يننوۆاتسيالىق جوبالاردى بىرلەسە ءىس جۇزىنە اسىرۋ بولىپ تابىلادى. “يننوۆاتسيا – بۇل بۇگىنگى قوعام مەن زاماننىڭ جوعارى تالابىنا ادام يدەياسىنىڭ لايىقتى جاۋابى. يننوۆاتسيالىق دامۋ ۇردىسىندە ەڭ باستى تۇعىر عىلىم مەن تاجىريبەنىڭ تۇتاستىعى بولۋى قاجەت. يندۋستريالاندىرۋ ءداۋىرىنىڭ تالابى دا وسى”, دەدى استانا قالاسىنىڭ اكىمى ي.تاسماعامبەتوۆ فورۋمدا سويلەگەن سوزىندە.
استانا اكىمدىگىنىڭ دەرەكتەرى بويىنشا, 2009 جىلى ەلوردادا 8 جاڭا يننوۆاتسيالىق ءوندىرىس ىسكە قوسىلعان. 2010 جىلى ناق وسىنداي تاعى دا 6 ءىرى ءوندىرىس وشاعى پايدالانۋعا بەرىلمەك. قازىرگى ۋاقىتتا قالانىڭ يندۋستريالىق پاركىندە جالپى قۇنى 170 ميلليارد تەڭگە بولاتىن 41 ءىرى جوبا ءجۇزەگە اسىرىلۋدا. بۇل جوبالاردىڭ ارقايسىسى باس قالامىزدىڭ دامۋى جولىنداعى يننوۆاتسيالىق ۇدەرىستىڭ ءتيىمدى جۇمىس ىستەپ كەتۋىنىڭ كەپىلى بولا الادى.
فورۋم شەڭبەرىندە ەلىمىزدىڭ ءارتۇرلى وڭىرلەرىنەن كەلگەن عالىمداردىڭ عىلىمي-يننوۆاتسيالىق جوبالارى تانىستىرىلىپ, ارنايى اشىلعان كورمەدە بىرقاتار جاڭا عىلىمي-يننوۆاتسيالىق جۇمىستاردىڭ تۇساۋى كەسىلدى. وسى ورايدا, قالا اكىمدىگى مەن جەتەكشى كاسىپورىندار باسشىلارىنىڭ قىزىعۋشىلىعىن تۋدىرعان بىرقاتار جوبالاردى اتاپ وتۋگە بولادى. شىعىس قازاقستان وبلىسىنىڭ “التاي” وڭىرلىك عىلىمي-تەحنيكالىق پاركى” اق پەن “پاراسات” حولدينگى ۇسىنعان جىلىتۋ جۇيەلەرىنىڭ قۋاتى مەن ساپاسىن ارتتىراتىن جىلۋ سورعىلارى قوندىرعىلارى استانا قالاسىنىڭ كوممۋنالدىق كاسىپورىندارىندا وندىرىسكە ەنگىزىلەتىن بولدى. سونداي-اق “پاراسات” حولدينگىنىڭ “فيزيكا-تەحنيكالىق ينستيتۋتى” جشس جاساپ شىعارعان ەرەكشە جارىق بەرەتىن ديودتى شامدار ەنەرگيا قۋاتىن ۇنەمدەۋگە ءتيىمدى جول اشادى. وسى ينستيتۋتتىڭ عالىمدارى ويلاپ تاپقان ەلەكتر ەنەرگياسىن گەنەراتسيالاۋ ءۇشىن قولدانىلاتىن قابىرشىقتى پلەنكالاردى پايدالانۋ ارقىلى كۇن ساۋلەسى قۋاتىنان ەلەكتر ەنەرگياسىن ءوندىرۋ قوندىرعىلارى دا قالا كاسىپورىندارى ماماندارىنىڭ قىزىعۋشىلىعىن وياتتى.
س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ عالىمدارى جاساعان پلانەتارلىق رەدۋكتورلارى بار جەل-ەنەرگەتيكالىق قوندىرعىلارى, ءال-فارابي اتىنداعى قازمۋ عالىمدارى ۇسىنعان اسفالت-بەتون قوسپالارىنا پايدالانىمنان شىققان اۆتوكولىك شينالارىنىڭ ۇنتاقتارىن قوسۋ تەحنولوگياسى, “سەيسمولوگيا ينستيتۋتى” جشس ۇسىنعان ۆياچەسلاۆ سۋ قويماسىنىڭ پايدالانۋ مەرزىمىنىڭ سەنىمدىلىگىن انىقتايتىن جوبالار ەلوردامىزدىڭ ەكونوميكاسىنا كەڭىنەن قولدانىلاتىن بولدى.
فورۋمدا ەلىمىزدىڭ ەكونوميكا سالاسىن دامىتۋعا جانە ونىڭ عىلىمي الەۋەتىن ارتتىرۋعا قوسقان ۇلەسى ءۇشىن “فيتوحيميا” حالىقارالىق عىلىمي-وندىرىستىك حولدينگى” اق پرەزيدەنتى سەرعازى ادەكەنوۆكە “قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆ اتىنداعى التىن مەدال”, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ رەكتورى عالىمقايىر مۇتانوۆقا ء“ال-فارابي اتىنداعى التىن مەدال”, ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ رەكتورى كەنجەعالي كەنجەباەۆقا ء“ال-فارابي اتىنداعى كۇمىس مەدال” تاپسىرىلدى. فورۋم قورىتىندىسىندا استانا قالاسىنىڭ اكىمدىگى, قازاق ۇلتتىق جاراتىلىستانۋ عىلىمدارى اكادەمياسى جانە “اتامەكەن” وداعى” ۇەپ اراسىندا ۇشجاقتى ءوزارا يننوۆاتسيالىق ءارىپتەستىك مەموراندۋمىنا قول قويىلدى.
جىلقىباي جاعىپار ۇلى.