قاڭتار ايىنا ارنالعان اۋا رايى بولجامى

رەسپۋبليكانىڭ سولتۇستىك جارتىسىندا قارقىندى قار جاۋىپ, بۇرقاسىن بولجانادى, وڭتۇستىك جارتىسىندا - جاۋىن-شاشىن (جاڭبىر, جىلبىسقى قار), وڭتۇستىك جانە شىعىس اۋداندارىندا قاتتى جاۋىن-شاشىن جاۋى مۇمكىن. رەسپۋبليكانىڭ وڭتۇستىك-باتىس جارتىسىندا تۇمان جانە كوكتايعاق بولۋى ىقتيمال. بەلسەندى تسيكلوندارمەن قازاقستاننىڭ باسىم بولىگىندە جەلدىڭ كۇشى 15-20 م/س, ەكپىنى 23-28 م/س-دەيىن كۇتىلەدى.

رەسپۋبليكانىڭ باسىم بولىگىندە اۋا تەمپەراتۋراسى تۇندە -15-25°س-تان         -3-12°س-قا دەيىن, كۇندىز -7-15°س-تان 0,-8°س-قا دەيىن; ەلىمىزدىڭ وڭتۇستىگىندە جانە وڭتۇستىك-شىعىسىندا تۇندە -5-15°س-تان -5+2°س-قا دەيىن, كۇندىز 0,-8°س-تان +1+8°س-قا دەيىن اۋىتقيدى دەپ بولجانۋدا.

ەلىمىزدىڭ باتىس اۋداندارىندا اۋا تەمپەراتۋراسى تۇندە -5+5°س-تان -15-25°س-قا دەيىن, كۇندىز -3+8°س-تان -10-20°س-قا دەيىن بىرتىندەپ تومەندەۋى كۇتىلەدى. ءبىرىنشى ونكۇندىكتىڭ سوڭىندا قازاقستاننىڭ باسىم بولىگىندە سولتۇستىك-باتىس انتيتسيكلوننىڭ اسەرىنەن اۋا تەمپەراتۋراسى تۇندە -20-30°س-قا, كۇندىز -10-18°س-قا دەيىن, رەسپۋبليكامىزدىڭ وڭتۇستىك-باتىس, وڭتۇستىك جانە وڭتۇستىك-شىعىسىندا تۇندە -10-20°س-قا, كۇندىز -5-15°س-قا دەيىن تومەندەۋى بولجانادى.

كونسۋلتاتيۆتى بولجامعا سايكەس 2023 جىلدىڭ قاڭتار ايىنىڭ ەكىنشى جانە ءۇشىنشى ونكۇندىگىندە  قازاقستاننىڭ باسىم اۋماقتارىندا اۋا رايى ءجيى وزگەرۋى, ايازدى كۇندەر جىلى كۇندەرمەن اۋىسىپ, قارلى بورانمەن, بۇرقاسىنمەن جانە ەكپىندى جەلمەن كۇتىلۋدە.

وڭتۇستىك تسيكلونداردىڭ اسەرىنەن قارقىندى جىلۋ تولقىندارى بايقالادى, بۇل كەزدە اۋا تەمپەراتۋراسى ەلىمىزدىڭ سولتۇستىك جارتىسىندا كۇندىز -5+2°س-قا, وڭتۇستىك جارتىسىندا جانە وڭتۇستىك-باتىسىندا كۇندىز +2+12°س-قا دەيىن جوعارىلايدى.

ال سولتۇستىك-باتىس انتيتسيكلوننىڭ ەنۋىنە بايلانىستى كارقىندى سۋىق تولقىندار بولجانادى, بۇل كەزدە اۋا تەمپەراتۋراسى رەسپۋبليكامىزدىڭ سولتۇستىك جارتىسىندا جانە ورتالىعىندا تۇندە -25-35°س-قا, كۇندىز -15-25°س-قا دەيىن, وڭتۇستىك جارتىسىندا جانە وڭتۇستىك-باتىسىندا تۇندە -12-22°س-قا, كۇندىز -3-15°س-قا دەيىن تومەندەيدى.