سەنات دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاق يت تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قابىلدادى, دەپ حابارلايدى Egemen.kz.
«قازاق يت تۇقىمدارى – تازى مەن توبەتتى ساقتاۋ جانە كوبەيتۋ تۋرالى زاڭ جوباسى كەڭ اۋقىمدى باعىتتاردى قامتيدى. ونىڭ ءبىرى گەنەتيكالىق ساپاسىن عىلىمي باعالاۋ, سەلەكتسيالىق ساراپتامالار جۇرگىزۋ, جيناقتاۋ ارقىلى وسى تۇقىمداردى ساقتاۋعا قاجەتتى عىلىمي بازا قۇرۋ», دەدى قۇجاتتى تانىستىرعان سەناتور ولگا بۋلاۆكينا.
زاڭ جوباسىنىڭ نەگىزگى ماقساتى – قازاقتىڭ تازى جانە توبەت يت تۇقىمدارىن ساقتاۋ جانە ءوسىمىن مولايتۋ سالاسىنداعى قىزمەتتى جۇزەگە اسىرۋدىڭ قۇقىقتىق, ۇيىمداستىرۋشىلىق جانە ەكونوميكالىق نەگىزدەرىن بەلگىلەۋ.
زاڭ جوباسى اياسىندا «جانۋارلار دۇنيەسىن قورعاۋ, ءوسىمىن مولايتۋ جانە پايدالانۋ تۋرالى», «مەملەكەتتىك الەۋمەتتىك تاپسىرىس, ستراتەگيالىق سەرىكتەستىكتى جۇزەگە اسىرۋعا مەملەكەتتىك تاپسىرىس, گرانتتار مەن ناگرادالار تۋرالى» قازاقستان رەسپۋبليكاسىنىڭ زاڭدارىنا وزگەرىستەر مەن تولىقتىرۋلار ەنگىزىلۋدە.
اتاپ ايتقاندا, يتتەردىڭ قازاق تۇقىمىن ساقتاۋ جانە ءوسىمىن مولايتۋ سالاسىنداعى مەملەكەتتىك باسقارۋدىڭ نەگىزگى قاعيداتتارى بەلگىلەندى, يتتەردىڭ قازاق تۇقىمدى تۇقىمدارىن ساقتاۋ مەن ءوسىمىن مولايتۋدى قامتاماسىز ەتۋ جۇيەسىنە جاۋاپتى مەملەكەتتىك ورگاندار مەن ۇيىمدار ايقىندالىپ, ولاردىڭ قۇزىرەتى ايقىندالدى.
سونىمەن قاتار زاڭ جوباسى ۋاكىلەتتى ورگان ايقىندايتىن مامانداندىرىلعان ۇيىمنىڭ قۇرىلىمدىق بولىمشەسى بولاتىن قازاق يت تۇقىمدارىنىڭ ۇلتتىق ورتالىعىن قۇرۋدى, سونداي-اق قازاق يتتەرىن ساقتاۋ جانە ءوسىمىن مولايتۋ ماقساتىندا قىزمەتتى قارجىلاندىرۋدى كوزدەيدى.