اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
وتىرىستا قازاقستان رەسپۋبليكاسىنداعى كوشى-قون جانە دەموگرافيالىق ساياساتتى جەتىلدىرۋ ماسەلەسى, ءدىني ەكسترەميزمگە قارسى ارەكەت ەتۋ جونىندەگى شارالار قارالدى.
كۇن ءتارتىبى بويىنشا پرەمەر-مينيستردىڭ ورىنباسارى ەربول ورىنباەۆ جانە ەڭبەك جانە حالىقتى الەۋمەتتىك قورعاۋ مينيسترى گۇلشارا ابدىقالىقوۆا, مادەنيەت مينيسترى مۇحتار قۇل-مۇحاممەد بايانداما جاسادى. سونداي-اق جەكەلەگەن مەملەكەتتىك ورگاندار باسشىلارىنىڭ دەموگرافيا جانە كوشى-قون سالاسىنداعى ەلىمىز پرەزيدەنتىنىڭ اكتىلەرى مەن تاپسىرمالارىن ورىنداۋ بارىسى تۋرالى اقپاراتتارى تىڭدالدى.
ەلىمىزدىڭ 2020 جىلعا دەيىنگى ستراتەگيالىق دامۋ جوسپارىندا العا قويىلعان ءمىندەتتەردى شەشۋ دەموگرافيالىق ساياساتتى بەلسەندى جانە ماقساتتى تۇردە جۇرگىزۋدى تالاپ ەتەتىنى اتاپ ءوتىلدى.
وسىعان بايلانىستى تۇرعىنداردىڭ تۋىن ىنتالاندىرۋ, مەكتەپكە دەيىنگى جانە جالپى ءبىلىم بەرەتىن مەكەمەلەردە ورىن جەتىسپەۋشىلىكتى قىسقارتۋ, ءولىمدى ازايتۋ, سونىڭ ىشىندە انا مەن نارەستەلەر ءولىمىن ازايتۋ, نەكە مەن وتباسى ينستيتۋتىن نىعايتۋ, قازاقستاندىقتار ءومىرىنىڭ ۇزاقتىعىن ارتتىرۋ, كوشىپ كەلۋ ساياساتىن ءتيىمدى جۇرگىزۋ وسى سالاداعى باسىم باعىتتار بولىپ تابىلادى.
سونداي-اق ەلگە قىلمىستىق جانە ەكسترەميستىك توپتاردىڭ كىرىپ كەتۋىنىڭ الدىن الۋ جانە كوشى-قون باقىلاۋىن كۇشەيتۋ جونىندەگى شارالار قارالدى.
پرەزيدەنت تۋىنداعان ىشكى كوشى-قون ماسەلەسىن ۇكىمەتتىك دەڭگەيدە شەشۋ قاجەتتىگىنە نازار اۋداردى.
ەكىنشى ماسەلەگە قاتىستى نۇرسۇلتان نازارباەۆ قازاقستاندا قوعام دىننەن بولەكتەنبەگەنىن, سوندىقتان مەملەكەت وسى سالاداعى قوعامدىق قاتىناستاردى رەتتەۋدەن قالىس قالا المايتىنىن اتاپ ءوتتى. وسى رەتتە ءدىني سەنىم قوعامنىڭ رۋحاني قۇندىلىعىن دامىتۋ, قازاقستاندىق ءپاتريوتيزمدى, ۇلتارالىق جانە كونفەسسياارالىق كەلىسىمدى نىعايتۋ, ءدىني ەكسترەميزمنىڭ الدىن الۋ ءۇشىن پايدالانۋعا قاجەتتى وراسان گۋمانيتارلىق الەۋەتكە يە جانە ادامگەرشىلىك باستاۋلارعا نەگىزدەلەتىنىن ەسكەرۋ ماڭىزدى.
وتىرىستىڭ قورىتىندىسى بويىنشا پرەزيدەنت ۇكىمەتكە جانە ءتيىستى مەملەكەتتىك ورگاندارعا بارلىق قابىلدانعان شەشىمدى ورىنداۋدى قامتاماسىز ەتۋ تۋرالى تاپسىرما بەردى.