بيىل باستالعان جىلدىق 4 پايىزبەن اۆتونەسيە بەرۋ باعدارلاماسى 2023 جىلعى قاڭتاردىڭ ەكىنشى جارتىسىندا قايتا جالعاسادى. جەڭىلدەتىلگەن نەسيە بەرۋ جوباسى رەۆولۆەرلىك مەحانيزم نەگىزىندە جۇزەگە اسىرىلماق. قازاقستان دامۋ بانكى حابارلاعانداي, باعدارلاماعا قاتىساتىن ەكىنشى دەڭگەيلى بانكتەر قازىر قارىزدى اي سايىن تولەپ وتىرعان تۇرعىنداردان تۇسكەن تولەمدى جيناقتاپ جاتىر.
ەكى باعدارلاما بويىنشا 13 ملرد تەڭگە كولەمىندە قاراجات جينالادى, بۇل كەمىندە 1 300 جاڭا اۆتونەسيە بەرۋگە جەتەدى.
«ازاماتتارعا ىڭعايلى ءارى ءادىل بولۋ ءۇشىن جانە حالىقتى كوبىرەك قامتۋ ماقساتىندا قولدانىستاعى ەكى باعدارلامانىڭ ۇزدىك وپتسياسى قولدانىلادى. بۇل قاراجات كوزىن بىرىكتىرىپ, تۇرعىنداردىڭ ەلىمىزدە شىققان جاڭا اۆتوكولىكتى بىرىڭعاي جانە اشىق ەرەجە بويىنشا ساتىپ الۋىنا مۇمكىندىك بەرەدى», دەلىنگەن قازاقستان دامۋ بانكىنىڭ حابارلاماسىندا.
سونداي-اق ورتالىقتان باقىلاۋدى قامتاماسىز ەتۋ ءۇشىن بۇدان بىلاي باعدارلاما بويىنشا قاراجاتتىڭ ءبىر عانا وپەراتورى رەتىندە دامۋ بانكىن قالدىرۋ جوسپارلانىپ وتىر. قازىر اۆتونەسيە وپەراتورى – قدب مەن «ونەركاسىپتى دامىتۋ قورى» اق.
بانك تاراتقان اقپاراتقا سۇيەنسەك, 2022 جىلعى 1 جەلتوقسانعا دەيىن قازاقستاندا بانكتەر 14 مىڭنان اسا پايىزى تومەن نەسيەنى ماقۇلدادى, ونىڭ ىشىندە 12,5 مىڭنان اسا جاڭا ماشينا بەرىلدى. اۆتونەسيەنىڭ ورتاشا باعاسى 7,8 ملن تەڭگە بولدى. باعدارلاماعا Halyk Bank, ForteBank, «بانك تسەنتركرەديت» جانە «ەۋرازيالىق بانك» قاتىسىپ جاتىر. اتالعان بانكتەرگە الدىن الا بەرگەن ءوتىنىشى ماقۇلدانعان ازاماتتار كولىگى كەلگەندە نەسيە راسىمدەيدى.