سەمەي كۇنباعىس مايىن ەكسپورتقا شىعارادى

رەسپۋبليكاداعى ەڭ ءىرى ماي زاۋىتى سانالاتىن ءوندىرىس ورنىندا ۇلتتىق ەكونوميكا ءمينيسترى الىبەك قۋانتىروۆ, «بايتەرەك» حولدينگى باسقارما توراعاسىنىڭ ورىنباسارى نۇربولات ايداپ­كەلوۆ, «اگرارلىق نەسيە كورپوراتسياسى» اق باسقارما توراعاسى المات اشىربەكوۆ بولىپ, نىسان جۇمىسىمەن تانىستى.

كۇنباعىس مايى زاۋىتى بىلتىر شىلدە ايىندا اشىلعان. تاۋلىگىنە 1 مىڭ توننا كۇنباعىس داقىلىن وڭدەيتىن مۇمكىندىگى بار. ءوندىرىس كولەمى كۇننەن كۇن­گە ارتىپ كەلەدى. بىلتىر مۇن­دا 160 مىڭ توننا داقىل وڭ­دەلسە, بيىل جىل سوڭىنا دەيىن بۇل كورسەتكىشتى 240 مىڭ تون­نا­عا جەتكىزۋ جوسپارلانعان. ال وڭ­دەلگەن داقىلدان بيىل 9 ايدىڭ ىشىندە 55 مىڭ توننا تازار­تىل­ماعان ماي جانە 45 مىڭ توننا شروت الىندى.

زاۋىت جوباسىنىڭ جالپى قۇنى – 7,4 ملرد تەڭگە. ونىڭ 5,9 ملرد تەڭگەسىن اگرارلىق نەسيە كورپوراتسياسى قارجىلاندىرعان. «Qazaq Astyk Group» جشس نەسيەنى «اگرو­بيزنەس» باعدارلاماسى بو­يىنشا الىپ وتىر. ءارى باستاپقى ەكى جىل تولەمنەن بوساتىلعان.

– كورپوراتسيادان جەڭىلدە­تىل­گەن شارتتارمەن نەسيە رەسىمدەپ, بۇل قارجىعا قىمبات جابدىقتار الدىق. جەڭىل دەپ وتىرعانىم, نەسيەنىڭ تولەم بويىنشا كانيكۋلى بار. بۇل بىزگە ۇلكەن كومەك بولدى. بۇگىندە سونىڭ ناتيجەسىن كورىپ وتىرمىز, – دەيدى «Qazaq Astyk Group» كومپانياسىنىڭ كوممەرتسيالىق ىستەر جونىندەگى ديرەكتورى الەكساندر بۋجەنيتسا.

كاسىپورىندا قازىر 200 ادام ەڭبەك ەتەدى. تازارتىلماعان ماي اباي وبلىسىنان بولەك, پاۆ­لو­دار, قوستاناي وڭىرلەرىنە, ال­ماتى قالاسىنا جونەلتىلىپ جا­تىر. سونىمەن قاتار قىتاي, وز­بەك­ستان, ازەربايجان سەكىلدى شەتەل نارىعىنا دا جول اشىلدى. بىراق «Qazaq Astyk Group» زاۋىتى باس ديرەكتورىنىڭ ورىنباسارى ماقسات قۇلتۇرىكمەنوۆتىڭ ايتۋىنشا, ءونىمدى ىشكى نارىققا تاراتىپ, ەكسپورتقا شىعارۋ جا­يى قيىندىق تۋىپ تۇر. سەبەبى تەمىرجولدا بوس جۇك ۆاگوندارى جوق. ماسەلە بيىك مىنبەرلەردەن بىرنەشە مارتە كوتەرىلگەنىمەن, ازىرگە شەشىمى تابىلماعان. زاۋىت وكىلى شيكىزات جەتىسپەۋشىلىگى پروبلەماسى بارىن دا جاسىرمادى.

– ەلدە ماي شىعاراتىن زاۋىت­تاردىڭ جيىنتىق قۋاتى – 3 ملن توننا كۇنباعىس داقىلىن وڭدەۋگە جەتسە, وسىرىلەتىن داقىل كولەمى 1 ملن توننادان اسپايدى. ءارى كۇنباعىس وسىرۋشىلەر شيكىزاتتى قىتايعا ساتۋدى ءجون سانايدى. ءبىز قازىر شيكىزاتتى ەل ىشىنەن جانە رەسەيدەن ساتىپ الىپ ءجۇرمىز, – دەيدى «Qazaq Astyk Group» زاۋىتى باس ديرەكتورىنىڭ ورىنباسارى ماقسات قۇلتۇرىكمەنوۆ.

زاۋىت باسشىلىعى ۇلتتىق ەكو­نوميكا مينيسترىنە بۇل ماسە­لەلەردى ەسكەرىپ, شيكىزاتتى ەل ىشىن­دە وڭدەۋدى, كەيىن دايىن ءونىم كۇيىندە سىرتقى نارىققا شى­عارۋدى قالايتىنىن جەتكىزدى. الىبەك قۋانتىروۆ بۇل رەتتە شيكى­زات ەكسپورتتاۋشىلاردىڭ مۇددەسىن دە ەسكەرۋ قاجەت ەكەنىن اتاپ ءوتتى.

– ەلدە اۋىل شارۋاشىلىعى ءونىمىن وڭدەۋ مەن ءوندىرۋدى ءتيىستى مەملەكەتتىك سۋبسيديالار ەسەبىنەن دە دامىتۋ قاجەت. ال ءونىم تاسىمالىنا قاتىستى ايتار بولسام, بۇل باسەكەلى نارىق, سوندىقتان كاسىپورىن كولىك كومپانيالارىمەن ءوزى كەلىسۋى كەرەك, – دەيدى ۇلتتىق ەكونوميكا ءمينيسترى الىبەك قۋانتىروۆ.

كۇنباعىس مايى زاۋىتى اگرار­لىق نەسيە كورپوراتسياسى قولداپ وتىرعان جوبالاردىڭ ءبىرى عانا.

– كەيىنگى جەتى جىلدىڭ ىشىندە قارجى ۇيىمى اباي وبلىسىنىڭ اۋداندارى بويىنشا جالپى قۇنى 20 ملرد تەڭگە بولاتىن 15 ءىرى ينۆەستيتسيالىق جوبانى جۇزەگە اسىرعان. بۇل – مال بورداقىلاۋ الاڭدارىن قۇرۋ, ەت-ءسۇت وڭدەۋ كەشەندەرى, تاۋارلى-ءسۇت فەرمالارىن دامىتۋ, اسىل تۇقىمدى شارۋاشىلىقتار جەلىسىن قۇرۋ سەكىلدى ەلىمىزدىڭ اگروونەركاسىپ كەشەنىنىڭ دامۋىنا سەرپىن بەرەتىن جوبالار, – دەيدى «اگرارلىق نەسيە كورپوراتسياسى» اق باسقارما توراعاسى المات اشىربەكوۆ.

بۇدان بولەك, 9 نەسيە سەرىك­تەستىگىن قارجىلاندىرۋ ارقىلى اباي وبلىسىندا 900-گە جۋىق شارۋا ءتيىمدى نەسيەگە قول جەتكى­زىپ وتىر. جالپى, ايماقتا «كەڭ دالا», «اگروبيزنەس» جانە «ىسكەر» باعدارلامالارى بويىنشا بيىل 3,3 ملرد تەڭگەنىڭ 186 جوباسى قارجىلاندىرىلدى.

ەندى وڭىردە كاسىبىن دوڭگەلەتىپ جۇرگەن كاسىپكەرلەر ءۇشىن ءتيىمدى نەسيەگە ءوتىنىم بەرۋ جەڭىلدەي تۇس­پەك. جاقىندا سەمەيدە اگرار­لىق نەسيە كورپوراتسياسىنىڭ اباي وبلىسىنداعى فيليالى اشىل­دى. بۇل اباي, بەسقاراعاي, بورودۋليحا اۋداندارىنىڭ شارۋالارى ءۇشىن جولدى قىسقارتىپ, ۋاقىت ۇنەمدەۋگە جانە بيزنەس پروتسەستەرىن جىلدامداتۋعا مۇم­كىندىك بەرەدى.

وسىلايشا, بۇگىنگى تاڭدا كور­پوراتسيانىڭ 16 وبلىستىق جانە 3 قالالىق فيليالى ورتالىق اپ­­پاراتپەن بىرلەسىپ 80 مىڭعا جۋىق اۋىل شارۋاشىلىعى تا­ۋار وندىرۋشىگە قىزمەت كورسە­تە­دى. بيىل 15 مىڭعا جۋىق قازاق­ستاندىق شارۋالار 350 ملرد تەڭ­گەگە قارجىلاندىرىلعان.

«اگرارلىق نەسيە كورپورا­تسياسى» اق – «بايتەرەك» ۇلتتىق باسقارۋشى حولدينگىنىڭ ەنشىلەس ۇيىمى. 2001 جىلدان باستاپ اگرو­بيزنەستى دامىتۋ ءۇشىن ءتيىمدى شارتپەن جەڭىلدەتىلگەن نەسيە بەرىپ كەلەدى. نەسيەلەۋ باعدارلامالارى تۋرالى agrocredit.kz سايتىنان وقۋعا بولادى.

ءساتجان كارىپباەۆ