شەتەلدەن قانشا قاراجات قايتارىلدى؟

«ارنايى كوميسسيا جۇمىس ىستەگەن ۋاقىت ىشىندە مەملەكەتكە 631 ملرد تەڭگە, ونىڭ ىشىندە قىلمىستىق قۋدالاۋ شەڭبەرىندە 400 ملن دوللار قايتارىلدى», دەدى تيمۋر تاشىمباەۆ.

سپيكەردىڭ ايتۋىنشا, وليگوپوليالاردىڭ يەلىگىنەن 6,5 ملرد تەڭگەدەن استام سوماعا 398 مىڭ گا جەر قايتارىلعان.

جوعارعى سوت باس پروكۋروردىڭ نارازىلىقتارى بويىنشا بۇرىن وليگوپوليا سۋبەكتىلەرىنىڭ پايداسىنا شىعارىلعان 17 سوت اكتىسىنىڭ كۇشىن جويدى.

بۇل 600-دەن استام كىرمە تەمىرجول جولدارىن قايتارۋعا, جول ءجۇرۋ تاريفتەرىن تومەندەتۋگە, مەملەكەت مۇددەلەرىن 21,1 ملرد تەڭگەگە قورعاۋعا مۇمكىندىك بەردى.

سونداي-اق پروكۋروردىڭ زاڭسىز يەلىكتەن شىعارىلعان مەملەكەتتىك مەنشىك وبەكتىلەرىن قايتارۋ تۋرالى 6 تالابى قاناعاتتاندىرىلدى.

جالپى سوماسى 13,7 ملرد تەڭگەگە تاعى 20 نارازىلىق پەن تالاپ-ارىز قارالىپ جاتىر.