سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2022 جىلعى 22 جەلتوقساندا وتەتىن سەنات وتىرىسىنىڭ كۇن ءتارتىبىن ايقىندادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
الداعى پالاتا وتىرىسىندا «اگلومەراتسيالاردى دامىتۋ تۋرالى», «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگلومەراتسيالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «وسىمدىكتەر دۇنيەسى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر دۇنيەسى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى قارالادى.
«اگلومەراتسيالاردى دامىتۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگلومەراتسيالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوبالارى مەملەكەت باسشىسىنىڭ 2021 جىلعى 1 قىركۇيەكتەگى تاپسىرمالارىن ورىنداۋ ماقساتىمەن ازىرلەندى. جاڭا نورمالار اگلومەراتسيالاردى قالىپتاستىرۋعا جانە دامىتۋعا قاجەتتى قۇقىقتىق جاعداي جاساۋدى كوزدەيدى. وسى زاڭ جوبالارىن قابىلداۋ وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارىنىڭ قالا قۇرىلىسىن جوسپارلاۋ, كولىك ينفراقۇرىلىمىن جوسپارلاۋ, ساۋلەت جانە قۇرىلىس قىزمەتى, سونداي-اق بيۋدجەتتىك پروتسەستەردى ىسكە اسىرۋ سالاسىنداعى وكىلەتتىكتەرىن كەڭەيتۋگە مۇمكىندىك بەرەدى.
«وسىمدىكتەر دۇنيەسى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر دۇنيەسى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنىڭ نەگىزگى ماقساتى – وسىمدىكتەر دۇنيەسىن قورعاۋ, قالپىنا كەلتىرۋ جانە ولاردى پايدالانۋ سالاسىنداعى قاتىناستاردى رەتتەۋدى قامتاماسىز ەتۋ, سونداي-اق, تابيعي ارتۇرلىلىكتى جانە وسىمدىكتەردىڭ جابايى تۇرلەرىنىڭ گەنوفوندىن ساقتاۋ, ولاردى ۇتىمدى پايدالانۋ ءۇشىن قۇقىقتىق نەگىز قالىپتاستىرۋ.
سونىمەن قاتار سەناتورلار بەيسەنبىدە وتەتىن وتىرىستا پالاتا رەگلامەنتىنە ەنگىزىلەتىن وزگەرىستەر تۋرالى ماسەلەنى قارايدى.
سونداي-اق بيۋرو وتىرىسىندا كەلەسى سەنات وتىرىستارى 26 جانە 29 جەلتوقسان كۇندەرى وتەتىنى بەلگىلى بولدى.
ودان بولەك, وتىرىس بارىسىندا ماجىلىستەن كەلىپ تۇسكەن زاڭ جوبالارى جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.