بۇگىندە ۇجىمدى باسقارۋ, ەڭبەك شارتى مەن ىشكى قىزمەتتى ۇيلەستىرۋ زامان تالابىنا ساي كۇردەلەنە ءتۇستى. ويتكەنى بۇل باعىت ستراتەگيالىق باسقارۋدى تالاپ ەتەدى. ال مۇنداي جەتەكشىلىكتى كەز كەلگەن ۇيىم, مەكەمە ۇيىمداستىرا الا ما؟ ءبىرىنشى باسشى قانداي بولۋى كەرەك؟ وسى سەكىلدى سۇراقتار توڭىرەگىندە پرەزيدەنت جانىنداعى مەملەكەتتىك باسقارۋ اكادەمياسىندا وتكەن HR فورۋمدا وتاندىق جانە شەتەلدىك ساراپشىلار ءوزارا تاجىريبەمەن ءبولىستى.
فورۋمدا ساراپشىلار مەملەكەتتىك قىزمەتتەگى HR ماسەلەسىن, ونىڭ ىشىندە پەرسونالدى ستراتەگيالىق باسقارۋعا كوشۋدىڭ تەتىكتەرىن ءسوز ەتتى.
– قازىر مەملەكەتتىك قىزمەتكە ورنالاسۋ كونكۋرستارىنىڭ ادىلدىگىن قامتاماسىز ەتۋ ءۇشىن «ە-قىزمەت» اقپاراتتىق جۇيەسىنىڭ سىرتقى پورتالىندا مەملەكەتتىك قىزمەتكە جاڭا ىرىكتەۋ الگوريتمى ازىرلەنىپ, كونكۋرستىق ءراسىمدى وتكىزۋ فورماتى قايتا قارالدى. كونكۋرستىق ءراسىمنىڭ جاڭا فورماتى ۇمىتكەرلەرگە الدىن الا بەلگىلەنگەن ۋاقىتتا وتەتىن اڭگىمەلەسۋدەن باسقا, بارلىق كەزەڭدە, ۋاقىتتا جانە الەمنىڭ كەز كەلگەن جەرىنەن كونكۋرسقا قاتىسۋعا مۇمكىندىك بەرەدى. ىرىكتەۋدىڭ بۇل تاسىلدەرىن 2023 جىلى «ە-قىزمەت» اقپاراتتىق جۇيەسىندە قاناتقاقتى اپروباتسيادان وتكىزۋ جوسپارلانىپ وتىر, – دەدى مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ.
قازىر ەلىمىز HR ماماندارىن دايارلاۋعا دەن قويعان. مەملەكەتتىك قىزمەت ىستەرى اگەنتتىگىنىڭ مالىمەتىنشە, قازاقستاندا 15 جوعارى وقۋ ورنى وسى سالا بويىنشا مامان دايارلايدى. سونىڭ ىشىندە باكالاۆر – 8, ماگيستراتۋرا دەڭگەيىندە 10 ءبىلىم باعدارلاماسى بار.
ازەربايجان مەملەكەتتىك ەمتيحان ورتالىعى توراعاسىنىڭ ورىنباسارى باحرام ءحاليلوۆتىڭ ايتۋىنشا, بۇل ەلدە مەملەكەتتىك قىزمەتكە قابىلداناتىن ۇمىتكەردىڭ بىلىكتىلىگىنە باستى نازار اۋدارىلادى.
– ءدال قازىر ءبىز مەملەكەتتىك قىزمەتتىڭ قۇزىرەتتىلىك مودەلىنە ءوتۋ ماسەلەسىن قاراستىرىپ جاتىرمىز. بۇعان دەيىن بەلگيانىڭ تاجىريبەسىن زەرتتەدىك. ولاردا دا بۇل سالادا پروبلەما بار. ءبىز الدىمەن HR باسقارمالارىنىڭ باسشىلارىنان باستادىق. ولارعا ارناپ ترەنينگتەر, ءتۇسىندىرۋ جۇمىستارىن جۇرگىزدىك. بارلىق مينيسترلىكتەگى قىزمەتكەرلەرمەن سۇحبات وتكىزىپ, ولارعا قانداي قۇزىرەتتىلىك قاجەت ەكەنىن بايقاۋعا تىرىستىق. قۇزىرەتتىلىك وتە كوپ ەكەن, ءبىز وتىزعا جۋىق قۇزىرەتتىلىكتى انىقتادىق. بازالىق قۇزىرەتتىلىكتەردى تەست ارقىلى انىقتاۋعا بولادى. ال كەيبىر قۇزىرەتتەردى بەتپە-بەت اڭگىمەلەسۋ ارقىلى عانا باعالاۋعا بولادى, – دەدى ب. حاليلوۆ.
ال استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ باسشى لاۋازىمدارعا ىرىكتەۋ بارىسىندا ادامداردى تىڭداي ءبىلۋ, كوممۋنيكاتسيالىق قابىلەتتەر, ارىپتەستىك ورناتۋ, كرەاتيۆتى ويلاۋ, كەي ۋاقىتتاردا بۇقارا الدىندا سويلەۋ قابىلەتىن انىقتاۋ ماڭىزدى دەپ سانايدى.
– مەملەكەتتىك قىزمەتشىلەر قىزمەتىنىڭ ساپاسىنا كورپوراتيۆتىك مادەنيەت پەن ورتا ەرەكشە ىقپال ەتەدى. ادامي رەسۋرستاردىڭ ادامي كاپيتالعا اينالۋى ءۇشىن دۇرىس قۇندىلىقتار, ۇلگىلى قارىم-قاتىناس جانە ىنتا بولۋى قاجەت. ءار باسشىنىڭ ءوز قاراماعىنداعى ازاماتتارمەن جالپى ازاماتتاردىڭ ەڭبەگىن, ۋاقىتىن, ابىرويىن جانە حاقىن قادىرلەيتىن قۇندىلىقتار بولۋى قاجەت. بۇل ولاردىڭ ءبىلىم-بىلىكتىلىگىن جانە الەۋەتىن اشۋعا تولىق مۇمكىندىك بەرەدى, – دەدى ءا.بايمەنوۆ.
كورەيا بولسا بۇگىنگى تاڭدا پەرسونالدى باسقارۋدىڭ ەلەكتروندىق جۇيەسىنە (e-Saram) كوشكەن. سونداي-اق ولار ادام رەسۋرستارىن دامىتۋعا كوبىرەك كوڭىل بولەدى. قىزمەتكەرلەرى ۇنەمى ءتۇرلى ترەنينگتەردە, ەلەكتروندى وقىتۋ كۋرستارىندا بىلىكتىلىكتەرىن ارتتىرادى, ولارعا توك-شوۋ فورماتىندا تالقىلاۋ, پىكىرلەسۋ الاڭى ۇيىمداستىرىلادى. بۇعان قوسا پرواكتيۆتى باسقارۋدى قولعا العان.
– پرواكتيۆتى باسقارۋدىڭ قىزمەتكەر ءۇشىن ماڭىزى وتە زور. ويتكەنى ءبىز ولارعا قارجىلىق قولداۋ كورسەتەمىز. ماسەلەن, ءبىر قىزمەتكەردىڭ باسىنا ءىس تۇسسە, ولارعا قورعان بولۋعا تىرىسامىز. سوت ۇدەرىسى بولا قالعان جاعدايدا ونىڭ شىعىندارىن وتەپ بەرەمىز. ءار قىزمەتكەرگە جىل سايىن 70 مىڭ دوللارعا دەيىن قارجى بولەمىز, – دەدى كورەيا رەسپۋبليكاسى ادامي رەسۋرستاردى دامىتۋ ۇلتتىق ينستيتۋتى عىلىمي-زەرتتەۋ ورتالىعىنىڭ باس ديرەكتورى چۋن دجي يۋن.
جالپى, فورۋمعا 7 ەلدەن كەلگەن سپيكەرلەر مەن بارلىعى 300-دەن استام ادام قاتىستى.
– فورۋم بارىسىندا كوتەرىلگەن باستى سۇراقتاردىڭ ءبىرى – بۇگىنگى كۇنى مەملەكەتتىك قىزمەتشىلەردىڭ دەڭگەيى قانداي؟ قوعامنىڭ تالاپتارىنا جاۋاپ بەرە مە؟ بۇل ماسەلە مەملەكەت باسشىسىنىڭ جولداۋلارىندا دا ايتىلعان ەدى. فورۋم وسى سۇراقتارعا جاۋاپ بەردى دەپ ويلايمىن. مەملەكەتتىك قىزمەتشىلەردىڭ بىلىكتىلىگىن كوتەرۋ جانە حالىقتىڭ ۇنىنە قۇلاق اساتىن اپپاراتتى قۇرۋ جولدارى ايقىندالۋعا ءتيىس. ارينە, تالقىلانعان ماسەلەلەر ءبىر كۇننىڭ ىشىندە شەشىمىن تاپپاسا دا, الداعى ۋاقىتتا ناقتى قادامدارعا الىپ كەلەرى انىق. سونىمەن قاتار ءار مەملەكەتتىك قىزمەتشى ءوزىنىڭ بىلىكتىلىگىن قاشاندا ارتتىرىپ تۇرۋعا ءتيىس دەپ سانايمىن. بۇل تۇستا, مەملەكەتتىك قىزمەت ىستەرى اگەنتتىگى مەن اكادەميا تاراپىنان وتە كوپ باستامالار قولعا الىندى, – دەدى ءىس-شارانى قورىتىندىلاعان پرەزيدەنت جانىنداعى مەملەكەتتىك باسقارۋ اكادەمياسىنىڭ ۆيتسە-رەكتورى ەركىن ءدۇسىپوۆ.