قارجى نارىعىنداعى احۋال

تەڭگە-دوللار ۆاليۋتا جۇبى بويىنشا وپەراتسيالاردىڭ جالپى كولەمى ءبىر ايدا 5,7%-عا تومەندەگەن (جىلدىق ماندە 13,2%-عا). ونىڭ ىشىندە قا­زاق­ستان قور بيرجاسىنداعى بير­جالىق ساۋدا-ساتتىق كولەمى ايلىق ديناميكادا 20,6%-عا ءوسىپ, جىلدىق كورسەتكىشتە 10,3%-عا تومەندەپتى. حالىق تاراپىنان شەتەل ۆاليۋتاسىنا سۇرانىس ارتقان. قازاندا شەتەل ۆاليۋتاسىن نەتتو-ساتىپ الۋ 29,8%-عا ءوستى. بۇل رەتتە جىلدىق ماندەگى نەتتو-سا­تىپ الۋدىڭ جالپى كولەمى ايتارلىقتاي دارەجەدە رۋبل مەن ەۋرونى نەتتو-ساتىپ الۋ­دىڭ تومەندەۋى ەسەبىنەن 36,9%-عا تومەندەگەن.

قازان ايىندا ۇلتتىق بانك­تىڭ جالپى حالىقارالىق رە­زەرۆتەرى 1,0%-عا ۇلعايىپ, 33,0 ملرد دوللار بولدى. قازان­نىڭ سوڭىندا ۇلتتىق قور­دىڭ شەتەل ۆاليۋتاسىنداعى اك­تيۆتەرىن (52,4 ملرد دوللار) قوسا العاندا, ەلدىڭ جالپى حالىقارالىق رەزەرۆتەرى 85,4 ملرد دوللارعا جەتتى. وتكەن ايدا بانكتەگى دەپوزيت كولەمىنىڭ وسۋىنە بايلانىستى اقشا بازاسى 12 374,4 ملرد تەڭگە, 4,2 پايىزعا دەيىن اۋقىمدى بولا ءتۇستى. اقشا ماسساسى 33 311,6 ملرد تەڭگە بو­­لىپتى. اقشا ماسساسىنىڭ وسى­مىنە سەبەپ – جەكە تۇلعالار نەسيەسى مەن يپوتەكا كولەمىنىڭ ارتۋى.

كۇزدىڭ ەكىنشى ايىندا زاڭ­دى تۇل­عا دەپوزيتتەرى 4,1 پا­يىزعا, جە­كە تۇلعا سالىمدا­رى 1,5 پايىزعا ۇلعايعان. سا­­لىم­داردا تەڭگەنىڭ ۇلەسى باسىم, تيىسىنشە ونىڭ كوپ بولىگىن زاڭدى تۇلعالار قويعان. كولەمى – 19,4 ترلن تەڭگە. بازالىق مولشەرلەمە بويىنشا قابىلدانعان شەشىمدەر (16 پايىزعا دەيىن جوعارىلاۋى) جاعدايىندا بانكتىك ەمەس زاڭدى تۇلعالاردىڭ تەڭگەدەگى مەرزىمدى دەپوزيتتەرى بويىنشا ورتاشا الىنعان سىياقى مولشەرلەمەسى 2022 جىلعى قازاندا 13,6%-عا دەيىن (2021 جىلعى قازاندا – 7,5%), جەكە تۇلعالاردىڭ دەپوزيتتەرى بويىنشا 12,6%-عا دەيىن (8,4%) كوتەرىلدى.

قازاندا ەكىنشى دەڭگەيلى بانكتەردىڭ ەكونوميكاعا بەرگەن نەسيە كولەمى 21 481,0 ملرد تەڭگەگە جەتتى. ءبىر اي ىشىندە جەكە تۇلعالارعا قارىز بەرۋ 2,4 پا­يىزعا ءوستى. سونىڭ ىشىندە تۇتىنۋشىلىق نەسيە كولەمى – 7 302,1 ملرد تەڭگە.

«دەگەنمەن حالىقتىڭ جوعا­رى ينفلياتسيالىق كۇتۋلەرى تۇتىنۋشىلىق نەسيە بەرۋ­دىڭ ايتارلىقتاي ۇلعايۋ قارقى­نى­نىڭ ساقتالۋىنا ىقپال ەتەدى. قازاندا تۇرعىن ءۇيدى جالداۋ اقىسىنىڭ ايتارلىقتاي كوتە­رىلۋى جانە «7-20-25» باع­دار­لاماسى شەڭبەرىندە قارا­جات­تىڭ بەلسەندى يگەرىلۋى اياسىندا يپوتەكالىق نەسيەنىڭ ءوسۋ قارقىنى جوعارى بولدى (جىلدىق ماندە – 47,1%, اي­لىق ماندە – 3,9%, كولەمى – 4 443,3 ملرد تەڭگە). ۇلتتىق ۆاليۋتاداعى كرەديت كولەمى 19 723,7 ملرد تەڭگەگە دەيىن, اي­لىق ماندە 2,0%-عا ۇلعايدى. ولاردىڭ قۇرىلىمىندا زاڭدى تۇلعالارعا بەرىلگەن كرەديتتەر – 6 352,1 ملرد تەڭگەگە دەيىن, 1,1%-عا, جەكە تۇلعالارعا بە­رىل­گەن كرەديتتەر – 13 371,6 ملرد تەڭگەگە دەيىن, 2,4%-عا ءوستى. شەتەل ۆاليۋتاسىنداعى كرەديتتەردىڭ كولەمى 1 757,3 ملرد تەڭگەگە دەيىن, 0,7%-عا, ونىڭ ىشىندە ۆاليۋتالىق قايتا باعالاۋ ەسەبىنەن تومەندەدى», دەلىنەدى ۇلتتىق بانك حابارلاماسىندا.

ەل اۋماعىندا 19 تولەم جۇيەسى جۇمىس ىستەيدى. قازاندا ۇلت­تىق بانك تولەم جۇيەلەرى (بان­كارالىق اقشا اۋدارۋ جۇ­يە­­سى جانە بانكارالىق كليرينگ جۇيەسى) ارقىلى 66,3 ترلن تەڭگە سوماسىنا 5,3 ملن ترانز­اكتسيا جۇرگىزىلگەن. ورتاشا العاندا ءبىر كۇندە اتالعان تولەم جۇيەلەرى ارقىلى 3,3 ترلن تەڭگە سوماسىنا 265,4 مىڭ ترانزاكتسيا جاسالدى. 1 قاراشاداعى جاعداي بويىنشا 18 بانك جانە «قازپوشتا» اق تولەم كارتوچكالارىن شى­عار­دى. ەميسسيالانعان جانە تاراتىلعان تولەم كارتوچ­كا­لا­رىنىڭ جالپى سانى 63,6 ملن بىرلىك بولدى. ونىڭ ىشىندە 2022 جىلعى قازاندا تولەم كارتوچكالارىنىڭ 50,7%-ى (32,2 ملن تولەم كارتوچكاسى) قولما-قول اقشاسىز وپەراتسيالاردى جانە قولما-قول اقشانى الۋ وپەراتسيالارىن جۇرگىزۋ ءۇشىن پايدالانىلعان.

«سالىمشىلاردىڭ زەي­نەت­اقى جيناقتارى قازاندا 41,7 ملرد تەڭگەگە نەمەسە 0,3%-عا ۇل­عايىپ, 14 145,8 ملرد تەڭگە بولعان. زەينەتاقى اك­تيۆ­تەرىن ينۆەستيتسيالاۋدان تۇسكەن تازا كىرىس 1 قاراشادا 7 557,6 ملرد تەڭگەگە دەيىن 70,8 ملرد تەڭگەگە ازايدى. مىن­دەت­تى زەينەتاقى جارنالارى بويىنشا سالىمشىلاردىڭ جەكە زەينەتاقى شوتتارىنىڭ سانى (زەينەتاقى جيناقتارى جوق جزش-نى ەسكەرگەندە) 2022 جىلعى 1 قاراشادا 10,9 ملن شوت بولدى. زەينەتاقى تولەمدەرىنىڭ سوماسى 31,5 ملرد تەڭگەنى قۇرادى», دەپ اقپارات بەرەدى ۇلتتىق بانك.

ماكروەكونوميكالىق شولۋ اياسىندا كاسىپورىندارعا مونيتورينگ جۇرگىزىلگەن. ونىڭ قورىتىندىسى بويىنشا, ناقتى سەكتورداعى ەكونوميكالىق بەل­سەندىلىكتىڭ ءوسۋ قارقىنىنىڭ باياۋلاعانى بايقالعان. دايىن ونىمگە سۇرانىس ارتىپ, وندى­رىستىك قۋات جۇكتەمەسىنىڭ جانە دايىن ءونىم ءوندىرىسى كولەمى ازداپ ۇلعايعان.

قازاقستان ەكونوميكاسىنىڭ جاي-كۇيى كاسىپورىنداردىڭ 35,6%-ى ءۇشىن بيزنەستى جۇر­گى­زۋگە ءالى دە نەگىزگى كەدەر­گى بولىپ وتىر. ۇلتتىق بانك حا­بار­لاۋىنشا, ودان وزگە كەدەر­گىلەر رەتىندە – نارىقتىق باسە­­كەلەستىك (28,7%), سالىق اۋىرت­­پالىعىنىڭ دەڭگەيى جانە سا­تىپ الۋشىلاردى ىزدەۋ (23,4%), بىلىكتى كادر­لار­دىڭ جە­تىسپەۋشىلىگى (22,3%), دەبي­تور­لىق بەرەشەكتى قايتارۋ كۇر­دەلىلىگى (13,4%), قارجى­لان­دى­رۋعا قولجەتىمدىلىك اتالادى.