توقاەۆ پەن ماكروننىڭ بىرلەسكەن مالىمدەمەسى جاريالاندى

1. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ فرانتسۋز رەسپۋبليكاسىنىڭ پرەزيدەنتى ەممانيۋەل ماكروننىڭ شاقىرۋىمەن 2022 جىلعى 29-30 قاراشادا فرانتسياعا رەسمي ساپار جاسادى.

2. مەملەكەت باسشىلارى 2008 جىلعى 11 ماۋسىمداعى قازاقستان رەسپۋبليكاسى مەن فرانتسۋز رەسپۋبليكاسى اراسىنداعى ستراتەگيالىق ارىپتەستىك تۋرالى شارتتىڭ قولدانىسىن اتاپ وتە وتىرىپ, ەكى ەل اراسىنداعى بارلىق دەڭگەيدەگى سەنىمدى جانە تۇراقتى ديالوگقا قاناعاتتانۋشىلىق ءبىلدىردى. قازاقستان  ̶ فرانتسيانىڭ ورتالىق ازياداعى باستى ەكونوميكالىق ارىپتەسى, ال فرانتسيا قازاقستان ەكونوميكاسىنىڭ جەتەكشى ينۆەستورلارىنىڭ ءبىرى.

3. قازاقستان مەن فرانتسيا اراسىنداعى ديپلوماتيالىق قارىم-قاتىناستارعا 30 جىل تولىپ وتىرعان كەزەڭدە پرەزيدەنتتەر ەكى ەل اراسىنداعى ساياسي جانە ساۋدا-ەكونوميكالىق ىنتىماقتاستىقتىڭ جوعارى سەرپىنىن قۇپتادى.

4. فرانتسۋز رەسپۋبليكاسىنىڭ پرەزيدەنتى قازاقستان رەسپۋبليكاسى پرەزيدەنتىنىڭ تۇراقتىلىق پەن ورنىقتى دامۋدىڭ اينىماس شارتى بولىپ تابىلاتىن زاڭ ۇستەمدىگىن, نەگىزگى بوستاندىقتاردى جانە الەۋمەتتىك ادىلەتتىلىكتى نىعايتۋعا باعىتتالعان تەرەڭ رەفورمالار جۇرگىزۋىن قولدايتىنىن راستادى.

5. تاراپتار جاھاندىق جانە وڭىرلىك دەڭگەيدە بەيبىتشىلىكتى, قاۋىپسىزدىك پەن تۇراقتىلىقتى نىعايتۋعا ءوزارا جاردەمدەسۋ نيەتىن قۋاتتادى. ولار حالىقارالىق قۇقىق پەن بۇۇ جارعىسىنىڭ نەگىزگى قاعيداتتارىنا, اسىرەسە مەملەكەتتەردىڭ ەگەمەندىگى مەن اۋماقتىق تۇتاستىعىنا وزدەرىنىڭ مىزعىماس بەيىلدىگىن اتاپ ءوتتى. قازاقستان مەن فرانتسيا ۋكراينا توڭىرەگىندەگى جاعدايعا, ونىڭ گۋمانيتارلىق سالدارى مەن جاھاندىق ەكونوميكاعا اسەرىنە, ەڭ وسال ەلدەردىڭ ازىق-ت ۇلىك قاۋىپسىزدىگىنە قاتتى الاڭداۋدا.

6. پرەزيدەنتتەر قازاقستان رەسپۋبليكاسى مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم اياسىندا تىعىز ءوزارا ءىس-قيمىلدى جالعاستىرۋعا دايىن ەكەندىگى جونىندە مالىمدەدى. وسىعان بايلانىستى ولار 2022 جىلعى 27 قازاندا استانادا وتكەن «ەۋروپالىق وداق  ̶  ورتالىق ازيا» ءبىرىنشى ءسامميتىنىڭ وتكىزىلۋىن قۇپتادى.

7. ولار ورتالىق ازيادا ءىرى كولىكتىك باستامالاردىڭ, اتاپ ايتقاندا ترانسكاسپي حالىقارالىق كولىك باعىتىنىڭ دامۋىن قاناعاتتانا اتاپ ءوتتى. تاراپتار ەۋروپالىق وداقتىڭ «Global Gateway» جوباسىنىڭ ىسكە اسۋىنا قولداۋ ءبىلدىردى.

8. پرەزيدەنتتەر قازاقستان-فرانتسيا ىنتىماقتاستىعىنىڭ جوعارى سەرپىنىن باسا ايتتى جانە ستراتەگيالىق ارىپتەستىك رۋحىندا ونى ءارتاراپتاندىرۋدى جانە ءوزارا مۇددەلى بارلىق, اتاپ ايتقاندا ەكونوميكا جانە ينۆەستيتسيا, ءبىلىم بەرۋ, دەنساۋلىق ساقتاۋ, عىلىم جانە مادەنيەت سالالارىندا تەرەڭدەتۋدى جالعاستىرۋ تۋرالى ۋاعدالاستىققا قول جەتكىزىلدى.

9. ەكونوميكا سالاسىندا پرەزيدەنتتەر ساۋدا مەن ينۆەستيتسيانى, اسىرەسى نەگىزگى ەنەرگەتيكالىق سەكتوردا ودان ءارى دامىتۋدىڭ جوعارى الەۋەتىن اتاپ ءوتتى. قازاقستان فرانتسياعا ۋران مەن شيكى مۇنايدى نەگىزگى جەتكىزۋشىلەردىڭ ءبىرى بولىپ تابىلادى. تاراپتار اسا باعالى شيكىزات ماتەريالدارى, ونىڭ ىشىندە جەردە سيرەك كەزدەسەتىن ماتەريالدار سالاسىنداعى ءوزارا ىنتىماقتاستىقتى دامىتۋ تۋرالى ۋاعدالاستىققا قول جەتكىزدى. ساپار بارىسىندا جاڭارتىلاتىن ەنەرگيا كوزدەرى, «جاسىل سۋتەگىن» ءوندىرۋ, بەيبىت اتومدى پايدالانۋ, سۋ رەسۋرستارىن باسقارۋ, تەمىر جول كولىگى جانە اگروونەركاسىپ كەشەنى سالالارىندا بىرقاتار ەكىجاقتى قۇجاتتارعا قول قويىلدى.

10. كليماتتىق كۇن ءتارتىبىنىڭ وزەكتىلىگى تۇرعىسىندا قازاقستاندا جيناقتاۋ مۇمكىندىگىمەن بار, رەسپۋبليكانىڭ كومىرتەگىسىز يننوۆاتسيالىق ەنەرگيا كوزدەرىنە كوشۋىنە ىقپال ەتەتىن قۋاتى 1,2 گۆت جەل ەلەكتر ستانتسياسىن سالۋ بويىنشا اۋقىمدى جوبانىڭ ماڭىزى اتاپ كورسەتىلدى. بۇل جوبا كليماتتىڭ وزگەرۋىنە قارسى كۇرەس سالاسىنداعى ەكىجاقتى ىنتىماقتاستىعىمىزدىڭ نىعايۋ نىشانى.

11. پرەزيدەنتتەر ءبىلىم سالاسىنداعى ىنتىماقتاستىقتىڭ باسىمدىلىعىن اتاپ ءوتتى. ولار استانا مەن الماتىدا ەكى فرانتسۋز مەكتەبىن اشۋعا جانە دامىتۋعا قولداۋ ءبىلدىردى. ستۋدەنتتەردىڭ ۇتقىرلىعىن, اتاپ ايتقاندا «اباي-ۆەرن» باعدارلاماسى شەڭبەرىندە شاكىرتاقىلار سانىنىڭ كوبەيۋىنە جانە «بولاشاق» باعدارلاماسى بويىنشا فرانتسۋز جوعارى وقۋ ورىندارى ءتىزىمىن كەڭەيتۋ ارقاسىندا ارتتىرۋدى قولدادى. سونداي-اق سوربوننا-قازاقستان ينستيتۋتىن قايتا فورماتتاۋدى قولدايتىندىقتارىن ءبىلدىردى جانە 2022 جىلعى 30 قاراشادا پاريجدە 7-ءشى قازاقستان-فرانتسيا جوعارى ءبىلىم فورۋمىنىڭ ءوتۋىن, سونداي-اق ءبىلىم بەرۋ سالاسىنداعى بىرقاتار قۇجاتتارعا قول قويۋدى قۇپتادى.

12. دەنساۋلىق ساقتاۋ سالاسىندا ەكى ەلدىڭ جەتەكشى زەرتتەۋ جانە مەديتسينالىق ورتالىقتارى اراسىنداعى ونكولوگيا, مەديتسينالىق مەكەمەلەردى باسقارۋ جانە مەديتسينالىق قىزمەتتەر كورسەتۋ سالاسىنداعى ارىپتەستىكتى جالعاستىرۋدىڭ ماڭىزدىلىعىن راستادى.

13. پرەزيدەنتتەر مادەنيەت سالاسىنداعى ىنتىماقتاستىقتى ارتتىرۋ نيەتىن ءبىلدىردى. ولار تاياۋ جىلدارى ەكى ەل اراسىندا مادەني ءىس-شارالاردى, ونىڭ ىشىندە پاريجدە قازاقستان رەسپۋبليكاسىنىڭ ۇلتتىق كورمەسىن وتكىزۋگە باعىتتالعان باستامالاردى قۇپتادى.

14. پرەزيدەنتتەر شارم-ەل-شەيحتە وتكەن COP 27 كونفەرەنتسياسىندا كليماتتىڭ وزگەرۋىنە قارسى كۇرەستە وزدەرىنىڭ بەرىك ۇستانىمدارىن قۋاتتادى جانە 1,5° دەڭگەيىندەگى جاھاندىق جىلۋ دەڭگەيىن ۇستاۋ ماقساتىن راستاۋدى قۇپتادى.

15. قازاقستان رەسپۋبليكاسىنىڭ پرەزيدەنتى فرانتسۋز رەسپۋبليكاسىنىڭ پرەزيدەنتىنە 2024 جىلى پاريجدە وتەتىن ءحححىىى جازعى وليمپيادا ويىندارىنا دايىندىقتا تابىس تىلەدى.

16. قازاقستان رەسپۋبليكاسىنىڭ پرەزيدەنتى فرانتسۋز رەسپۋبليكاسىنىڭ پرەزيدەنتىن تاياۋ ۋاقىتتا قازاقستانعا ساپارمەن كەلۋگە شاقىردى.