پرەزيدەنت جەمقورلىققا قارسى ءىس-قيمىل شارالارىن كۇشەيتۋدى تاپسىردى

جانات ەليمانوۆ قاسىم-جومارت توقاەۆقا اگەنتتىكتىڭ بيىلعى 10 ايدا اتقارعان جۇمىستارى تۋرالى ەسەپ بەردى.  

مەملەكەت باسشىسىنا قىلمىستىق ىستەردى جاپپاي قوزعاۋ تاجىريبەسىنىڭ جويىلعانى جانە ادال بيزنەستى قىلمىستىق قۋدالاۋدىڭ ازايعانى جونىندە باياندالدى. اگەنتتىك توراعاسى سوتقا دەيىنگى تەرگەپ-تەكسەرۋ امالدارىنىڭ سانى جىل سايىن ازايىپ كەلە جاتقانىن اتاپ ءوتتى. اتاپ ايتقاندا, وتكەن جىلمەن سالىستىرعاندا تىركەلگەن ىستەر سانى 30 پايىزعا تومەندەگەن.

جانات ەليمانوۆتىڭ ايتۋىنشا, قابىلدانعان شارالار كەلتىرىلگەن شىعىنداردى وتەۋگە, 300 ميلليارد تەڭگەدەن استام اكتيۆتى قايتارۋعا, سونداي-اق 25 ۇيىمداسقان قىلمىستىق توپتىڭ جولىن كەسۋگە مۇمكىندىك بەردى. اقشانى قولما-قول شىعارۋمەن اينالىساتىن 119 توپتىڭ قىزمەتىنە توسقاۋىل قويىلدى.

بۇدان بولەك, پرەزيدەنتكە 25 قارجى پيراميداسى جويىلىپ, جابىرلەنۋشىلەردىڭ 8,3 ميلليارد تەڭگە شىعىنى وتەلگەنى حابارلاندى.

اگەنتتىك توراعاسىنىڭ دەرەكتەرىنە سايكەس, قارجىلىق پيراميدالارمەن كۇرەس اياسىندا زاڭسىز مازمۇنداعى 8,8 مىڭعا جۋىق سايت پەن اككاۋنت بۇعاتتالعان. پرەزيدەنتتىڭ تاپسىرماسىن ورىنداۋ شەڭبەرىندە قارجىلىق بارلاۋ قىزمەتى ەسىرتكى ساتاتىن 15 ينتەرنەت-دۇكەندى اشكەرەلەگەن. ولاردىڭ جالپى ساۋدا اينالىمى 4,4 ميلليارد تەڭگەنى قۇراپ, 27 مىڭنان اسا ازاماتتى قامتىعانى انىقتالدى. بۇل ىستەرگە قاتىستى ماتەريالدار ىشكى ىستەر مينيسترلىگى مەن ۇلتتىق قاۋىپسىزدىك قىزمەتىنە جولداندى. تسيفرلىق اكتيۆتەردى پايدالانا وتىرىپ, قىلمىستىق جولمەن تاپقان كىرىستى جىلىستاتۋعا جانە تەرروريزمدى قارجىلاندىرۋعا قارسى كۇرەس اياسىندا اگەنتتىك Binance ءىرى حالىقارالىق كريپتوبيرجاسىمەن ىنتىماقتاستىق تۋرالى مەموراندۋمعا قول قويعان.

سونىمەن قاتار پرەزيدەنتكە  قازاقستاننىڭ «قارجىنى جىلىستاتۋعا قارسى كۇرەس» ۇلتتىق جۇيەسى  فاتف تالاپتارىنا سايكەستىگى بويىنشا ءوزارا باعالاۋدان ءوتىپ جاتقانى جونىندە مالىمەت بەرىلدى.

كەزدەسۋ سوڭىندا مەملەكەت باسشىسى قارجى پيراميدالارى مەن الاياقتىق ارەكەتتەردىڭ جولىن كەسۋ بويىنشا جۇمىستى جالعاستىرۋدى, سونداي-اق اگەنتتىكتىڭ ءوز ىشىندە جەمقورلىققا قارسى ءىس-قيمىل شارالارىن كۇشەيتۋدى تاپسىردى.