بۇدان بىلاي قازاق كورەرمەندەرى MARVEL-ءدىڭ فانتاستيكالىق بلوكباستەرى «قارا قابىلان: ۆاكاندا جاساسىن» ءفيلمىن قازاق تىلىندە تاماشالاي الادى. كۇنى كەشە عانا استاناداعى «سارىارقا» ويىن-ساۋىق ورتالىعىنداعى Kinopark-تا ايگىلى تۋىندىنىڭ قازاقشا دىبىستالعان نۇسقاسى العاش كورسەتىلدى.
بىلۋىمىزشە, بۇل – قازاق دۋبلياجىنىڭ تابىستى قادامىنىڭ ءبىرى. قازاقشاسى مۇلتىكسىز دەسەك, ارتىق ايتقاندىق ەمەس. كەيىپكەرلەردى سويلەتكەنىن بىلاي قويعاندا, كۇلگەنى, دەمىككەنى, ىشقىنعانى – ءبارى قازاقى ءۇن ەرەكشەلىگىمەن ۇيلەسىپ-اق تۇر. وعان باستى سەبەپكەر بولىپ, قولعا العان – مادەنيەت جانە سپورت مينيسترلىگى مەن «مەلومەن» جانە «اراي مەديا گرۋپپ» شىعارماشىلىق ۇجىمىنىڭ بىرلەسكەن ەڭبەگىن اتاپ وتكەن ءجون. ءفيلمنىڭ قازاقشا نۇسقاسىنىڭ كورسەتىلىمىنە قاتىسقان مادەنيەت جانە سپورت ءمينيسترى داۋرەن اباەۆ الەمدىك دەڭگەيدەگى ساپالى كونتەنتتى قازاقشالاۋدا اۋقىمدى جۇمىستار اتقارىلىپ جاتقانىن جەتكىزدى.
«قازاق تىلىندەگى كينوكارتينالارعا سۇرانىس ارتىپ كەلەدى. حالىققا رەيتينگى جوعارى فيلمدەردى قازاق تىلىندە كورسەتۋ – يدەولوگيالىق تۇرعىدان دا اسا ماڭىزدى. وسى ماقساتتا ءبىز گولليۆۋدتىق جاڭا تۋىندىلاردى انا تىلىمىزگە دۋبلياجداۋ بويىنشا ارنايى جوبانى قولعا العان ەدىك. تىلگە دەگەن ەڭ ۇلكەن قولداۋ – ونى قولدانۋ. بۇگىندە انا تىلىمىزدە سويلەيتىن جاستار دا, ونى ۇيرەنگىسى كەلەتىن وزگە ۇلت وكىلدەرىنىڭ دە قاتارى ارتىپ كەلەدى. سوندىقتان قازاقتىلدى كونتەنتتى بىرگە دامىتايىق», دەدى داۋرەن اسكەربەك ۇلى.
وسى بلوكباستەردى ەسەپتەگەندە MARVEL ستۋدياسىنىڭ جەتىنشى ءفيلمى قازاقشا دىبىستالىپ, كورەرمەنگە جول تارتىپ وتىر ەكەن. بۇعان دەيىن وسى تاقىلەتتەس «اۆاتار» سياقتى فانتاستيكالىق دۇنيەلەر اۋدارىلىپتى, ەندى مىنا «قارا قابىلان» قازاقشا «كىسەن اشتى». سوندا ءبىزدىڭ «ەر توستىك», «قوبىلاندى» سىندى ەرتەگى, ەپوستارىمىز قايدا قالدى؟.. ولار دا تاپ وسى دۇنيەلەر سىندى اسپان, جەرۇستى, جەراستى الەمدەرىنىڭ ومىرىنەن سىر شەرتەتىن قاھارماندىق رۋحتاعى عاجايىپتار ەمەس پە؟ اكادەميك سەيىت قاسقاباسوۆتىڭ ەرتەگى-ميفتەر تۋرالى ەڭبەگىن وقىپ, تۇشىنعان كاسىبي كينو ماماندارى فانتاستيكالىق بلوكباستەردىڭ اتاسى قازاق ەرتەگى-ميفتەرىندە ەكەندىگىن ايقىن بىلەر ەدى. ماسەلەن, «ەر توستىكتە» جەر استىنداعى جىلان باپى حان پاتشالىعى. توستىكتىڭ وعان ءتۇسۋى, شالقۇيرىقتىڭ ءبىر تال قىلىن ورتەگەندە جەتىپ كەلەتىن عالامات دەتالدار – ءبارى تۇنىپ تۇرعان قيال-عاجايىپتار, ءالى بولماعان, تۇسىرىلمەگەن بلوكباستەر ەمەس پە؟ تۋرا سول سياقتى, مىنا «قارا قابىلاندا» دا افريكاداعى دۇنيەدە بولعان, بولماعانى بەلگىسىز پاتشالىقتار الەمىنىڭ تاعاجايىپتارىنان سىر شەرتىلەدى. ءبىزدىڭ داۋىرىمىزگە دەيىنگى كونە پاتشالىقتاردىڭ شايقاستارى بۇگىنگى تەحنوكراتتىق زامانمەن بايلانىستى ءوربيدى. دەمەك, ەرتەگى-ميفتەردەگى ءتۇپسانا ولمەيدى.
ماسەلەن, قارا قابىلان كونەدەگى ۆاكاندا ەلىنىڭ كيەسى مەن قورعاۋشىسى ىسپەتتى. فيلمدە ت’چاللا پاتشانىڭ قازاسىنان كەيىن راموندا پاتشايىم تاق مۇراگەرى جالعىز قىزىمەن قالادى. ولاردىڭ قولىنداعى عالامات «ۆيبرانيۋم» الەمدەگى اقش سياقتى الپاۋىت مەملەكەتتەر قول سۇعا باستايدى. وسى كەزدە تاريح ساحناسىنا ءبىزدىڭ داۋىرىمىزگە دەيىن جاساعان سۋاستى ەلىنىڭ ءامىرشىسى نەمورد شىعادى. بۇلار ءوزارا شارپىسقاندا, ارالارىندا نەبىر عالاماتتار قىلاڭ بەرەدى. كونە دۇنيە مەن وسى زاماننىڭ اراسى ءبىر-اق قادام. دەمەك, بولاشاق تا سول ەكەۋىنەن باستاۋ الادى.
جاھان سۇمدىق كورەتىن امەريكا حالقى اداسپاس ءۇشىن وسىنداي قادامدارعا بارىپ جاتىر, ءتىپتى ءتۇپ-تامىرىندا ونداي دۇنيەلەر بولماسا دا, وزدەرى جويىپ جىبەرگەن وركەنيەتتەردى ءتىرىلتىپ, حالقىنىڭ تانىمىنا بەيىمدەۋدە. ال ءبىزدىڭ بابا تانىم سايراپ تۇر, تەك بۇگىنگىمەن ساباقتاستىرىپ, كينو تىلىنە كوشىرسە جەتكىلىكتى.