الماتىدا Baurzhan foundation قورى ۇيىمداستىرعان «Kitap fest» كىتاپ فەستيۆالى ءوتتى. قازاقستاننىڭ جالعىز كىتاپ فەستيۆالى بولىپ تابىلاتىن اۋقىمدى شارا الماتى قالاسى اكىمدىگىنىڭ قولداۋىمەن 2013 جىلدان بەرى جىل سايىن وتكىزىلىپ كەلەدى.
بيىلعى «Kitap fest» بالالار جىلىنا سايكەس كەلەدى. Baurzhan قورىنىڭ قۇرىلتايشىسى, جوبانى ۇيىمداستىرۋشى جۇلدىز وماربەكتىڭ ايتۋىنشا, فەستيۆالدىڭ باستى ماقساتى – وقىرمان مادەنيەتىن دامىتۋ, جازۋشىلار مەن ولاردىڭ وقىرماندارى ءۇشىن بىرىڭعاي الاڭ قۇرىپ, بالالار مەن جاستار اراسىندا كىتاپقا دەگەن قىزىعۋشىلىقتى ارتتىرۋ.
«كىتاپ وقيتىن ادام ءوزىنىڭ تانىم كوكجيەگىن, لوگيكاسىن, ويلاۋ قابىلەتىن دامىتادى. جاس-كارى دەمەي, ءبىز ءبارىنىڭ وقۋعا قىزىعۋشىلىق تانىتقانىن قالايمىز. جىل سايىن كىتاپ فەستيۆالىندە بالالار مەن ەرەسەكتەر ءۇشىن اۋقىمدى باعدارلاما ۇسىنامىز. ارمانىمىز قازاقستان بويىنشا فەستيۆالدىڭ اياسىن كەڭەيتۋ, ويتكەنى قاجەتتىلىك بار. قازىردىڭ وزىندە ۇلكەن جۇمىس اتقارىلدى, الار اسۋلارىمىز ءالى الدا دەپ ويلايمىن. ادىلەتتى قازاقستانعا وقيتىن جانە ءبىلىمدى جاستار قاجەت. سوندىقتان دا ءبىز كىتاپ وقۋدى ناسيحاتتاۋدى جالعاستىرامىز», دەدى جۇلدىز وماربەك.
«Kitap fest–2022» اياسىندا وتاندىق جازۋشىلار جاڭا كىتاپتارىن تانىستىرىپ, كوپشىلىكپەن پىكىر الماستى. «وفلاين كىتاپتار تۋرالى» شاتىردا تانىمال بالالار جازۋشىلارى, بلوگەرلەر جانە تابىستى ايەلدەر قاۋىمى ءوز تاجىريبەلەرىمەن ءبولىستى. الماتىلىقتارعا يلليۋستراتسيالانعان كىتاپ كورمەسى, شەبەرلىك سىنىپتارى, ءتۇرلى بايقاۋلار مەن اكتسيالار, قازاقستاننىڭ ءىرى باسپالارى مەن كىتاپ دۇكەندەرىنىڭ جارمەڭكەسى ۇسىنىلدى. باسپاگەرلەر جانە ينتەرنەت-دۇكەندەرى ءوز ونىمدەرىن كورمەدە 20% - عا دەيىنگى جەڭىلدىكپەن ساتتى.
بالالارعا ارنالعان ويىن-ساۋىق باعدارلاماسىندا انيماتورلار, تەاتر قويىلىمدارى, اكۆاگريم مەن ءتۇرلى قىزىقتى بايقاۋلار كەلگەن قوناقتارعا تاماشا كوڭىل كۇي سىيلادى.
فەستيۆال قوناقتارى سورەگە قويىلعان كىتاپتارمەن تانىسۋعا, ۇناعان كىتاپتاردى جەڭىلدىكپەن ساتىپ الۋعا نەمەسە ولاردى تولىعىمەن تەگىن الۋعا مۇمكىندىك الدى. بيىلعى كىتاپ فەستيۆالىندە ءارتۇرلى جانرداعى 3000-نان اسا كىتاپ تەگىن تاراتىلدى.
سونداي-اق فەستيۆالدە العاش رەت «اۋىلعا كىتاپ» اكتسياسى وتكىزىلدى, وندا كەز كەلگەن وقىرمان ءوز كىتابىن اكەلىپ, قازاقستاننىڭ اۋىلدىق كىتاپحانالارىنا تاپسىرۋعا اتسالىستى.
«Kitap fest» فەستيۆالى ون جىلعا جۋىق ۋاقىت ءداستۇرلى تۇردە وتكىزىلىپ كەلە جاتقان مادەني-بۇقارالىق ءىس-شارا. وسى ۋاقىت ارالىعىندا ول شىعارماشىلىق كەزدەسۋلەردىڭ نەگىزگى الاڭىنا اينالدى, جارمەڭكەلەرگە 150-گە جۋىق كىتاپ دۇكەنى قاتىستى.
الماتى