ەلوردادا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆتىڭ قاتىسۋىمەن «اتامەكەن» ۇلتتىق كاسىپكەرلەر پالاتاسىنىڭ ح سەزى ءوتتى. ول مەملەكەت باسشىسى قاسىم-جومارت توقاەۆتىڭ سەزگە وراي بيزنەس وكىلدەرىنە جولداعان ۇندەۋىن وقىپ بەردى.
پرەزيدەنت كاسىپكەرلەرگە جولداعان ۇندەۋىندە قازاقستاندا شاعىن جانە ورتا بيزنەستى وركەندەتۋگە باسا ءمان بەرىلەتىنىن ايتىپ, كاسىپكەرلەر پالاتاسىنىڭ وتاندىق بيزنەستىڭ باسەكەگە قابىلەتتىلىگىن ارتتىرۋداعى ماڭىزىنا توقتالعان.
«وتاندىق بيزنەس ەلىمىزدىڭ ەكونوميكاسىن وركەندەتۋگە ايرىقشا ىقپال ەتەدى. ءبىز نارىقتىق ەكونوميكا قۇرىپ جاتىرمىز. سول سەبەپتى ونەركاسىپ سالاسىندا, ەكونوميكادا وزگەرىستەر جاساۋ جانە ەلىمىزدى دامىتۋ جولىندا جاۋاپتى ءارى مىقتى كاسىپكەرلەر قاۋىمى باستى ءرول اتقارادى. قازاقستاندا شاعىن جانە ورتا بيزنەستى وركەندەتۋگە باسا ءمان بەرىلەدى. سوڭعى ون جىلدا وسى سالانىڭ جالپى ىشكى ونىمدەگى ۇلەسى ەكى ەسە ءوسىپ, 34 پايىزعا جەتتى. بۇگىندە بيزنەستە 3,5 ملن-نان استام ادام ەڭبەك ەتىپ ءجۇر. وسى ۋاقىت ىشىندە ۇلتتىق كاسىپكەرلەر پالاتاسى مەملەكەتتىڭ تولىققاندى ارىپتەسىنە اينالدى. «اتامەكەننىڭ» ميكرو جانە شاعىن بيزنەستى قولداۋداعى, وڭىردەگى كاسىپكەرلىكتى دامىتۋدا باسىمدىق بەرە وتىرىپ, جاساپ جاتقان اۋقىمدى وزگەرىستەرى ەلىمىزدىڭ الدىندا تۇرعان ماقسات-مىندەتتەرگە تولىق ساي كەلەدى. سىزدەردىڭ الدارىڭىزدا مەملەكەتتىك جانە سالالىق باعدارلامالار قابىلداپ, جۇزەگە اسىرۋ, نارىققا ساپالى ساراپتاما جاساۋ ۇدەرىسىنە قاتىسۋ ءۇشىن جاڭا تاسىلدەر ازىرلەۋ مىندەتى تۇر», دەلىنگەن پرەزيدەنتتىڭ ۇندەۋىندە.
سونىمەن قاتار مەملەكەت باسشىسىنىڭ ۇنەدەۋىندە كاسىپكەرلەر پالاتاسى وتاندىق بيزنەستىڭ باسەكەگە قابىلەتتىلىگىن ارتتىرۋعا, قىزمەتىن جاۋاپكەرشىلىكپەن اتقارۋعا ىنتالاندىرۋعا جانە جۇمىس ورىندارىن اشۋعا اتسالىسا وتىرىپ, بيلىك پەن ىسكەر ازاماتتاردى بايلانىستىراتىن ءتيىمدى ارناعا اينالۋ ءتيىس ەكەنى ايتىلعان. «اتامەكەن» تاۋار وتكىزۋ نارىعىن كەڭەيتۋگە رۇقسات بەرۋ راسىمدەرىن جەڭىلدەتۋگە, مەملەكەتتىك ساتىپ الۋ جۇمىسىنىڭ قولجەتىمدى بولۋىنا جانە سىبايلاس جەمقورلىق قاپەرىن ازايتۋعا بارىنشا سەپتىگىن تيگىزۋى كەرەك.
سونداي-اق قاسىم-جومارت توقاەۆتىڭ ۇندەۋىندە پالاتا وتاندىق كاسىپكەرلەرلىكتىڭ بەتكە ۇستار وكىلدەرى مەن شاعىن جانە ورتا بيزنەس سۋبەكتىلەرى اراسىندا ءوزارا ءتيىمدى ىقپالداستىق ورناتىپ, ۇيلەسىمدى جۇمىس ىستەۋىن قامتاماسىز ەتۋ جولىندا ماڭىزدى ءرول اتقاراتىنى مالىمدەلگەن. ميكرو جانە شاعىن بيزنەس وكىلدەرىن تەكسەرۋگە جاريالانعان ماراتوري تاعى ءبىر جىلعا ۇزارتىلعانىن دا اتاپ ءوتىپتى.
«مەملەكەت شاعىن جانە ورتا بيزنەستىڭ دامۋىنا بارىنشا جاعداي جاساپ, كەز كەلگەن زاڭدى كاسىپكەرلىك قىزمەتكە قولداۋ كورسەتەدى, ونى قورعايدى. ەلىمىزدە ادال باسەكە, الەۋمەتتىك جاۋاپكەرشىلىك, جاسامپاز ەڭبەك قۇندىلىقتارىن باسشىلىققا الاتىن كاسىپكەرلەردىڭ جاڭا قاۋىمى قالىپتاسۋى وتە ماڭىزدى. قازاقستاندا بيزنەستى وڭىرلىك قانا ەمەس, جاھاندىق دەڭگەيدە وركەندەتۋگە مول مۇمكىندىك بار. مەملەكەت پالاتامەن بىرلەسىپ, ۇلتتىق ەكونوميكانى مونوپوليادان ارىلتۋ, نارىقتاردى يگەرۋ, بارلىعىنا تۇسىنىكتى ءادىل ويىن ەرەجەسىن قالىپتاستىرۋ ءۇشىن جۇيەلى جۇمىستى جالعاستىرادى. مەملەكەت پەن بيزنەستىڭ بىرلەسىپ جۇمىس ىستەۋى ەلىمىزدى الەۋمەتتىك-ەكونوميكالىق تۇرعىدان دامىتۋعا جانە حالىقتىڭ ءال-اۋقاتىن ارتتىرۋعا جول اشادى دەگەن سەنىمدەمىن», دەلىنگەن ۇندەۋدە.
پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ ءوز سوزىندە ناقتى سەكتور ەكونوميكا ءوسىمىنىڭ ماڭىزدى درايۆەرى بولىپ قالا بەرەتىنىن جەتكىزدى. اتاپ ايتقاندا, سالالار بويىنشا اۋىل شارۋاشىلىعى, اقپارات جانە بايلانىس, قۇرىلىس, كولىك جانە قويمالاۋ, سونداي-اق وڭدەۋ ونەركاسىبى مەن ساۋدا جوعارى ءوسۋدى كورسەتىپ كەلەدى.
– جەكە باستامالاردى قولداۋ جانە دامىتۋ ەكونوميكاداعى شاعىن جانە ورتا بيزنەس ۇلەسىن 2021 جىلى 34 پايىزعا دەيىن ۇلعايتۋعا مۇمكىندىك بەردى. ۇلتتىق پالاتانىڭ بەلسەندى قاتىسۋىمەن 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا ازىرلەنىپ, ىسكە اسىرىلۋدا. ونىڭ شەڭبەرىندە بيزنەستى قولداۋ جونىندەگى ءتۇرلى قۇرالدار شوعىرلاندىرىلدى. سونداي-اق كاسىپكەرلىك بەلسەندىلىكتى ىنتالاندىرۋعا جانە كاسىپورىنداردىڭ باسەكەگە قابىلەتتىلىگىن ارتتىرۋعا باعىتتالعان شاعىن جانە ورتا بيزنەستى دامىتۋدىڭ 2030 جىلعا دەيىنگى تۇجىرىمداماسى قابىلداندى. ينۆەستيتسيالىق احۋالدى جاقسارتۋ ماقساتىندا ينۆەستيتسيالىق ساياسات تۇجىرىمداماسى بەكىتىلدى. وسى باعىتتاعى جۇمىستىڭ نەگىزگى ۆەكتورلارى ايقىندالدى جانە شامامەن 30 ترلن تەڭگەگە 850 ينۆەستيتسيالىق جوبادان تۇراتىن پۋل قالىپتاستىرىلدى. قازىرگى ۋاقىتتا مەملەكەت باسشىسىنىڭ تاپسىرماسىنا سايكەس جاڭا سالىق كودەكسىن ازىرلەۋ باستالدى. ارنايى جۇمىس توبى قۇرىلدى, ونىڭ قۇرامىنا ۇلتتىق پالاتا مەن بيزنەس-قاۋىمداستىقتاردىڭ وكىلدەرى كىردى. سالىقتىق اكىمشىلەندىرۋدى جەتىلدىرۋگە ەرەكشە نازار اۋدارىلاتىن بولادى, – دەدى ە.جاماۋباەۆ.
«اتامەكەن» ۇلتتىق كاسىپكەرلەر پالاتاسىنىڭ سەزىنە رەسپۋبليكانىڭ بارلىق وڭىرىنەن 300-دەن اسا كاسىپكەر قاتىستى. وندا توعىز ماسەلە قارالدى. پالاتانىڭ اتقارىلعان جۇمىسىنىڭ ەسەبى تىڭدالدى. ترانسفورماتسيادان كەيىنگى ۇلتتىق پالاتانىڭ جاڭا تاسىلدەرى پىسىقتالدى. سونداي-اق جاڭادان قۇرىلعان اباي, جەتىسۋ جانە ۇلىتاۋ وبلىستارىندا پالاتانىڭ وڭىرلىك فيليالدارى ىسكە قوسىلدى.
– بيىلعى سەزد تاريحي ەرەكشە كەزەڭدە – ەلىمىزدىڭ ستراتەگيالىق دامۋىن ايقىندايتىن ۇلكەن ناۋقان كەزىندە ۇيىمداستىرىلدى. مەملەكەت باسشىسى قاسىم-جومارت كەمەل ۇلىنىڭ «ادىلەتتى قازاقستان» قۇرۋداعى باعىت-باعدارى بەلگىلەندى. وسى باستامانىڭ شەڭبەرىندە «ادىلەتتى ەكونوميكا» قاعيداسىنا سۇيەنە وتىرىپ, ءبىز «اتامەكەن» ۇلتتىق كاسىپكەرلەر پالاتاسى رەتىندە ەلىمىزدىڭ كاسىپكەرلەرىنە تولىقتاي جاعداي جاساۋ ماقساتىندا ترانسفورماتسيا كەزەڭنەن ءوتىپ جاتىرمىز. ترانسفورماتسيانى ساپالى ىسكە اسىرۋ ءۇشىن كۇش-جىگەرىمىزدى جۇمىلدىرىپ, ۇلكەن ماقساتقا جەتۋىمىز قاجەت. بۇل – ورتاق مىندەت جانە جاۋاپكەرشىلىك, – دەيدى «اتامەكەن» ۇلتتىق كاسىپكەرلەر پالاتاسىنىڭ باسشىسى رايىمبەك باتالوۆ.