بۇگىنگى تاڭدا سىبايلاس جەمقورلىقتىڭ كەز كەلگەن ءتۇرىنىڭ بەلەڭ الۋى قاي مەملەكەتتىڭ بولماسىن ەكونوميكالىق دامۋىنا ايتارلىقتاي تۇساۋ سالاتىنى بەلگىلى. سىبايلاس جەمقورلىقتىڭ قاۋپىن تۇپكىلىكتى زەرتتەۋ بارىسىندا ونىڭ قوعامعا كەلتىرەر زالالى دا وراسان ەكەنى ابدەن انىقتالعان.
ال قازىرگى تاڭدا قانداي ەلدە بولماسىن جەمقورلىققا قارسى كۇرەس جۇرگىزۋدىڭ تەتىگى دە جەتكىلىكتى. ءبىزدىڭ ەلىمىز وسىدان جيىرما جىل بۇرىن ءوزىنىڭ تاۋەلسىزدىگىن جاريالادى. وسى ۋاقىت ارالىعىندا قازاقستانعا نارىقتىق ەكونوميكانى جانە وڭ ينۆەستيتسيالىق احۋال مەن تۇراقتى الەۋمەتتىك-ساياسي جاعدايدى قالىپتاستىرۋعا مۇمكىندىك تۋدى. وسى كەزەڭ ىشىندە ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ەۋروپالىق جانە ازيالىق بىرقاتار ەلدەردىڭ بەدەلدى ورگاندارىمەن تىعىز ىنتىماقتاستىق ورناتۋعا قول جەتكىزدى. قازىرگى كۇنى اگەنتتىك كوپتەگەن حالىقارالىق ۇيىمدارمەن قارىم-قاتىناس جاسايدى. ماسەلەن, ۇستىمىزدەگى جىلدان باستاپ قازاقستان 2010 جىلى بۇۇ اياسىندا حالىقارالىق ۇيىم بولىپ قۇرىلعان سىبايلاس جەمقورلىققا قارسى حالىقارالىق اكادەميانىڭ تولىق مۇشەسى اتاندى.
جالپى, قازاقستان رەسپۋبليكاسىنىڭ ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) شىعىس ەۋروپا جانە ورتالىق ازيا ەلدەرى ءۇشىن سىبايلاس جەمقورلىققا قارسى كۇرەس جونىندەگى جۇيەنى ۇيلەستىرۋشى ورگانى بولىپ تابىلادى. بۇل ورايدا كەشە پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ وكىلدەرى, پارلامەنت سەناتى مەن ءماجىلىسى دەپۋتاتتارى قاتىسقان, قارجى پوليتسياسى, جوعارعى سوت, باس پروكۋراتۋرا, مەملەكەتتىك قىزمەت ىستەرى اگەنتتىگى, قازاقستان رەسپۋبليكاسىنىڭ قارجى, ادىلەت, ەكونوميكا جانە بيۋدجەتتىك جوسپارلاۋ مينيسترلىكتەرىنىڭ جانە باسقا دا مەملەكەتتىك ورگانداردىڭ وكىلدەرى باس قوسقان حالىقارالىق ساراپشىلار توبىنىڭ ءبىرىنشى تاقىرىپتىق كەزدەسۋى ءوتتى.
2003 جىلعى قىركۇيەكتە ىستامبۇل قالاسىندا (تۇركيا) ەكونوميكالىق ىنتىماقتاستىق جانە دامۋ ۇيىمىنىڭ سىبايلاس جەمقورلىققا قارسى كۇرەس ءجونىندەگى ىستامبۇل ءىس-قيمىل جوسپارى قابىلدانعان بولاتىن. ونىڭ قۇرامىنا كوپتەگەن ەلدەر كىرەدى. مىنە, ەندى وسى ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) سىبايلاس جەمقورلىققا قارسى كۇرەس جونىندەگى ىستامبۇل ءىس-قيمىل جوسپارى شەڭبەرىندە استاناعا ەلىمىزدىڭ زاڭنامالارى مونيتورينگىنىڭ ءۇشىنشى راۋندىن وتكىزۋ ءۇشىن ساراپشىلار توبى كەلدى. بۇل ىستامبۇل ءىس-قيمىل جوسپارىنىڭ ماقساتى – سىبايلاس جەمقورلىققا قارسى كۇرەس زاڭناماسىن جانە سىبايلاس جەمقورلىققا قارسى كۇرەس شارالارىن جەتىلدىرۋ بولىپ تابىلادى.
2011 جىلعى 28-30 قىركۇيەك ارالىعىندا فرانتسيانىڭ پاريج قالاسىندا ىستامبۇل ءىس-قيمىل جوسپارىنىڭ 10-مونيتورينگتىك كەزدەسۋى شەڭبەرىندە قازاقستان زاڭناماسى مونيتورينگىنىڭ ەكىنشى راۋندىنىڭ ەسەبى قابىلدانعان بولاتىن. ەسەپتەمەدە قازاقستاننىڭ ساياسي ەركى مەن سىبايلاس جەمقورلىققا قارسى ساياساتىنا, سونىڭ ىشىندە ەلىمىزدە سوڭعى جىلدارى سىبايلاس جەمقورلىقتىڭ دەڭگەيىن ءتومەندەتۋگە ىقپال ەتىپ, ىسكە اسىرىلعان ماڭىزدى رەفورمالار بارىسى جوعارى باعالانعان-دى.
سونىمەن قاتار, قازاقستان ءۇشىن سىبايلاس جەمقورلىققا قارسى زاڭنامانى ءارى قاراي جەتىلدىرۋگە ارنالعان ءۇش سالادا: سىبايلاس جەمقورلىققا قارسى, سىبايلاس جەمقورلىق جاساعانى ءۇشىن قىلمىستىق جاۋاپكەرشىلىك جانە سىبايلاس جەمقورلىقتىڭ الدىن الۋ بويىنشا 17 جاڭا ۇسىنىس ازىرلەۋ تاپسىرىلدى. مىنە, وسى ورايدا ءوتىپ جاتقان مونيتورينگتىڭ ءۇشىنشى راۋندىنىڭ ماقساتى دا مونيتورينگتىڭ ەكىنشى راۋندىن وتكىزۋ بارىسىندا ءتۇرلى ەلدەرگە بەرىلگەن ۇسىنىمداردىڭ ورىندالۋ جەتىستىكتەرىن باعالاۋ بولىپ تابىلادى.
اتالعان مونيتورينگ توبىنىڭ قۇرامىنا ەىدۇ-نىڭ شىعىس ەۋروپا جانە ورتالىق ازيا ەلدەرى ءۇشىن سىبايلاس جەمقورلىققا قارسى كۇرەس ءجونىندەگى جۇيە حاتشىلىعىنىڭ وكىلدەرى, نيدەرلاند, ۋكراينا, وزبەكستان, ليتۆا جانە ەۋروپا دامۋ بانكىنىڭ وكىلدەرى كىرەدى. بارلىق كەزدەسۋلەر سۇراق-جاۋاپ تۇرىندە ۇيىمداستىرىلعان. مەملەكەتتىك ورگانداردىڭ وكىلدەرى ساراپشىلاردىڭ ءار ۇسىنىمى بويىنشا قويىلعان سۇراقتارىنا تولىق اقپاراتتى ۇسىنا وتىرىپ, جاۋاپ بەرۋدە. ءسويتىپ, وسى كەزدەسۋ ناتيجەسى بويىنشا ساراپشىلار توبى قازاقستان رەسپۋبليكاسىنىڭ مەملەكەتتىك ورگاندارىنا ۇسىنىمدار دايىنداۋ ءۇشىن مونيتورينگتىڭ ءۇشىنشى راۋندىنىڭ ەسەپ جوباسىن ازىرلەيدى. ال بۇل ۇسىنىستاردىڭ ىسكە اسىرىلۋى ءبىزدىڭ مەملەكەتىمىزدىڭ ءيميدجىن جانە حالىقارالىق الاڭدا ەلىمىزگە دەگەن ينۆەستيتسيالىق قىزىعۋشىلىقتى ارتتىرىپ, سونىمەن قاتار, ۇلتتىق زاڭنامانى حالىقارالىق ستاندارتتارعا جاقىنداتا تۇسەدى دەگەن ۇلكەن سەنىم بار.
الەكساندر تاسبولاتوۆ,
«ەگەمەن قازاقستان».