جۋىردا ەستىگەن مىنا ءبىر حابار جۇرەككە جىلۋ ۇيالاتىپ, «وسىنداي جايتتى كوبىرەك ناسيحاتتاساق, ەل ىشىندە جاقسىلىققا دەگەن سەنىم جوعالماس ەدى-اۋ» دەگەن ويعا كەلدىك. الەۋمەتتىك جەلىنى پاراقتاپ وتىرىپ وقىعان وقيعانىڭ ءمان-جايىن انىقتاۋ ءۇشىن ءبىلۋى مۇمكىن دەگەن ادامدارعا حابارلاستىق. ءوستىپ وتىرىپ ءوزىمىز ىزدەگەن اۋىل دارىگەرىنىڭ دە تەلەفون ءنومىرىن تاۋىپ الدىق.
كەيىپكەرىمىز ارالباي مامبەتجانوۆ قازالى اۋدانىنداعى مايداكول اۋىلىندا تۇراتىن ءتىس دارىگەرى. اۋىلدا تۇرسا دا الەۋمەتتىك جەلى مەن مەرزىمدى ءباسپاسوز ارقىلى قوعامداعى ۇلكەندى-كىشىلى وقيعالارعا ءۇن قوسىپ وتىراتىن ازامات.
كەش ءبىلىپ جۇرگەن ءبىز ەكەن, اۋىل دارىگەرىنىڭ ايتۋىنشا, سوڭى قايعىلى اياقتالا جازداعان وقىس جاعداي وسى جىلعى تامىز ايىندا بولىپتى. وسىنداعى ەرلى-زايىپتىلار جاقىندارى قايتىس بولىپ, سوعان كوڭىل ايتۋعا كەتەدى. قالاداعىداي قۇرداي قاتىناپ جاتقان كولىك بولماعان سوڭ دا اۋىلداعىلاردىڭ الاڭى ازداۋ عوي. سوندا دا ۇيدەگى ءبىر جارىم جاسار كىشكەنتايدى ەرەسەكتەرگە تاپسىرىپ كەتىپتى. كۇندە بولماسا دا ىنىلەرىنە ءجيى باس-كوز بولىپ قالاتىن ەستيار ەكى ۇل دا الاڭسىز ويناپ, كىشكەنتايدى كوزدەن تاسا قىلىپ السا كەرەك. بارعان جەرىنەن تەز ورالعان اكە-شەشەسى 1,5 جاسار بالانىڭ ۇيگە جاقىن جارمادا اعىپ بارا جاتقانىن ءبىر-اق كورەدى عوي.
– بالانىڭ شەشەسى ماعان تەلەفون شالىپ, بالادان تىرشىلىك بەلگىسى بايقالمايتىنىن حابارلادى, – دەيدى ارالباي اياعان ۇلى. – دەرەۋ جەتتىم, شىنىمەن دە ءسال كەشىكسەك بالادان ايىرىلىپ قالعانداي ەكەنبىز. تەز ارادا ەس-ءتۇسسىز جاتقان ءسابيدىڭ سۋ كيىمدەرىن شەشكىزىپ, قارىسقان اۋزىن اشىپ, ءتىلىنىڭ ۇشىنان باسىپ تۇرىپ جۇتقان سۋىن قۇستىردىم. تۇنشىعىپ قالعان بالا بىردەن شار ەتىپ جىلاپ قويا بەردى. جەدەل جاساندى دەم بەرىپ, جۇرەككە جاناما ماسساج جاساپ, اياق-قولىن ۋقالاپ, اۋداندىق اۋرۋحاناعا اتتاندىردىق.
ەڭبەك جولىن جاڭا باستاعان مامان بولسا, مۇنداي ساتتە ابدىراپ قالار ما ەدى, ءسابيدى ساقتاپ قالام دەگەن دارىگەر ءبىرىنشى تاجىريبەگە سۇيەندى. اۋرۋحاناعا جەتكەنگە دەيىنگى 60 شاقىرىمدىق جولدى ۋايىمداپ, تىنىم تاپپاي كەتكەن ول «بالا جانساقتاۋ بولىمىنە قابىلداندى» دەگەن حابار جەتكەندە ارقاسىنان اۋىر جۇك تۇسكەندەي بولعان ەدى. اۋرۋحانادا ەم العان ءسابي از كۇندە ساۋىعىپ, ۇيىنە ورالدى.
وسىدان ەكى جىل بۇرىنعى پاندەميا كەزىندە ارالباي اياعان ۇلىنىڭ اۋىل سىرتىنداعى بەكەتتەن استانادان كەلە جاتقان ازاماتتىڭ بويىنان دەرت بەلگىسىن بايقاپ, دابىل قاققان ەكەن. ونىڭ بولجامى ءدال شىعىپ, ناۋقاس دەر كەزىندە وقشاۋلاندىرىلىپتى. جۋىردا اۋىل دارىگەرى «قۇرمەت» وردەنىمەن ماراپاتتالدى.
كەيدە دارىگەر قىزمەتىنەن ءمىن تاپساق, «وۋ, سوندا گيپپوكرات سەرتى قايدا قالدى؟» دەپ جاتاتىنىمىز بار. ءاسىلى, اق حالات كيگەن ماماننىڭ كاسىبيلىگى سەرتپەن ەمەس, جاقسىلىق جاساۋعا اسىققان نيەتپەن, قيىن ساتتە قايمىقپايتىن جۇرەكپەن ولشەنسە كەرەك.
قىزىلوردا وبلىسى