پارلامەنت سەناتىنىڭ توراعاسى ماۋلەن اشىمباەۆ پالاتانىڭ جالپى وتىرىسىندا ادام قۇقىقتارىن قورعاۋ جۇيەسىن نىعايتۋ, وكىلەتتىكتەر مەن جاۋاپكەرشىلىك تەپە-تەڭدىگىن قامتاماسىز ەتۋ – قازاقستاندا جۇرگىزىلىپ جاتقان رەفورمالاردىڭ باستى ماقساتى ەكەنىن ايتتى, دەپ حابارلايدى Egemen.kz.
«قازاقستاندا جۇرگىزىلىپ جاتقان رەفورمالاردىڭ ماقساتى – ادام قۇقىقتارىن قورعاۋ جۇيەسىن نىعايتۋ, بيلىك تارماقتارى اراسىنداعى, سونداي-اق ورتالىق پەن وڭىرلەر اراسىنداعى وكىلەتتىكتەر مەن جاۋاپكەرشىلىكتەردىڭ تەپە-تەڭدىگىن قامتاماسىز ەتۋ. بۇگىنگى قابىلدانعان زاڭدار دەموكراتيالىق ينستيتۋتتاردى دامىتۋعا, ازاماتتاردىڭ مەملەكەتتىك جانە ساياسي قۇرىلىمدارعا سەنىمىن نىعايتۋعا ىقپال ەتەدى. بۇل ادىلەتتى قازاقستاندى قۇرۋ جولىنداعى ماڭىزدى قادام», دەدى ماۋلەن اشىمباەۆ.
بۇعان دەيىن سەناتتا كونستيتۋتسيالىق سوت تۋرالى زاڭ قابىلدانعانى حابارلانعان ەدى.
ەندى قازاقستاندىقتار وزدەرىنىڭ قۇقىقتارى مەن بوستاندىقتارىن قوزعايتىن زاڭدارعا نەمەسە نورماتيۆتىك قۇقىقتىق اكتىلەرگە قارسىلىق بىلدىرە الادى. ازاماتتاردىڭ وتىنىشتەرىن كونستيتۋتسيالىق سوت قابىلدايدى. سونداي-اق زاڭ مەملەكەتتىڭ قۇقىق قورعاۋ ينستيتۋتتارىن نىعايتىپ, ازاماتتاردىڭ كونستيتۋتسيالىق باقىلاۋعا قولجەتىمدىلىگىن كەڭەيتۋى ءتيىس.