وبلىستىق ا.پۋشكين اتىنداعى كىتاپحانادا «مۇحتار اۋەزوۆ شىعارماشىلىعى سۋرەتشىلەر كوزىمەن» اتتى سۋرەت كورمەسى اشىلدى. جازۋشى شىعارمالارىن وقىرمان قاۋىمعا ناسيحاتتاۋ ماقساتىندا وتكەن كورمەگە قىرىققا جۋىق كاسىبي جانە اۋەسقوي قىلقالام شەبەرلەرى قاتىستى.
– شىنى كەرەك, بۇرىنعىداي كىتاپ وقۋعا جاستاردىڭ كوڭىلى سوعا بەرمەيدى. سوندىقتان دا سۋرەت ونەرى ارقىلى جازۋشى شىعارمالارىن ناسيحاتتاۋدى ءجون دەپ ەسەپتەيمىز. بۇل جولى سۋرەتشىلەر م.اۋەزوۆ شىعارمالارىن كەنەپ بەتىنە ءتۇسىردى. بۇگىنگى ءىس-شارا كورمە عانا ەمەس, سۋرەتشىلەر اراسىنداعى بايقاۋ رەتىندە دە ۇيىمداستىرىلدى. ءساتتى سۋرەتتەردىڭ اۆتورلارى باعالى جانە اقشالاي سىيلىقتارمەن ماراپاتتالدى, – دەيدى كىتاپحانا قىزمەتكەرى مەرۋەرت كەمەشوۆا.
ايتىپ وتكەندەي, مۇحتار اۋەزوۆتىڭ 125 جىلدىعىنا وراي ۇيىمداستىرىلىپ جاتقان كورمەگە اۋەسقوي جاس سۋرەتشىلەر دە قاتىسقان. ولار الدىمەن جازۋشى شىعارمالارىن وقىپ بارىپ قولدارىنا قارىنداش العان. ءبىرى كوكسەرەكتى بەينەلەسە, ەندى ءبىرى اباي جولى رومانىنان سيۋجەتتەر جازۋعا تىرىسقان. بۇل بايقاۋ ءبىر جاعىنان جازۋشى شىعارماسىن ناسيحاتتاۋعا باعىتتالسا, ەكىنشى جاعىنان سۋرەت ونەرىن دامىتۋدى ماقسات ەتتى. راس, سۋرەت ونەرى وڭىردە ۇلكەن قولداۋدى قاجەت ەتەدى. بەلگىلى قىلقالام شەبەرى قۇداش نۇرسادىقوۆتىڭ ۇيىتقى بولۋىمەن «جاڭعىرۋ» سۋرەتشىلەر بىرلەستىگى قۇرىلعان. بىرلەستىك اياسىندا بىرقاتار سۋرەتشى توپتاسىپ, بىرنەشە كورمە دە وتكىزگەن. بۇل جولى دا كورمەگە اتالمىش بىرلەستىكتىڭ مۇشەلەرى قاتىستى.
– جاس سۋرەتشىلەر وسىنداي بايقاۋلارعا قاتىسىپ جۇلدە الىپ جاتسا, ولار ءۇشىن ۇلكەن ستيمۋل. بەينەلەۋ ونەرىن دامىتۋ ءۇشىن, تۋراسىن ايتقاندا, قارجىلاي قولداۋ كەرەك. تەرەڭ تۇسىنسەك, بۇگىنگى ۇرپاق بەينەلەۋ ونەرىنە جاقىن بولسا, ەرتەڭ ولاردان مىقتى تەحنيك ماماندار شىعۋى مۇمكىن, – دەيدى كاسىبي سۋرەتشى ەرجان تۇرعانباەۆ.
سونىمەن قازىلاردىڭ شەشىمىمەن اۋەسقوي سۋرەتشىلەر اراسىندا بايقاۋدىڭ باس جۇلدەسىن ايناز ەرمۇقان يەلەندى. ال ەكىنشى ورىندى ارايلىم تەمىربەكوۆا ەنشىلەدى. ءۇشىنشى ورىن بەكسۇلتان امانعازىنىڭ قانجىعاسىندا.
كاسىبي سۋرەتشىلەر اراسىنداعى ءبىرىنشى ورىندى گۇلنار بەكبەردينوۆا السا, ەكىنشى ورىن ءمادي قايىرحانعا بۇيىردى. جۇلدەلى ءۇشىنشى ورىنداردى ەرجان تۇرعانباەۆ پەن قۇداش نۇرسادىقوۆ قاناعات تۇتتى.
ايتا كەتسەك, ءبىرىنشى ورىنعا لايىق دەپ تابىلعان پولوتنودا مۇحتار اۋەزوۆتىڭ جاس كەزى بەينەلەنگەن. پورترەت اينالاسىندا جازۋشىنىڭ تۋعان جەرى, شىعارماشىلىعى كورىنىس تاپقان. ەرەكشە ستيلدە جازىلعان كارتينانىڭ كومپوزيتسياسى دا كورەرمەندى بىردەن باۋرادى.
سالتاناتتى تۇردە اشىلعان كورمە كىتاپحانا زالىندا ءبىر اي بويى كورەرمەن نازارىنا ۇسىنىلادى. بەينەلەۋ ونەرىن قاسيەت تۇتساڭىز, كۇيبەڭ تىرلىكتى ىسىرا تۇرىپ, كورمەنى تاماشالاپ قايتۋىڭىزعا بولادى. كىتاپحانا ەسىگى ارقاشان اشىق.
شىعىس قازاقستان وبلىسى