«بەرەكە باسى – بىرلىكتە» دەپ اتالاتىن رەسپۋبليكالىق اقىندار ايتىسى اقتاۋدا ءوتتى. «نۇر وتان» حدپ-نىڭ 15 جىلدىعىنا ارناپ اتالمىش پارتيا مەن ماڭعىستاۋ وبلىستىق مادەنيەت باسقارماسى بىرلەسىپ ۇيىمداستىرعان ايتىسقا ەلىمىزدىڭ ءار تۇكپىرىنەن قاتىسقان 10 اقىن, بەس جۇپ بوپ سايىسقا ءتۇستى.
«ءسوز دەگەنىڭ دە بۇيىم با,
سويلەۋ دەگەندە قيىن با؟
تالاي دا تالاي سويلەدىك,
ساتىرلاعان دا جيىندا» دەپ تولعانا توكپەلەگەن ءدۇر اقىندار مەن جىردان داۋىل تۇرعىزعان دۇلەي جىراۋلاردىڭ مەكەنى ماڭعىستاۋدا الامان ايتىستى قىزىقتاپ, ەلىمىزدىڭ ءار وڭىرىنەن كەلگەن سۋىرىپ سالما جۇيرىكتەردىڭ اۋىزىنان شىققان ولەڭگە قانىعۋ ءۇشىن كورەرمەندەر كوپ جيىلدى. بەس ساعاتقا سوزىلعان ايتىسقا قر پارلامەنتى ءماجىلىسىنىڭ دەپۋتاتى و.اسانعازى, رەسپۋبليكالىق ارداگەرلەر كەڭەسىنىڭ توراعاسى ءو.وزعانباي, «ارا» جۋرنالىنىڭ باس رەداكتورى ك.ءامىربەك, ايتىسكەر اقىن, «اسىل ارنا» تەلەارناسىنىڭ ديرەكتورى م.تازابەك, قازاق مادەنيەت عىلىمي-زەرتتەۋ ينستيتۋتىنىڭ باس ديرەكتورى م.ءتاجىمۇرات قازىلىق ەتتى.
قازىرگى قازاق قوعامى ءۇشىن بەرەكە-بىرلىك ەڭ باستى قاجەتتىلىك, دامۋدىڭ كەپىلى. ايتىس تاقىرىبى دا وسى باعىتتا بولعاندىقتان, ايتىسكەر اقىندار بەرەكە-بىرلىكتى, ەلدىكتى جىرلاۋعا كوپ كوڭىل ءبولدى. قوعامداعى وزەكتى ماسەلەلەر, كيەلى ماڭعىستاۋ دالاسىنىڭ قادىر-قاسيەتى ايتىس تاقىرىبىنان تىس قالعان جوق, سونداي-اق قازەكەمنىڭ ناعاشىلى-جيەندىك, جەڭگە-قاينىلىق, قاتار-قۇربىلىق جاراسىمدى ءازىل-قالجىڭى دا ولەڭ شۋماقتارىنا اينالىپ جاتتى.
ناتيجەسىندە اتىراۋلىق اقىن س.نۇرمانوۆ باس جۇلدەگە تىگىلگەن 2 ملن. تەڭگەنى قانجىعاسىنا بايلاپ كەتتى. 1-ورىننىڭ ءباسى 1,5 ملن. تەڭگەنى تارازدان كەلگەن اقىن ءا.دۇيسەباەۆ ولجالاسا, 1 ملن. تەڭگە قارجىلاي سىيى بار 2-ورىندى الماتىنىڭ اقىنى ق.مىرزاحان يەلەندى. 750 مىڭ تەڭگە تىگىلگەن قوس 3-ورىن سەمەيدەن كەلگەن اقىن قىز س.توقتامىسوۆا مەن قىزىلوردالىق م.نيازوۆقا بۇيىردى. ايتىسقا قاتىسقانى ءۇشىن ورالدىق ت.مىقي, پاۆلودارلىق ر.قايدار, قاراعاندىلىق ا.جۇماعۇلوۆ, اقتوبەلىك و.قيىنباەۆ جانە ماڭعىستاۋلىق ا.جولماعانبەتوۆ ارقايسىسى 500 مىڭ تەڭگەلىك سىي-قارجىمەن ماراپاتتالدى.
ايتىس سوڭىندا ماڭعىستاۋ وبلىسىنىڭ اكىمى ا.ايدارباەۆ پەن قر پارلامەنتى ءماجىلىسىنىڭ دەپۋتاتى و.اسانعازى ءسوز الىپ, ۇيىمداستىرۋشىلار مەن اقىندارعا ريزاشىلىقتارىن ءبىلدىردى.
بىراق, نۇرىم, قاشاعان, ابىل, ارالباي, اقتان, تۇمەن, ساتتىعۇلدار جىرىنان «شەكەر جەپ دانىككەن» جۇرتتىڭ وكىلدەرى بۇعان دەيىن دە ايتىس سۇيەر قاۋىمنىڭ ايىزىن قاندىرىپ جۇرگەن مۇحتار, سارا سىندى اقىندارعا ريزا بولۋمەن قاتار, ماڭعىستاۋدىڭ «تۋىن ۇستاپ شىققان» اقىن ۇلدارىنىڭ اياق الىسى مەن ءسوز ساپتاسىنا كوڭىلدەرى تولعان جوق. «چەمپيون اقىن» مەلستىڭ, ازىلقوي اقىن نۇرلاننىڭ سوڭىنان ايتىس ارعىماعىنا ءمىنىپ, الامانعا اتويلاي قوسىلعان ۇلاننىڭ بولماۋى – ماڭعىستاۋلىقتاردىڭ الاڭداپ جۇرگەن ءجايى. اقىن جوق پا, الدە ونى تاۋىپ, باپتاي الماي ءجۇرمىز بە دەگەن وي قالدى ءبارىنىڭ كوكەيىندە...
گۇلايىم شىنتەمىرقىزى,
«ەگەمەن قازاقستان».
اقتاۋ.