سەنبى كۇنى تۇندە پورتۋگاليانىڭ استاناسى – ليسسابون قالاسىندا يسپانيا ءمادريدىنىڭ «رەال» جانە «اتلەتيكو» كوماندالارى چەمپيوندار ليگاسىنىڭ فينالىندا كەزدەسىپ, بۇلاردىڭ الدىڭعىسى 4:1 ەتىپ ۇتىپ شىقتى.
ماتچ كوپشىلىك كۇتكەندەي, «رەالدىڭ» قاۋىرت شابۋىلىمەن باستالدى. بۇعان «اتلەتيكو» تاسقامال قورعانىستى ۇيىمداستىرا وتىرىپ, وقتا-تەكتە ۇدەرە شابۋىل جاساۋ تاكتيكاسىن قارسى قويدى. تۇبىندە وسى ءتاسىل ءوزىنىڭ وڭ ناتيجەسىن دە بەردى. كەزدەسۋدىڭ 36-مينۋتىندا بۇرىشتامادان سوققى جاساعان «ماتراسشىلار» قاقپاشى يكەر كاسيلياستىڭ العا شىعىپ كەتكەنىن كەزىندە پايدالانىپ, ەسەپ اشتى. «رەال» ويىنشىلارى ايىپ الاڭىنان شىعارعان دوپ قايتادان كەرى كەلتىرىلگەندە, «اتلەتيكونىڭ» جارتىلاي قورعاۋشىسى ديەگو گودين ونى باسىمەن الىستان ۇرىپ ءتۇسىردى.
وسىدان كەيىن «بلانكوس» فۋتبولشىلارى شابۋىلدى بۇرىنعىدان بەتەر كۇشەيتتى. كريشتيانۋ رونالدۋ باستاعان رەالدىقتار العا قاراي ورشەلەنە ۇمتىلدى. وسىنداي ءۇستىن-ۇستىنە جاسالعان جويقىن شابۋىل نەگىزگى ۋاقىتقا قوسىلعان 3-مينۋتتا عانا ءوز ناتيجەسىن بەردى. اۋەلى لۋكا مودريچ بۇرىشتاما دوبىن جەتكىزدى. ونى سەرحيو راموس باسىمەن ۇرىپ, قاقپاشى تيبو كۋرتۋانىڭ تۋ سىرتىنان ءبىر-اق شىعاردى – 1:1!
وسىدان كەيىن قوسىمشا ەكى تايمعا كەزەك كەلدى. ول جۇرتشىلىق كۇتكەن ستسەناري بويىنشا ءوربىدى. سوڭعى گولدان ۇلكەن قۋات العان كارلو انچەلوتتيدىڭ جىگىتتەرى تاعى دا العا قاراي جوڭكىلە شاپتى. بۇل جولى ولار اتقانىن قۇر جىبەرگەن جوق. ءسويتىپ, گارەت بەيل (110), مارسەلو (118), كريشتيانۋ رونالدۋ (120-پەنالتي) سەكىلدى ويىنشىلار سوققان گولداردىڭ ارقاسىندا «رەال» ەسەپتى 4:1-گە جەتكىزىپ, ءبىر-اق توقتادى.
رۋسلان يگىلىك.