نۇرلان ءابدىروۆتىڭ توراعالىعىمەن وفلاين جانە ونلاين فورماتتا ورتالىق سايلاۋ كوميسسياسىنىڭ جانىنداعى جاس سايلاۋشىلار كلۋبىنىڭ كەزەكتى وتىرىسى ءوتتى.
نۇرلان ءابدىروۆ كلۋب قاتىسۋشىلارىن پرەزيدەنت سايلاۋىن وتكىزۋدىڭ ەرەكشەلىكتەرىمەن, سونداي-اق سايلاۋ ناۋقانىنىڭ بارىسىمەن تانىستىردى. جاستاردىڭ سايلاۋ ۇدەرىسىندەگى ەلەكتورالدىق مادەنيەتى مەن بەلسەندىلىگىن ارتتىرۋدىڭ ماڭىزدىلىعى جايىندا اشىق جانە مازمۇندى تالقىلاۋ بولدى.
كلۋب قاتىسۋشىلارى وتكەن سايلاۋ ناۋقاندارىنداعى وزدەرىنىڭ كانديداتتار, سەنىم بىلدىرىلگەن ادامدار جانە ۇلتتىق بايقاۋشىلار رەتىندەگى تاجىريبەلەرىمەن ءبولىستى. جاستاردىڭ سايلاۋ ينستيتۋتىنا دەگەن قالىپتاسقان سەنىمسىزدىگىنىڭ, سايلاۋ ۇدەرىسىنىڭ كەيبىر قاتىسۋشىلارى اراسىندا قۇقىقتىق ساۋاتسىزدىقتىڭ بولۋىنا بايلانىستى ورتالىق سايلاۋ كوميسسياسىنىڭ جاس سايلاۋشىلارمەن وقىتۋ جانە اقپاراتتىق-تۇسىندىرمەلى باعىتتاعى جۇيەلى جۇمىستى جالعاستىرۋى تۋرالى ۇسىنىستار ايتىلدى. بۇل ورايدا قاتىسۋشىلاردىڭ باسىم كوپشىلىگى ورتالىق سايلاۋ كوميسسياسىنىڭ اعىمداعى سايلاۋ ناۋقانىندا جاستار ۇيىمدارىنىڭ, ساياسي پارتيالاردىڭ وكىلدەرىنە ارناپ وتكىزگەن سەمينارلارىن وڭ تاجىريبە رەتىندە اتاپ ءوتتى.
پرەزيدەنت سايلاۋىنا بايلانىستى سايلاۋ ۇدەرىسىنىڭ اشىقتىعىن قامتاماسىز ەتۋ, ۇلتتىق بايقاۋشىلاردىڭ قۇقىقتارىن ساقتاۋ, سونداي-اق جاس ەلەكتوراتتارعا ارنالعان اقپاراتتىق-كوممۋنيكاتسيالىق جۇمىستى جاڭعىرتۋ تۋرالى ۇسىنىستار ايتىلدى.