قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايراباەۆ سايلاۋالدى ۇگىت-ناسيحات شەڭبەرىندە تۇركىستان وبلىسىنىڭ اۋىل شارۋاشىلىعى تاۋار وندىرۋشىلەرىمەن كەزدەستى.
جيگۋلي دايراباەۆ كەزدەسۋ بارىسىندا اۋىل شارۋاشىلىعى وندىرۋشىلەرى ءۇشىن قارجىلاندىرۋدىڭ, جەر جانە تەحنيكالىق رەسۋرستاردىڭ قولجەتىمدىلىگى ماسەلەلەرىن قوزعادى. تۇركىستان وبلىسى فەرمەرلەردىڭ كوپ شوعىرلانۋىمەن جانە اوك قۇرىلىمىنداعى ءۇي شارۋاشىلىقتارى ۇلەسىمەن ەرەكشەلەنەتىندىكتەن, اتالعان پروبلەمالار ءوڭىر ءۇشىن وتە وزەكتى.
«شاعىن شارۋالار كووپەراتسياسى ماسەلەلەرىنىڭ شەشىلۋ دەڭگەيى تومەن, جەر ۇلەسكەرلەرى مەن شارتتى جەر ۇلەستەرىنە يەلىك ەتۋشىلەر اراسىندا داۋ ءجيى تۋىنداپ تۇرادى. مەن سايلاۋالدى باعدارلامامدا وسى ماسەلەلەردى شەشۋدىڭ جەكە باعىتىن بەلگىلەدىم. اگروبيزنەس قۇرعىسى جانە اگرارلىق سالانى نىعايتقىسى كەلەتىندەر ءۇشىن پايىزسىز نەسيە بەرەتىن ارنايى اگروبانك قۇرۋدى ۇسىنامىن», دەدى ج.دايراباەۆ.
كەزدەسۋدە فەرمەرلەر سۋ تاپشىلىعى جايلى الاڭداۋشىلىقتارىمەن ءبولىستى. «سۋ رەسۋرستارىنىڭ تاپشىلىعى ەكونوميكانىڭ كوپتەگەن سالاسىنا, سونىڭ ىشىندە اۋىل شارۋاشىلىعىنا كەرى اسەر ەتەدى. سوندىقتان سۋ رەسۋرستارىنىڭ الەۋەتىن قالپىنا كەلتىرۋ, ونىڭ ىشىندە سۋ ۇنەمدەۋ تەحنولوگيالارىن دامىتۋ جونىندەگى جۇمىستى كۇشەيتۋ قاجەت», دەدى ج.دايراباەۆ.
وبلىستىڭ ماقتا وسىرۋشىلەرى دە ءوز پروبلەمالارىن ايتتى. كانديدات ماقتاشىلارعا ماسەلەنى شەشۋ ءۇشىن ماقتا ساتۋمەن عانا ەمەس, سونىمەن قاتار قايتا وڭدەۋمەن دە اينالىسۋدى ۇسىندى.