قازاقستان رەسپۋبليكاسى پرەزيدەنتتىگىنە كانديدات مەيرام قاجىكەن ۇگىت-ناسيحات ناۋقانى اياسىندا ساتباەۆ قالاسىندا ورنالاسقان شىعىس جەزقازعان كەنىشىنە باردى. ۇمىتكەردى «قازاقمىس» كورپوراتسياسى» جشس «جەزقازعانتسۆەتمەت» وندىرىستىك بىرلەستىگىنىڭ جۇمىسشىلار ۇجىمى قارسى الدى.
قاۋىپسىزدىك تەحنيكاسى بويىنشا نۇسقاۋلىقپەن تانىسقاننان كەيىن مەيرام قاجىكەن كۇندىزگى اۋىسىم جۇمىسشىلارىمەن بىرگە شاحتاعا ءتۇستى. كانديدات سۋ اعىزۋ ۋچاسكەسىندە جانە تاۋ-كەن مەحانيزمدەرىن جوندەۋ پۋنكتىندە بولدى. ۇمىتكەر شاحتەرلەردىڭ ەڭبەك جاعدايلارىمەن تانىسىپ, ساۋالدارىنا جاۋاپ بەردى.
ايتا كەتەرلىگى, اننەنسكي شاحتاسىنىڭ ەڭ تومەنگى نۇكتەسى 500 مەتردەن استام تەرەڭدىكتە ورنالاسقان. م.قاجىكەن ءوزىنىڭ سايلاۋالدى باعدارلاماسىنىڭ باسىم باعىتتارىن كەنشىلەرگە تەڭىز دەڭگەيىنەن 260 مەتر تومەن تەرەڭدىكتە ءتۇسىندىردى. ەڭبەككەرلەردى نەگىزىنەن الەۋمەتتىك قورعاۋ جانە زەينەتكەرلىك جاسىن تومەندەتۋ ماسەلەلەرى قىزىقتىردى.
«مەملەكەت الەۋمەتتىك ارىپتەستىك تاراپتارىنىڭ ءبىرى بولا وتىرىپ, بارىنشا قولداۋ كورسەتىپ, ونىڭ ىشىندە جاردەماقى مولشەرىن ۇلعايتۋعا ءتيىس. مەنىڭ سايلاۋالدى باعدارلامامدا ۇلتتىق زەينەتاقى جۇيەسىن جاڭعىرتۋ جەكە تارماق رەتىندە كورسەتىلگەن. مەن ايەلدەردىڭ زەينەتكە شىعۋ جاسىن ولاردىڭ ءال-اۋقاتىن ناشارلاتپاي تومەندەتۋدى, اۋىر, زياندى جانە قاۋىپتى جۇمىستارمەن اينالىساتىن قىزمەتكەرلەردىڭ ەرتە زەينەتكە شىعۋ ماسەلەسىن شەشۋدى ۇسىنامىن», دەدى م.قاجىكەن.