الفرەد حيچكوكتىڭ دىبىسسىز كينوسىنا ارنالدى
كينەماتوگرافيادان ازداعان حابارى بار ادام تاركوۆسكي مەن كونچالوۆسكيدىڭ قانداي ايىرماشىلىعى بار ەكەنىن بىلمەسە دە, ۇرەيلى كينو ءتۇسىرۋدىڭ حاس شەبەرى الفرەد حيچكوكتى جانە ونىڭ ۇرەيلى كارتينالارىنان جاقسى حاباردار بولسا كەرەك. كينوداعى قولتاڭباسى ەشكىمگە ۇقسامايتىن, بۇگىنگى تاڭدا رەجيسسەر بولعىسى كەلەتىندەرگە ساسپەنستىڭ ەڭ جارقىن ۇلگىسى رەتىندە ۇسىنىلاتىن بۇل ونەر يەسىنىڭ ءومىرى مەن تۋىندىلارى ءالى كۇنگە دەيىن ءتۇرلى اڭگىمەگە ارقاۋ.
الماتىدا 21-25 مامىر ارالىعىندا بريتاندىق كەڭەستىڭ (British Council) ۇيىمداستىرۋىمەن جانە بريتاندىق كينو ينستيتۋتىنىڭ (BFI), قازاقستانداعى «شەلل» كومپانياسىنىڭ, الماتى قالاسى اكىمدىگىنىڭ, «ارمان» كينوورتالىعىنىڭ ارالاسۋىمەن الفرەد حيچكوكتىڭ دىبىسسىز كينو اپتالىعى وتۋدە. وندا BFI مۇراعاتىنان قالپىنا كەلتىرىلگەن جانە بريتاندىق كينەماتوگرافيانىڭ ەڭ زور جەتىستىكتەرىنىڭ ءبىرى رەتىندە يۋنەسكو-نىڭ دۇنيەجۇزىلىك مۇرا تىزىمىنە ەنگەن «حيچكوك 9» جوباسىنا ەنگەن فيلمدەردىڭ 6-ۋى ۇسىنىلاتىن بولادى.
– «ءلاززات باعىنا» ارناپ كومپوزيتسيا جازعان كەزدە, مەن ستراۆينسكي جانە مەسسياننىڭ تۋىندىلارى, مايلز دەۆيستىڭ دجازى جانە كۋرتيس مەيفيلدتىڭ سوۋلى, Beastie Boys رەبى مەن دي-دجەي Shadow سەكىلدى ونەردىڭ كوپتەگەن بۇلاقتارىنان شابىت الدىم. مەن وسى جۇمىس ءۇشىن BFI-عا جانە «حيچكوك 9» جوباسىن ءتۇرلى ەلدەردە, ونىڭ ىشىندە قازاقستاندا كورسەتۋگە مۇمكىندىك بەرگەنى ءۇشىن جەكە British Council ۇيىمىنا ۇلكەن العىسىمدى بىلدىرەمىن, – دەدى اشىلۋ سالتاناتىندا سازگەر دەنيەل پاتريك كوەن.
سونىمەن 26 مامىرعا دەيىن جالعاساتىن كينواپتالىقتا بارلىق فيلمدەر سۋبتيترلەرمەن كورسەتىلمەك. «شامپان» ءفيلمى قازاقستاندىق دي-دجەي Aero-نىڭ مۋزىكالىق سۋىرىپ سالما اۋەنىمەن سۇيەمەلدەنەتىن بولادى. «مەن ارالىنان شىققان ادام», «فەرمەردىڭ ايەلى» جانە «بوپسالاۋ» فيلمدەرى بريتاندىق پيانينوشى دجون ءسۋينيدىڭ مۋزىكالىق سۇيەمەلدەۋىمەن كورسەتىلمەك. فيلمدەردىڭ كورسەتىلىمى «تسەزار» جانە «ارمان» كينوتەاترلارىندا وتەدى.
سونداي-اق, حيچكوكتىڭ دىبىسسىز كينو اپتالىعى شەڭبەرىندە الماتىعا كەلگەن دەنيەل پاتريك كوەن, كريستوفەر وستين جانە دجون سۋيني ستۋدەنتتەر مەن كاسىبي مۋزىكانتتارعا ارناپ شەبەرلىك سىنىپتارىن وتكىزۋدە. ول قۇرمانعازى اتىنداعى قازاق ۇلتتىق كونسەرۆاتورياسىنىڭ قولداۋ كورسەتۋىمەن ۇيىمداستىرىلىپ وتىر.
ايناش ەسالي,
«ەگەمەن قازاقستان».
الماتى.