گازەتىمىزدىڭ 14 مامىر كۇنگى سانىندا «بايدالانىڭ باعىن بايلامايىق» اتتى ماقالا جاريالانعان بولاتىن. وندا وبلىس ورتالىعىنا قاراستى بايدالا اۋىلىندا 700 ادام تۇراتىنى, 50 جىلدىق تاريحى بار باستاۋىش مەكتەپتىڭ جابىلۋىنا وراي رەنىش بىلدىرگەن ادامداردىڭ ارىز-شاعىمدارى ايتىلعان ەدى. اۋىل تولى – بالا-شاعا. وسىعان قاراماي شەنەۋنىكتەر اسحاناسى, دارەتحاناسى جوق دەپ مەكتەپتى جاپپاق بولدى. 2009 جىلى بايدالادا وبلىس ورتالىعىنىڭ باس جوسپارى بويىنشا مەكتەپ سالىنۋى كەرەك ەدى. اۋىل قالاعا قارايتىن بولعان. بىراق قوزعالىس بولمادى. ەندى, مىنە, بالالارى ءۇشىن مۇڭايىپ, ۋايىمدى كۇي كەشكەن اۋىلدىقتارعا قۋانىشتى حابار دا جەتتى.
ماقالاعا وراي, بىزگە وبلىستىق ءبىلىم باسقارماسىنىڭ باستىعى باقىت بەكسەيىتوۆا بىلاي دەپ جاۋاپ بەردى: «№2 كەنجەكول باستاۋىش مەكتەبىنىڭ جاڭا تالاپقا ساي كەلمەيتىنى راس, ەكىنشىدەن, الداعى ۋاقىتتا بايدالاعا جاقىن كەنجەكول اۋىلىندا 600 ورىندىق جاڭا مەكتەپ سالىنادى, تاسىمالمەن بارىپ وقۋ ءۇشىن قالالىق اكىمدىك بيۋدجەت قاراجاتىنان اۆتوبۋس الۋعا اقشا بولەر ەدى. بىراق, ەڭ باستىسى, ءبىز بايدالا اۋىلى تۇرعىندارىنىڭ باسىم كوپشىلىگى قولدايتىن ۇسىنىس-پىكىرلەرىن ەسكەرە وتىرىپ, №2 باستاۋىش مەكتەپتىڭ جابىلمايتىنىن حابارلايمىز».
ال, ءبىز ءوز تاراپىمىزدان جاڭادان كەلىپ جاتقان قالا اكىمى بولات باقاۋوۆقا بۇل جەرگە ورالمان اعايىندار كوشى كەلە جاتىر. سوندىقتان, بايدالاعا جول, مەكتەپ, بالاباقشا سالىپ, سۋ جەتكىزىپ, كلۋبتى جوندەپ بەرسە دەگەن تۇرعىندار ءوتىنىشىن تاعى دا جەتكىزگىمىز كەلەدى.
فاريدا بىقاي,
«ەگەمەن قازاقستان».
پاۆلودار وبلىسى,
بايدالا اۋىلى.