توعىز ايدىڭ تابىسى تولايىم

ۇلتتىق ەكونوميكا ءمينيسترى الىبەك قۋانتىروۆتىڭ حابارلاماسىندا ەسەپتى كەزەڭدە رەسپۋب­ليكا ەكونوميكاسىنىڭ ءوسۋ قار­قى­نى 2,8%-دى قۇراعانى ايتىل­دى. سالالار اراسىندا اۋىل شار­ۋا­شى­لىعى – 6,9%, اقپارات جانە بايلانىس – 6,7%, قۇرىلىس – 5,1%, كولىك جانە قويمالاۋ – 4,8%, وڭدەۋ ونەركاسىبى – 4,6%, ساۋدا – 4,3% جانە تاۋ-كەن ونەركاسىبى 0,1%-عا ارتىپ, وڭ ديناميكا كور­سەتكەن.

توعىز ايدى سارالاعان مينيستر قى­­زىلوردا وبلىسى نەگىزگى كاپيتالعا سالىن­عان ينۆەستيتسيا بويىنشا جوعارى ءوسىم كورسەتكەنىن اتاپ ءوتتى. ەسەپتى كەزەڭ­دە ينۆەستيتسيا تارتۋ كولەمىن 24%-عا ۇلعايت­قان وبلىس رەسپۋبليكادا كوش باسىندا تۇر.

«وڭىرلەر اراسىندا ەڭ جوعارى كور­سەتكىش قىزىلوردا, الماتى جانە اق­مولا وبلىستارى مەن الماتى, شىم­كەنت قالالارىندا بايقالدى», دەدى ءا.قۋانتىروۆ.

ەسەپتى كەزەڭدە وڭىردە قۇرى­لىس جۇ­مىستارىنىڭ كولەمى – 35,1%, ينۆەستيتسيا تارتۋ – 24,%, پايدالانۋعا بەرىلگەن تۇرعىن ۇي­لەر كولەمى – 3,5 % جانە ساۋدا كو­لەمى 2,3 پايىزعا ۇلعايعان. بۇل وڭىردە قولعا الىنعان باس­تا­ما­لار­دىڭ ناتي­جەلىلىگىن كورسە­تە­دى.

ۇكىمەت وتىرىسىندا بەرىلگەن شاعىن جانە ورتا بيزنەستى دامىتۋ ءۇشىن قولايلى جاعداي جاساۋ, كاسىپكەرلىك باستامالاردى قولداۋ, جاڭا جۇمىس ورىندارىن قۇرۋدى ىنتالاندىرۋ بويىنشا ناقتى شارالاردى پىسىقتاۋ, سونداي-اق بيۋدجەتتەن قارجىلاندىرىلاتىن ينۆەستيتسيالىق جانە ينفراقۇ­رى­لىمدىق جوبالار بو­يىن­شا قارا­جاتتى تولىق ءارى ءتيىمدى يگە­رۋدى قامتاماسىز ەتۋ تاپسىرماسىنا وراي وبلىس اكىمى نۇرلىبەك نالىباەۆ جيىن وتكىزىپ, ايماقتا مۇناي ءوندىرىسى ازايۋى سالدارىنان تومەندەگەن ونەركاسىپ سالاسىنان بولەك ماكروەكونوميكالىق ءوسىم قالىپتاسقانىن اتاپ ءوتتى.

بيىل 9 اي ىشىندە نەبارى 3 ملن توننا مۇناي وندىرىلگەن. بۇل وتكەن جىلدىڭ وسى كەزەڭىمەن سا­لىس­تىرعاندا 191,8 مىڭ تونناعا از. جىل سايىن قو­رى سار­قىلىپ كەلە جاتقان «قارا ال­تىنعا» بايلانىپ قالماي, ەكونوميكانى ءارتاراپتاندىرۋ باعىتىنداعى باس­تا­ما­لار ناتيجەسىندە وسى كەزەڭ ارالى­عىندا وڭدەۋ ونەركاسىبىندەگى ءوسىم 8,6 پايىزدى قۇرادى. جىل سوڭىنا دەيىن وبلىستىڭ ءىرى كا­سىپ­ورىن­دارى ءوندىرىس كولەمىن ارتتىرا تۇسەدى.

وڭىردە ۋران وڭدەۋمەن­ اينا­لىساتىن «بايكەن-ۋ» جشس – 15 %, اس تۇزىن ون­دىرەتىن «ارالتۇز» اق – 50 %, مۇناي سالا­سىنا قاجەتتى پوليەتيلەندى قۇبىرلار شىعاراتىن «كنك كەميكال» جشس ءونىم كولەمىن 60 پايىزعا ۇلعايتپاقشى.

وڭدەۋ سالاسىن دامىتۋعا باعىت­تالعان يندۋستريالاندىرۋ باع­دارلاماسىنىڭ ءۇشىنشى بەس­جىلدىعى اياسىندا وڭىردە جالپى قۇنى 654 ملرد تەڭگە بولاتىن 46 جوبا بويىنشا جۇمىس جۇر­گىزىلەدى.

وبلىس باسشىسى قالا اكىمى اسىلبەك شامەنوۆكە كاسىپكەرلىك جانە ونەر­كاسىپ باسقارماسى مەن ستا­تيستيكا دەپار­تا­مەنتىمەن بىر­­لەسىپ وندەۋ ونەر­كا­سىبى با­عى­تىندا جىل قورىتىن­دى­سىن­دا مە­جە­لى كورسەتكىشتەرگە جەتۋ ءۇشىن جۇمىس جۇر­گىزۋدى تاپسىردى. سونداي-اق اۋىل شارۋا­شى­لىعى ءونىمىنىڭ ناقتى كولەمى بو­­يىنشا جالاعاش اۋدانىنىڭ اكىمى اسقاربەك ەسجانوۆقا دا ءتيىستى مىندەت جۇكتەلدى.

جيىن سوڭىندا ءوڭىر باسشىسى بارلىق ينديكاتورلىق كورسەت­كىش­­تى جوعارى دەڭگەيدە ۇستاپ, كا­سىپ­كەرلىك نىساندار اشۋ ارقىلى حالىق تابىسىن كوبەيتۋ, جاڭا جوبالاردى دامىتىپ, ينۆەستيتسيا تارتۋ قارقىنىن ءالى دە كۇشەيتۋ قاجەت ەكەنىن ەسكە سالىپ, قالا, اۋدان اكىمدەرى مەن باسقارما باسشىلارىنا بىرقاتار ناقتى تاپسىرما بەردى.

قىزىلوردا وبلىسى