جىل باسىنان بەرى وبلىسقا ساپارلاعان تۋريستەر سانى بىلتىرعى وسى كەزەڭمەن سالىستىرعاندا 20 پايىزعا كوبەيگەن. ولار نەگىزىنەن تارتىلعان تەڭىز تابانىندا سەرۋەندەۋگە, قامباشتىڭ ەمدىك سۋلارىنا, كوكارال مەن بارساكەلمەس قورىعىنا قىزىعۋشىلىق تانىتىپ وتىر. كەلۋشىلەر اراسىندا وڭىردەگى ەجەلگى قالاشىقتاردى ارالاپ, تاريحىن تاني تۇسكىسى كەلەتىندەر دە كوپ.
ارال اۋدانىنداعى ونەركاسىپتىك نىساندار دا تۋريستەر نازارىن اۋدارىپ وتىر. ولارعا ىڭعايلى بولۋى ءۇشىن قامباش كولىنە كىرمە جولدار جوندەلىپ, 100 ورىندىق اۆتوتۇراق سالىندى. اۋداندا جول تالعامايتىن كولىكتەرمەن سافاري جاساۋ, تۇيەلەرمەن سەرۋەندەۋ باعىتىنداعى ەكوجوبالار ازىرلەنىپ جاتىر.
– جاقىن جانە الىس شەتەلدەردەن كەلگەندەر اراسىندا بىزدەگى 9 بالىق وڭدەۋ زاۋىتىنىڭ جۇمىسىنا قىزىعۋشىلار بار, – دەيدى ارال اۋداندىق كاسىپكەرلىك, ونەركاسىپ جانە تۋريزم ءبولىمىنىڭ مامانى دانيار قارجاۋباەۆ. – سونداي-اق سۋى ءمولدىر كامباش كولىنە باراتىندار كوپ. كول قازىر قازاقستانداعى 50 ۇزدىك تۋريستىك نىسان قاتارىنا ەندى. جىل سايىن وسى دەمالىس اۋماعىنا 100 مىڭعا جۋىق تۋريست كەلەدى.
وڭىردە مەديتسينالىق جانە ەكوتۋريزمدى دامىتۋعا دەن قويىلىپ وتىر. جىل باسىنان بەرى سىرعا كەلگەن 50 مىڭنان استام ادامنىڭ 20 مىڭى مەديتسينالىق مەكەمەلەردى, قالعاندارى ەكولوگيالىق جانە عارىشتىق ەكسكۋرسيالاردى تاڭداعان. بىراق وسى سۇرانىسقا يە بولىپ وتىرعان سوڭعى باعىتتى تولىق جۇزەگە اسىرۋ ءۇشىن بىرقاتار ماسەلە شەشىمىن تابۋعا ءتيىس.
– شەتەلدىك تۋريستەردىڭ بايقوڭىرعا كەلۋىنە رۇقسات بەرەتىن قۇجاتتاردى تەكسەرۋگە 55 كۇن كەتەدى, – دەيدى وبلىستىق كاسىپكەرلىك جانە ونەركاسىپ باسقارماسىنىڭ ءبولىم باسشىسى مۇحتار جەتىلگەنوۆ. – قازىر رەسەيلىك ارىپتەستەرمەن وسى مەرزىمدى 15-20 كۇنگە دەيىن قىسقارتۋدى پىسىقتاپ جاتىرمىز. قازاقستاندىق تۋرفيرمالار ءۇشىن عارىش ايلاعىنا كىرۋ مۇمكىندىگى شەكتەۋلى ەكەندىگى دە كوپ جۇمىسقا كەدەرگى بولىپ وتىر. بۇل ماسەلە ەكى ەل ۇكىمەتى دەڭگەيىندە قارالاتىن بولادى.
قىزىلوردا وبلىسى