سەمەيدەگى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە «مەكتەپ: جەكە تۇلعانى تاربيەلەۋ» وبلىستىق سەمينار-پراكتيكۋمى وتكىزىلىپ, ەكى كۇنگە جالعاسقان ءىس-شارادا اباي وبلىسى ءبىلىم باسقارماسىنىڭ, قالالىق جانە اۋداندىق ءبىلىم بولىمدەرىنىڭ ماماندارى, مەكتەپ ديرەكتورلارىنىڭ تاربيە ءىسى جونىندەگى ورىنباسارلارى, كىتاپحاناشىلار قاتىسىپ, ءبىلىم بەرۋدىڭ زاماناۋي ۇردىسىنە قانىقتى.
اتالعان جيىندى ۇيىمداستىرۋداعى كوزدەلگەن ماقسات – نازارباەۆ زياتكەرلىك مەكتەپتەرىنىڭ تاربيە جۇيەسىندەگى تاجىريبەمەن ءبولىسۋ, دەيدى ۇيىمداستىرۋشىلار.
«نازارباەۆ زياتكەرلىك مەكتەپتەرى جەكە تۇلعانى تاربيەلەۋ باعىتىندا ءتۇرلى باعدارلامالار مەن جوبالاردى جۇزەگە اسىرىپ كەلە جاتىر. سولاردىڭ ىشىندە «100 ءان», «100 كۇي», «100 كىتاپ», «بەرىك وتباسى», «تۋعان ەلگە تاعزىم», «دانالىق بەيسەنبى» سىندى جوبالار مەن «شاڭىراق» قاۋىمداستىعىنىڭ اتقارىپ وتىرعان جۇمىستارى ءار وقۋشىنى ەل مەن جەردى سۇيۋگە, ۇلتتىق ونەر مەن قۇندىلىقتاردى باعالاۋعا, ۇلكەنگە قۇرمەتپەن قاراۋعا تاربيەلەيدى.
وسى سەمينار-پراكتيكۋمدا جىلدار بويى جينالعان تاجىريبەمىزبەن جاڭادان قۇرىلعان اباي وبلىسىنىڭ ۇستازدارىمەن بولىستىك. ەكىجاقتى تىعىز قارىم-قاتىناس ارقىلى ەلىمىزدىڭ كەلەشەگى جاستارعا ساپالى ءبىلىم عانا بەرىپ قويماي, سانالى تاربيە بەرسەك ۇتارىمىز كوپ. شاراعا قاتىسقان ءار ۇستاز وزىنە قاجەتتى, پايدالى اقپاراتتى مەڭگەرىپ, تاجىريبەدە پايدالاناتىنىنا سەنىمدىمىن», دەدى نازارباەۆ زياتكەرلىك مەكتەپتەرىن دامىتۋ دەپارتامەنتى ديرەكتورىنىڭ ورىنباسارى ايدا اعادىل.
سەمينار-پراكتيكۋمنىڭ بارىسىندا پاۆلودار, وسكەمەن قالالارىنداعى زياتكەرلىك مەكتەپ ۇستازدارىنىڭ ءتۇرلى تاقىرىپتا ءار پانگە كىرىكتىرىلگەن ساباقتارى ءوتتى.
«تاربيە سالاسىنداعى ءتۇرلى جوبالارىمىز قالالىق مەكتەپتەرگە بۇعان دەيىن دە تانىستىرىلىپ, ەكىجاقتى بىرلەسكەن جۇمىستار ىسكە اسىرىلىپ ءجۇردى. ولارمەن جىل بويى بىرنەشە مارتە كەزدەسىپ, ءالى تاجىريبە الماسامىز. ەندى تاجىريبەمەن ءبولىسۋ اۋماعىن كەڭەيتىپ, اۋىل مەكتەپتەرىنە دە بىلگەنىمىزبەن ءبولىسۋدى قولعا الدىق. سەمينار-پراكتيكۋمگە قاتىسۋعا 200-دەن استام ۇستاز نيەت ءبىلدىردى. ءبىز مۇنىمەن عانا توقتاپ قالمايمىز. وسى باعىتتاعى جۇمىس الداعى ۋاقىتتا دا جۇيەلى جۇرگىزىلەدى», دەدى سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ديرەكتورىنىڭ ورىنباسارى لاريسا ابىلقاسىموۆا.
سەمينار-پراكتيكۋمگە ءۇرجار اۋدانىنىڭ ماقانشى اۋىلىنان كەلگەن جاس ۇستاز دارحان مامىتحانوۆ بۇل باسقوسۋدىڭ تاجىريبەلىك پايداسىن ايتتى.
ء«ار كۇنى جاڭالىققا تولى قازىرگى قوعامدا بالا تاربيەسى ەرەكشە نازار اۋدارۋدى قاجەت ەتەدى. وسى رەتتە مەكتەپتىڭ دە ءرولى ەرەكشە. قازىر وقۋشىنى ەرتەدەن كەلە جاتقان ءداستۇرلى وقۋ پروتسەسىمەن تاربيەلەۋ مۇمكىن ەمەس. جاڭاشا كوزقاراس, جاڭا باعىت كەرەك. مىنە, وسى باعىتتى بۇگىنگى سەمينار-ترەنينگتەن كورىپ وتىرمىن. وقۋشىنى ازاماتتىق كوزقاراسى قالىپتاسقان, ۇلتجاندى, پاتريوت بولىپ وسۋىنە ىقپال ەتەتىن ءتۇرلى جوبالاردى ۇيرەنىپ, ءوز مەكتەبىمىزدە قولدانىسقا ەنگىزۋدى جوسپارلاپ وتىرمىن», دەدى اسەت نايمانباي اتىنداعى ورتا مەكتەپ ديرەكتورىنىڭ تاربيە ءىسى جونىندەگى ورىنباسارى.
جوعارى دەڭگەيدە ۇيىمداستىرىلعان سەمينار-پراكتيكۋم اۋىل مەكتەبى ۇستازدارىنىڭ تاجىريبە الماسىپ, تاربيە سالاسىنداعى بىلىمدەرىن مولايتۋعا سەپتىگى تيەتىن ءتيىمدى الاڭعا اينالدى.
اباي وبلىسى