Telegram-ارنالاردىڭ بىرىندە ەر ادامدى ۇرىپ-سوققان ۆيدەو جاريالاندى. وقيعا قازاقستاندا بولعان دەگەن بولجام بار, دەپ حابارلايدى Egemen.kz Stopfake.kz-كە سىلتەمە جاساپ.
ۆيدەونىڭ تۇسىندىرمە سوزىندە زارداپ شەگۋشى – رەسەي فەدەراتسياسىنان كەلگەن ميگرانت, ال شابۋىلداۋشىلار – قازاقستان ازاماتتارى ەكەنى جازىلعان. ۆيدەو بويىنشا جانجالعا ۇلتارالىق الاۋىزدىق سەبەپ بولعان. قر ءىىم بۇل جاعدايعا قاتىستى تۇسىنىكتەمە بەردى.
ۆەدومستۆونىڭ حابارلاۋىنشا, ۆيدەونىڭ قازاقستاندا تۇسىرىلگەنىنە دالەل جوق.
– قازىرگى ۋاقىتتا ىشكى ىستەر ورگاندارى وسى ۆيدەو بويىنشا تەكسەرۋ ءىس-شارالارىن جۇرگىزۋدە. سونىمەن قاتار پوليتسياعا ءوتىنىش تۇسكەن جوق, – دەپ ءتۇسىندىردى قر ءىىم ءباسپاسوز قىزمەتى.
بۇل كادرلاردى قازنەت پايدالانۋشىلارى دا تالقىلاۋدا. مىسالى, بلوگەر ۇلان ابىشەۆ ۇلتارالىق الاۋىزدىقتى قوزدىرۋعا باعىتتالعان بۇل ۆيدەونى قويىلىم دەپ سانايدى.
ء«تۇرلى اقپاراتتىڭ, فەيكتەردىڭ كوپ تارالۋى, سايتتارعا جاسالعان DDoS-شابۋىلدار – بىرەۋلەر قازاقستانعا قاتىستى اقپاراتتىق ناۋقان جۇرگىزىپ جاتقانعا ۇقسايدى», دەپ جازدى ول ءوزىنىڭ Facebook پاراقشاسىندا.