سىرداعى قالالار مەن ەلدى مەكەندەردى گازداندىرۋ باعىتىندا ءبىرشاما شارۋانىڭ باسى قايىرىلدى. بۇگىندە ايماقتاعى ورتالىقپەن قاتار «كوگىلدىر وتىن» تۇتىنىپ وتىرعان اۋىلدار دا كوبەيگەن.
پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا حالىقتى جۇمىسپەن قامتۋ ماسەلەسى قارالىپ, ەڭبەك نارىعىنداعى احۋالدى بايانداعان ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا تۇراقتى جۇمىس ورىندارىن قۇرۋ كورسەتكىشى بويىنشا قىزىلوردا وبلىسى ايماقتار اراسىندا ۇزدىكتەر قاتارىندا ەكەنىن جەتكىزدى.
«قىزىلوردا وبلىسىنىڭ وتە جاقسى ناتيجەگە قول جەتكىزگەنىن اتاپ وتكەن ءجون. قىزىلوردا وبلىسىنداعى ەڭ جوعارى كورسەتكىش – 88%, ونىڭ ىشىندە 84 پايىزى زەينەتاقى اۋدارىمىمەن راستالعان», دەدى مينيستر.
وبلىس اكىمى نۇرلىبەك نالىباەۆ ۇكىمەت باسشىسى ءاليحان سمايىلوۆقا ونلاين رەجىمدە وسى باعىتتا اتقارىلعان جۇمىستار رەتىن بايانداپ, بيىل وڭىردە 30 مىڭنان اسا جاڭا جۇمىس ورنىن قۇرۋ جوسپارلانعانىن, بۇگىندە 21,8 مىڭ جاڭا جۇمىس ورنى اشىلعانىن مالىمدەدى.
– ۇلتتىق جوبالار شەڭبەرىندە 3,2 مىڭ ادام جۇمىسقا ورنالاستىرىلىپ, ولاردىڭ زەينەتاقى اۋدارىمدارى 84 پايىزدى قۇرادى. «كاسىپكەرلىكتى دامىتۋ ۇلتتىق جوباسىنا» قاتىسۋشىلار سانى – 41,2 مىڭ ادام. ونىڭ ىشىندە 9,2 مىڭى – بوس جۇمىس ورنىنا, 12,9 مىڭى سۋبسيديالاناتىن جۇمىس ورىندارىنا ورنالاستىرىلدى. 2,3 مىڭ تۇرعىن قايتارىمسىز گرانت الىپ, جەكە كاسىبىن اشتى. قالعان 16,8 مىڭى ونلاين كۋرستار مەن قىسقامەرزىمدى وقۋ كۋرستارىنا جولدانعان.
مەملەكەت باسشىسىنىڭ جىل سايىن 10 مىڭ ادامعا شاققاندا كەمىندە 100 جۇمىس ورنىن قۇرۋ تاپسىرماسىنا سايكەس بيىل وبلىستا 4 587 جۇمىس ورنىن قۇرۋ جوسپارلانعان. توعىز اي قورىتىندىسىندا بۇل 5 691-گە جەتىپ, كورسەتكىش 124,1 پايىزعا ورىندالىپ وتىر, – دەدى ن.نالىباەۆ.
سونداي-اق 100 مىڭ جاستى جۇمىسپەن قامتۋ تاپسىرماسىنا سايكەس كەلەسى جىلى ايماقتا 6 مىڭ ادامدى جۇمىسقا ورنالاستىرۋ جوسپارلانۋدا. ونىڭ ىشىندە 3 مىڭ ازامات بوس جۇمىس ورىندارىنا بارسا, 3 مىڭ ادام جۇمىسپەن قامتۋدىڭ بەلسەندى شارالارىنا تارتىلادى. بۇل جاستار اراسىنداعى جۇمىسسىزدىق دەڭگەيىن 3,9 پايىزعا تومەندەتەدى.
ايماقتا جاڭا جۇمىس ورىندارىن قۇرۋ, جۇمىسپەن قامتۋ, قىسقارتۋدىڭ الدىن الۋ جانە جالاقى كولەمىن 50%-عا دەيىن ارتتىرۋ باعىتىندا 52 ءىرى جانە ورتا كاسىپورىنمەن مەموراندۋم جاسالعان.
وبلىس اكىمى حالىقتىڭ ءال-اۋقاتىن كوتەرۋ, تۇرمىس ساپاسىن جاقسارتۋ باستى مىندەت ەكەنىن اتاپ ءوتىپ, ونىڭ ورىندالۋى تۇراقتى باقىلاۋدا بولاتىندىعىن جەتكىزدى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا, اۋداندار مەن قىزىلوردا قالاسىنىڭ اكىمدەرىنە جوسپاردى ورىنداۋ ءۇشىن ناقتى تاپسىرمالار بەرىلدى.