وسى جىلدىڭ توعىز ايىندا اۋىل شارۋاشىلىعىنىڭ جالپى ءونىمىنىڭ كولەمى 6,9%-عا ۇلعايىپ, 6,8 ترلن تەڭگەنى قۇرادى. بۇل تۋرالى اۋىل شارۋاشىلىعى ءمينيسترى ەربول قاراشوكەەۆ ۇكىمەت وتىرىسىندا مالىمدەدى, دەپ حابارلايدى Egemen.kz.
«بۇل ءوسىم وسىمدىك شارۋاشىلىعى ءونىمىن ءوندىرۋ كولەمىنىڭ 11%-عا جانە مال شارۋاشىلىعى ءونىمىنىڭ 1,1%-عا ۇلعايۋى ەسەبىنەن قامتاماسىز ەتىلدى», دەپ ءتۇسىندىردى ەربول قاراشوكەەۆ.
ءمينيستردىڭ ايتۋىنشا, بۇگىندە ءداندى داقىلداردى جيناۋ ناۋقانى اياقتالۋ ساتىسىندا (اقمولا, اقتوبە, شىعىس قازاقستان, قاراعاندى, قوستاناي وبلىستارىندا اياقتالدى).
«10 قازانداعى جاعداي بويىنشا وبلىس اكىمدىكتەرىنىڭ جەدەل دەرەكتەرىنە قاراعاندا, 15,9 ملن گا استىق جينالدى نەمەسە بارلىق استىق القابىنىڭ 99,5%, ورتاشا ونىمدىلىگى 13,5 تس/گا بۋنكەرلىك سالماقتا 21,6 ملن توننا استىق باستىرىلدى», دەپ ناقتىلادى ە.قاراشوكەەۆ.