كەيىنگى جىلدارى ۇلتتىق ۆولونتەرلەر جەلىسى قۋاتتى ۇيىمداردىڭ بىرىنە اينالدى. ەلىمىزدە بولىپ جاتقان كەز كەلگەن ماڭىزدى شارۋانىڭ باسى-قاسىندا ەرىكتىلەر جۇرەدى. الىسقا بارماي-اق پاندەميا كەزىندە دارىگەرلەرمەن بىرگە «مايداننىڭ» العى شەبىنەن تابىلعانىن اتاپ وتكەن ءجون.
جۋىردا ۇلتتىق ۆولونتەرلىك جەلىسى ۆولونتەرلىك ۇيىمدارىنىڭ جينالىسى ءوتىپ, جاستار الداعى پرەزيدەنتتىك سايلاۋ جونىندە ءوز ويلارىن ورتاعا سالدى. جاستار ەلىمىزدە ۆولونتەر جىلىنىڭ بەكىتىلۋىنە, وزگە دە باستامالارىنىڭ جۇزەگە اسۋىنا مەملەكەت باسشىسى قاسىم-جومارت توقاەۆتىڭ ەڭبەگى زور ەكەنىن ايتا كەلە, ونى جاڭا مەرزىمگە پرەزيدەنتكە ۇمىتكەر رەتىندە ۇسىنۋ باستاماسىن كوتەردى.
– ۆولونتەرلىكتىڭ دامۋىندا ەل پرەزيدەنتى قاسىم-جومارت توقاەۆتىڭ قوسقان ەلەۋلى ۇلەسىن اتاپ ءوتۋ ماڭىزدى. ونىڭ تىكەلەي قولداۋى ناتيجەسىندە حالىقارالىق جانە رەسپۋبليكالىق دەڭگەيلەردە ۆولونتەرلىك قىزمەتتى دامىتۋ باستامالارى جانە بىرقاتار ستراتەگيالىق ماڭىزدى قۇجات قابىلداندى. پرەزيدەنت 2020 جىلدى «ۆولونتەر جىلى» دەپ جاريالاۋ باستاماسىن قولدادى. بۇل شەشىم وتە ماڭىزدى ءرول اتقاردى. سەبەبى COVID-19 پاندەمياسىمەن كۇرەستە مەديتسينا جانە وزگە دە قىزمەتتەرمەن بىردەي الدىڭعى قاتاردا ۆولونتەرلەر دە بولدى. بۇل ۆولونتەرلىك جوبالار ءۇشىن گرانتتاردى دامىتۋعا, پاندەميا كەزىندە كورسەتكەن ازاماتتىق بەلسەندىلىگى ءۇشىن «حالىق العىسى» مەملەكەتتىك مەدالىن تاعايىنداۋعا ىقپالىن تيگىزدى.
پرەزيدەنت ۆولونتەرلەرگە «ىزگى نيەتى مەن تازا ار-وجدانى بار اسىل ادامدار» رەتىندە سەنىم ارتادى. قازاقستان پرەزيدەنتىنە دەگەن سەنىم مانداتىمىز ەلىمىزدىڭ كوركەيۋى مەن حالقىمىزدىڭ مۇددەسى ءۇشىن باعىتتالعان مەملەكەتتىك باعدارلامالار مەن اۋقىمدى رەفورمالاردى جۇزەگە اسىرۋعا مۇمكىندىك بەرەتىنىنە سەنىمدىمىز. ءبىزدىڭ پرەزيدەنتىمىز ۆولونتەرلىك قوزعالىستى قولدايدى, ەندەشە, ءبىز دە ءوز پرەزيدەنتىمىزدى قولدايىق! – دەدى ۇلتتىق ۆولونتەرلىك جەلىسىنىڭ توراعاسى ۆەرا كيم.
كەيىنگى جىلدارى ەلىمىزدە ۆولونتەرلىك قوزعالىسى جالپىۇلتتىق ماسشتابقا يە بولعانىن اتاپ وتكەن ءجون. اينالاداعى ءومىردى جاقسى جاققا وزگەرتۋگە, كومەك كورسەتۋگە جانە مەيىرىمدىلىك جاساۋعا مۇمكىندىگى بار ەكەندىگىن سەزىپ جاتقان قازاقستاندىقتاردىڭ سانى ارتىپ كەلەدى. بۇگىندە ەلىمىزدە 200 مىڭنان استام ۆولونتەر جۇمىلدىرىلعان 600-دەن استام ۆولونتەرلىك ۇيىم جۇمىس اتقارىپ جاتىر.