ساناۋلى كۇندەردەن كەيىن, دالىرەك ايتساق, 12-14 قازاندا استاناداعى ەكسپو حالىقارالىق كورمە ورتالىعىندا KazAgro/KazFarm حالىقارالىق كورمەسى ۇيىمداستىرىلادى. وعان الەمنىڭ 20 ەلىنەن 300-دەن استام اگروونەركاسىپتىك كومپانيا قاتىسادى دەپ كۇتىلۋدە.
KazAgro/KazFarm ورتالىق ازياداعى ەڭ ءىرى اۋىلشارۋاشىلىق كورمەلەرىنىڭ ءبىرى جانە اگروونەركاسىپ سالاسىنداعى الەمدىك يننوۆاتسيالاردى تانىستىرۋدىڭ جەتەكشى كاسىبي الاڭى بولىپ سانالادى. مۇنداعى KazAgro دەگەنىمىز – تۇقىم تاڭداۋدان باستاپ, دايىن ءونىم مەن زاماناۋي تەحنولوگيالاردى قامتيتىن وسىمدىك شارۋاشىلىعى كورمەسى. ال KazFarm – مال شارۋاشىلىعى مەن ەت-ءسۇت ونەركاسىبىنە ارنالعان كورمە. بۇل جەردە ەمبريونداردان باستاپ دايىن ونىمدەر مەن قىزمەتتەرگە دەيىن تولىق قامتىلعان.
KazAgro/KazFarm-2022 نارىققا الەمدىك جەتەكشى اگروكونتسەرندەردىڭ سوڭعى ۇلگىدەگى اۋىلشارۋاشىلىق تەحنيكاسى مەن جابدىقتارىن, يننوۆاتسيالىق تەحنولوگيالاردى جانە اگروونەركاسىپ سالاسىنا اگرو-عىلىمنىڭ سوڭعى الەمدىك جەتىستىكتەرىن ەنگىزۋگە ىقپال ەتەتىن اۋىل شارۋاشىلىعى سەكتورىن دامىتۋ باعدارلامالارىن ۇسىنادى.
ءىس-شارانى ۇيىمداستىرۋشى ExpoGroup كومپانياسىنىڭ ديرەكتورى شولپان قوجاباەۆانىڭ ايتۋىنشا, حالىقارالىق كورمە كومپانياسى قازاقستاندا ءارتۇرلى ەلدەردىڭ 300-دەن استام اگروونەركاسىپتىك كومپانيالارىن بىرىكتىرەتىن كورمەلەردى 10 جىلدان بەرى وتكىزىپ كەلەدى. بيىل كورمەگە الەمنىڭ 20-دان استام ەلىنەن كومپانيالار مەن ۇيىمدار قاتىسادى دەپ كۇتىلۋدە. ءىس-شارانىڭ باس دەمەۋشىسى – «روستسەلماش» كومپانيالار توبى.
– جالپى جوبا فەرمەرلەرگە ءۇش كۇن ىشىندە ءبىر نىساندا بارلىق بيزنەس شارانى جۇزەگە اسىرۋعا مۇمكىندىك بەرەدى. كورمەنىڭ جالپى اۋدانى شامامەن 20 مىڭ شارشى مەتردى قۇرايدى. 2021 جىلى ءىس-شارا رەكوردتىق 33 مىڭ قاتىسۋشىنى تارتتى. ولاردىڭ قاتارىندا قازاقستاندىق فەرمەرلەر, كوتەرمە جانە بولشەك ساۋدا وكىلدەرى, يمپورتتاۋشىلار مەن ەكسپورتتاۋشىلار, اۋىل شارۋاشىلىعى مينيسترلىگى جانە الىس-جاقىن شەتەلدەردىڭ باسقا دا ۋاكىلەتتى مەملەكەتتىك ورگاندارىنىڭ وكىلدەرى, سالا ماماندارى مەن عىلىمي-زەرتتەۋ ينستيتۋتتارىنىڭ عالىمدارى بار, – دەيدى ش.قوجاباەۆا.
كورمە باعدارلاماسىندا جەتەكشى سالا ماماندارىنىڭ, اۋىل شارۋاشىلىعى كاسىپورىندارى مەن يننوۆاتسيالىق ورتالىقتاردىڭ باسشىلارىنىڭ قاتىسۋىمەن سەمينارلار, پرەزەنتاتسيالار ۇيىمداستىرۋ, ىسكەرلىك ميسسيالار مەن قازاقستاندىق جانە شەتەلدىك كومپانيالار اراسىندا مەموراندۋمدارعا قول قويۋ قاراستىرىلعان.
– قاتىسۋشىلار مەن كورمە قوناقتارى اگرونومدارعا ارنالعان جاڭا قوسىمشانىڭ تۇساۋكەسەرىنە كۋا بولادى. مال شارۋاشىلىعىنا ارنالعان سوڭعى جاڭالىقتارمەن تانىسادى. اۋىل شارۋاشىلىعىنا ارنالعان جاڭا كاماز كولىكتەرى مەن ماشينالارىنىڭ تۇساۋكەسەرى وتەدى. شەتەل تەحنولوگياسىن كورسەتۋ, جاڭا ونىمدەردى تانىستىرۋ كوزدەلىپ وتىر. قازاقستانداعى اۋىلشارۋاشىلىق تەحنيكاسىنىڭ العاشقى ىشكى نارىعىنىڭ تۇساۋكەسەرى, سونىمەن قاتار ءارتۇرلى ينتەراكتيۆتى ءىس-شارالار, بايقاۋلار مەن شەبەرلىك سىنىپتارى ۇيىمداستىرىلادى, – دەدى ول.
سونىمەن قاتار كورمەلەر بارىسىندا اۋىل شارۋاشىلىعى مينيسترلىگى ەلىمىزدىڭ بارلىق وڭىرىنەن ۇزدىك جانە وزىق وسىمدىك شارۋاشىلىعىنداعى مامانداردى ماراپاتتاي وتىرىپ, قازاقستان سەلەكتسيونەرلەرىنىڭ II سلەتىن وتكىزەدى. سونداي-اق كورمەلەر تاريحىندا العاش رەت تاڭداۋلى بۇقالاردىڭ تۇقىمدىق ماتەريالدارى باسساۋداعا شىعارىلادى.