ساۋد ارابياسى قاجىلىققا باراتىندارعا ارنالعان Nusuk پلاتفورماسىن ىسكە قوستى. اتالعان سايتتىڭ رەسمي تانىستىرىلىمى العاش رەت استانا قالاسىندا ءوتتى. سالتاناتتى راسىمگە ساۋد ارابياسى قاجىلىق جانە ۋمرا ءمينيسترى تاۋفيك ءال-رابيا ارنايى كەلدى.
بۇل ەلەكتروندى پلاتفورما بەس پارىزىن ورىنداۋعا اسىققان مۇسىلماندارعا كومەكتەسۋ ماقساتىندا ازىرلەنگەن. Nusuk – ساۋد ارابياسىنىڭ Vision 2030 ستراتەگياسىنىڭ Pilgrim Experience («قاجىلىق تاجىريبەسى») باعدارلاماسىنىڭ ءبىر باعىتى.
پلاتفورمادا قاجىلىققا كەلگەندەرگە ارنالعان اقپارات پەن كەڭ اۋقىمدى قىزمەت جيناقتالعان. سونداي-اق قاجىلىق ءراسىمىن وتەۋ كەزىندە كورسەتىلەتىن قىزمەتتىڭ ساپاسىن ارتتىرۋعا ۇلەس قوسپاق. بۇدان بولەك, ۆيزالار, رۇقساتتار, برونداۋ ۇدەرىستەرى مەن راسىمدەرىن جەڭىلدەتۋ سەكىلدى ماسەلەلەر ەسكەرىلگەن.
قاجىلىق جانە ۋمرا ءمينيسترى, Pilgrim Experience Program باعدارلاماسى جونىندەگى كوميتەتىنىڭ توراعاسى تاۋفيك ءال-ءرابيانىڭ ايتۋىنشا, Nusuk پلاتفورماسى جاڭا تەحنولوگيالاردى قولدانۋ ارقىلى قاجىلىققا كەلگەندەرگە كورسەتىلەتىن قىزمەتتەردىڭ ساپاسىن جاقسارتۋعا ۇلەس قوسادى. سونىمەن قاتار Nusuk بىرنەشە مەملەكەتتىك مەكەمەمەن بىرلەسىپ راسىمدەردى جەڭىلدەتىپ, بەس پارىزىن وتەۋشىلەردىڭ رۋحاني ساپارلارىن وڭاي ءارى جايلى وتكىزۋگە مۇمكىندىك بەرەدى.
ساۋد ارابياسى تۋريزم ءمينيسترى, تۋريزم جونىندەگى باسقارماسىنىڭ ديرەكتورلار كەڭەسىنىڭ توراعاسى احمەد ءال حاتيب Nusuk پلاتفورماسىنىڭ Pilgrim Experience Program باعدارلاماسى شەڭبەرىندەگى ماڭىزىنا توقتالدى.
جالپى, كەيىنگى جىلدارى قازاقستان مەن ساۋد ارابياسى اراسىنداعى قارىم-قاتىناس نىعايىپ كەلەدى. ماسەلەن, الداعى ۋاقىتتا ەكى ەلدى بايلانىستىراتىن اۋە باعىتىنىڭ سانىن 4-تەن 8-گە ارتتىرۋ كوزدەلىپ وتىر. مادەني باعىتتاعى ىنتىماقتاستىقتىڭ دا ءورىسى كەڭ.