قىزىلورداعا جۇمىس ساپارىمەن كەلگەن مادەنيەت جانە سپورت ءمينيسترى داۋرەن اباەۆ وبلىس اكىمى نۇرلىبەك نالىباەۆپەن بىرگە بىرقاتار مادەني نىساندى ارالاپ, سپورت كەشەندەرىنىڭ جۇمىسىمەن تانىستى.
مينيستر بارعان «مۇز ايدىنى» كەشەنىندە مۇز ايدىنىنان بولەك, ۆولەيبول, باسكەتبول, جەكپە-جەك ادىستەرىنە باۋليتىن وقۋ-جاتتىعۋ زالى, سپورتتىق بيلەرگە ارنالعان حورەوگرافيالىق سىنىپ بار. قازىر مۇندا 7 سپورت ءتۇرى بويىنشا 615 ادام جاتتىعادى.
كەلەسى نىسان – «تارلان» سپورت كەشەنىندە بوكس, كۇرەس, تاەكۆوندو, اۋىر اتلەتيكا بويىنشا 350 ادام جاتتىعىپ, 100 جاتتىقتىرۋشى جۇمىس ىستەيدى. اشىلعانىنا 6 جىل بولعان كەشەندە قازاقستاننىڭ 20 سپورت شەبەرى, 78 سپورت شەبەرىنە ۇمىتكەر دايىندالدى. كەشەندە وبلىس اكىمى بالالار جىلى اياسىندا وڭىردە دەمەۋشىلەر كومەگىمەن 80 ويىن الاڭىن سالۋ باستالعانىن جەتكىزدى.
مينيستر ۇلتتىق سپورتتى زامانعا ساي جاڭعىرتۋ ماقساتىندا « ۇلى دالا جورىعى» اتتى جاڭا جوبا قولعا الىنعانىن ايتىپ, مارافونعا بەلسەندىلىك تانىتىپ, جانكۇيەر بولۋعا شاقىردى. 1200 شاقىرىمدىق مارافون-بايگە ەلوردادان باستاپ اقمولا, قاراعاندى, ۇلىتاۋ, قىزىلوردا جانە تۇركىستان وبلىستارىن قامتىماق.
وسى كۇنى داۋرەن اباەۆ 62 مىڭنان اسا جادىگەر جيناقتاعان وبلىستىق تاريحي-ولكەتانۋ مۋزەيىندە دە بولدى. ءا.تاجىباەۆ اتىنداعى وبلىستىق امبەباپ عىلىمي كىتاپحانادا وبلىس تۇرعىندارىمەن كەزدەسۋدەن كەيىن باق وكىلدەرىنە سۇحبات بەردى.
– جۇرتشىلىقپەن جۇزدەسۋدە كوپتەگەن ماسەلە كوتەرىلدى. ولاردى جەرگىلىكتى اكىمدىكپەن بىرلەسە شەشۋ جولدارىن قاراستىرامىز. بىرلەسكەن جوبالار قاتارىندا بيىل ساحنا بۇلب ۇلى روزا باعلانوۆانىڭ 100 جىلدىعىنا وراي وتكەن شارالاردى اتاپ وتەر ەدىك. تاريحي-مادەني ەسكەرتكىشتەرگە باي وبلىستا كورشىلەس وڭىرلەرمەن بايلانىستىرا وتىرىپ, ءتۋريزمدى دامىتۋعا بولادى, – دەدى مينيستر.
وسىدان كەيىن ۆەدومستۆو باسشىسى بىرقاتار تۇرعىندى جەكە قابىلداپ, ماسەلەلەرىن تىڭدادى. مينيستر ساپارى بايقوڭىر قالاسىندا جالعاستى.
قىزىلوردا وبلىسى