پارلامەنت سەناتى توراعاسىنىڭ ورىنباسارى اسقار شاكىروۆ حەلسينكي قالاسىندا وتكەن «وزگەرىس ۇستىندەگى ەۋروپالىق قاۋىپسىزدىك كەلبەتىندەگى ەقىۇ جانە ونىڭ پارلامەنتتىك اسسامبلەياسىنىڭ ءرولى» تاقىرىبىنداعى حالىقارالىق كەزدەسۋگە قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋگە قاتىسۋشىلار قازىرگى زامانعى حالىقارالىق كۇن تارتىبىندەگى ەقىۇ-نىڭ ءرولى مەن ۇيىمنىڭ ءوز الەۋەتىن ىسكە اسىرۋداعى كەدەرگىلەرگە بايلانىستى وزەكتى ماسەلەلەردى تالقىلادى. ەقىۇ-نىڭ ىشكى رەفورماسىنا ەرەكشە نازار اۋدارىلدى.
بۇل ۇيىمنىڭ 2025 جىلعى مەرەيتويلىق سەسسياسىنا دايىندىق كەزەڭى بولىپ تابىلاتىن «ارەكەتكە شاقىرۋ - حەلسينكي+50» پروتسەسىن دامىتۋ شاراسى بولىپ تابىلادى. سەسسيادا بولاشاقتاعى ەۋروپالىق قاۋىپسىزدىك كەلبەتىنىڭ كورىنىسى مەن ونداعى پارلامەنتتىك اسسامبلەيانىڭ ءرولىن كورسەتەتىن قورىتىندى قۇجات قابىلدانادى.
وسى پروتسەسس اياسىندا اسسامبلەيانىڭ جۇمىس توبىنىڭ قۇرامىنداعى سەنات توراعاسىنىڭ ورىنباسارى 2010 جىلى قابىلدانعان استانا دەكلاراتسياسىنىڭ رولىنە ارىپتەستەرىنىڭ نازارىن اۋداردى. دۇربەلەڭگە تولى گەوساياسي جاعدايدا دا ونىڭ ماڭىزى ساقتالىپ كەلەدى جانە حالىقارالىق قوعامداستىقتىڭ ەقىۇ ايماعىندا بەيبىتشىلىك پەن قاۋىپسىزدىككە قول جەتكىزۋ جونىندەگى كۇش-جىگەرىنە زور ۇلەس قوسادى.
شاراعا ەقىۇ پارلامەنتتىك اسسامبلەياسىنىڭ كەڭەيتىلگەن بيۋروسىنىڭ مۇشەلەرى, فينليانديا پارلامەنتىنىڭ دەپۋتاتتارى, سونداي-اق ساراپشىلار قاۋىمداستىعىنىڭ وكىلدەرى قاتىستى.