كىنالىلەر جاۋاپكەرشىلىكتەن جالتارماۋى كەرەك

«دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەن­ساۋلىق ساقتاۋ» ۇلتتىق جوبا­سى­نىڭ ىسكە اسۋ بارىسى قارالعان ۇكىمەت جيىنىنان كەيىنگى وسى وتىرىستا وبلىس باسشىسى ايماق­تا­عى احۋالدى سارالاپ, ماسەلەگە ەرەكشە ءمان بەرۋدى تاپسىردى.

كەيىنگى جىلدارداعى انا مەن با­لا ءولىمى كورسەتكىشتەرى ەڭ الدىمەن, دارىگەرلەردى الاڭداتۋى ءتيىس. ءوڭىر اكىمى وبلىستىق دەن­ساۋ­لىق ساقتاۋ باسقارماسىنىڭ باسشىسى ءسابيت پا­زىلوۆقا ەمدەۋ نىساندارىنا تالداۋ جاساپ, جاعدايدى جاقسارتۋ ءۇشىن ناقتى ۇسىنىس ەنگىزۋدى تاپسىردى.

جۋىردا عانا بولعان انا ولى­مى­نە قاتىستى وقيعا جان-جاق­تى زەردەلەنىپ, كىنالىلەر قاتاڭ جاۋاپ­كەر­شىلىككە تارتىلۋعا ءتيىس. الدا مۇن­داي جاعداي قايتالانباۋى ءۇشىن قاجەتتى مۇمكىندىكتەردى پايدا­لا­نا وتىرىپ, ناقتى شارالار قابىل­دان­­­ۋى كەرەك.

– ءاربىر تىركەلگەن ءولىم ءبىر وتبا­­سىنىڭ تراگەدياسى ەكەنىن ۇمىت­­پايىق. وسىدان ەكى جىل بۇرىن – 12, بىلتىر – 10, جىل با­سى­نان بەرى 5 انا ءولىمى تىركەلىپ وتىر. بۇل ماسەلەنى وسى كەزگە دەيىن ارنايى قاراپ, ءتيىستى سالا باس­شىسىنا, دارىگەرلەرگە ناقتى تاپسىرمالار بەرىلگەن ەدى, الايدا ورىندالۋى كوڭىل كونشىتپەي تۇر. نارەستەلەردىڭ شەتىنەۋى دە – كۇردەلى ماسەلە. باۋىر ەتى بالاسىنان ايىرىلۋ كىمگە دە وڭاي ەمەس, بۇل – تۇتاس وتباسىنىڭ تاعدىرى. ءار ادام دارىگەرگە ۇمىتپەن كەلەدى, دەرتىنە شيپا تابامىن دەپ سەنەدى. ال دارىگەرلەردە جاۋاپكەرشىلىك جاعى كەمشىن ءتۇسىپ جاتىر. مۇنى ەلەۋسىز قالدىرۋعا بولمايدى. سون­­دىق­­تان انا ولىمىنە جول بەرگەن ما­مان­داردىڭ ماسەلەسىن قا­راپ, تال­داۋ جۇرگىزىڭىزدەر, – دەدى وبلىس اكىمى.

جيىندا وبلىستىق پەرينا­تال­دىق ورتالىعىنىڭ باس دارىگەرى ولەگ كيم مەن وبلىستىق جۇقپالى اۋرۋ­لار اۋرۋحاناسىنىڭ باس دارى­گە­رى اينا مۇحامبەتوۆاعا ناقتى تاپسىرمالار بەرىلدى.

انا مەن بالا ولىمىنە قاتىستى بارلىق دەرەكتى ارناۋلى كوميسسيا سارالاپ, مامانداردىڭ كاسىبي دەڭگەيىنە تالداۋ جۇرگىزىلەدى. بۇل م­اسەلە الداعى وبلىستىق ءماس­لي­حات سەسسياسىنىڭ كۇن تارتى­بى­نە قويىلادى. وبلىس اكىمى انا ولى­مى­نە جول بەرگەندەرگە قاتىستى تەك­سەرۋ قورىتىندىسى اكىمدىكتىڭ ال­داعى كەڭەيتىلگەن جيىنىندا قارا­لاتىنىن دا ەسكەرتتى.

جيىندا ايماق باسشىسى ۇلت­تىق جوبادا كوزدەلگەن كورسەت­كىش­تەر مەن نىسانالى ين­دي­كا­تور­لار­عا قول جەتكىزۋ مەن دارى­گەر­لەر تاپ­شىلىعىن ازايتۋ ماق­ساتىندا مەديتسينالىق ۇيىم­دارعا تالداۋ جاساۋدى, جۇكتى ايەل­دەر­دى بوسانۋعا دەيىنگى جەكە جانە سالا­ارالىق باقىلاۋمەن قامتۋدى ساپالى جۇرگىزۋدى تاپسىردى.

وسىدان كەيىن وبلىستىق دەن­ساۋ­لىق ساقتاۋ باسقارماسىنىڭ ءباسپاسوز قىزمەتى وبلىس اكىمىنىڭ ورىنباسارىنىڭ توراعالىعىمەن ارنا­يى شتاب وتىرىسى وتكى­زىل­­گ­ەنىن حابارلادى. وعان وبلىس­تىق دەنساۋلىق ساقتاۋ باسقار­ما­سىنىڭ, دەنساۋلىق ساقتاۋ مي­نيسترلىگى مەديتسينالىق جانە فار­ما­تسەۆتيكالىق باقىلاۋ كو­مي­­­­تەتىنىڭ قىزىلوردا وبلىسى بو­­يىن­شا دەپارتامەنتىنىڭ جانە «رەس­پۋبليكالىق ەلەكتروندىق دەن­­ساۋلىق ساقتاۋ ورتالىعى» قى­­زىلوردا وبلىستىق فيليا­لى­نىڭ باس­شىلارى جانە مەديتسينا ۇيىم­دارىنىڭ باس دارىگەرلەرى قاتىس­قان.

ءباسپاسوز قىزمەتىنىڭ حا­بار­لاۋىن­شا, انا ولىمىنە جول بەر­گەندەرگە تارتىپتىك شارا قاراس­تىرىلىپ, وقيعاعا بايلانىس­تى كوميسسيا ىسكە كىرىستى. قازىر وبلىستىق پەري­نا­تال­دىق ورتا­لىق­تا جاعدايعا بايلانىستى سوت-مەديتسينالىق ساراپتاما جۇر­گىزىلىپ جاتىر. ساراپ­تاما قورى­تىن­دىسىنان كەيىن ءتيىستى شارالار قابىلدانادى.

قىزىلوردا