جوعارى سىنىپتاردا تەك لايىقتىلار وقىسا

سونىڭ 75 پايىزدايى, ياعني 102 مىڭنان استامى ۇبت تاپسىرۋعا ءوتىنىش بەرىپتى. ايتسە دە بۇل بالالاردىڭ 14 پايىزى, ياعني 14 633 وقۋشى شەكتىك دەڭگەيگە جەتە الماعان. جالپى, مەكتەپ ءبىتىرۋشى بالالاردىڭ 25 پايىزى, ياعني 45 مىڭدايى ءبىلىمىنىڭ تومەندىگىنە بايلانىستى ۇبت-عا جىبەرىلمەسە, ال ولارعا شەكتىك دەڭگەيگە جەتە الماعانداردى قوسساق, بارلىعى 39 پايىز, ياعني 60 مىڭعا جۋىق بالا مەكتەپ باعدارلاماسىن تولىك مەڭگەرمەگەن بولىپ شىعادى. بۇل ەندى ناعىز ماسقارا جاعداي ەمەس پە؟ سوندا وسىنشاما ءجاسوسپىرىم ءومىرىن مەكتەپتە بوسقا وتكىزىپ كەلگەن بە؟

شىنتۋايتىنا كەلگەندە, قيۋى قاشقان بۇل ماسەلەنى تەك وقۋ مينيسترلىگى عانا شەشە الادى. نارىقتىق قاتىناستاردى نەگىزگە الا وتىرىپ, ءبىلىم بەرۋ جۇيەسىن قايتا قۇرماي بولمايدى. بىزدىڭشە, بالالاردىڭ وقۋعا دەگەن ىنتاسىن كوتەرۋدىڭ ءبىر جولى – سالالىق مينيسترلىك تاراپىنان «9-سىنىپتان سوڭ 10-11-سىنىپتارعا تەك «4» پەن «5»-كە وقىعاندار عانا وتەدى» دەگەن بۇيرىقتىڭ شىعارىلۋى. سوندا اتا-انا دا, بالا دا سوعان قاراي ءىس قىلادى. اتا-انا بالاسىنىڭ وقۋىن باستاۋىش سىنىپتان باستاپ قاداعالايدى. بالا دا ەگەر ساباقتى جاقسى وقىماسا, 9-سىنىپتان ءارى قاراي وقۋعا جول جوق ەكەنىن ىشتەي بولسا دا سەزەدى. ءتىپتى ۇلگەرىمى مەن ءتارتىبى ناشار بالالاردى ءوز سىنىپتارىندا قالدىرساق تا ەش نارسەدەن ۇتىلماس ەدىك. قايتا «مەن قاتارىمنان نەگە قالدىم» دەگەن بالا ىشتەي نامىستانىپ, تەز ەسەيەر ەدى.

قىسقاسى, ءبىز 10-11 سىنىپتارعا ساباقتى تەك جاقسى وقيتىنداردى عانا جىبەرسەك, وندا ولاردى ءتارتىپسىز, ساباق وقىمايتىنداردان اجىراتىپ, تولىققاندى ءبىلىم الۋعا ناقتى العىشارت جاسار ەدىك. بۇگىندە مۇعالىمنىڭ جارتى ءومىرى بىرقاتار دىمبىلمەستەرمەن الىسىپ, بوسقا ءوتىپ جاتقانىن دا ويلاۋ كەرەك. بولاشاقتا ەل تۇتقاسىن ۇستايتىن ءبىلىمدى دە بىلىكتى ازاماتتار, مىنە, وسى 10-11-ءدى جاقسى بىتىرگەندەردەن شىعار ەدى. جوعارى وقۋ ورىندارىنا دا تەك ءبىلىمدى جاستار بارعان بولار ەدى.

بەردالى رىسبەكوۆ,

زەينەتكەر ۇستاز

تۇركىستان وبلىسى,

كەلەس اۋدانى