شىعىس قازاقستان وبلىسى سامار اۋدانى ق ۇلىنجون اۋىلىنىڭ شاعىن جيناقتى مەكتەبىندە «Ybyrai mektebi» اتتى جىكسىز وقىتۋدىڭ پيلوتتىق مودەلى ىسكە قوسىلدى, دەپ حابارلايدى Egemen.kz.
ايتا كەتسەك, اتالعان جوبا اياسىندا قازاقستاندىق ءبىلىم بەرۋ باعدارلاماسىنا فين جانە سينگاپۋرلىق ۇزدىك تاجىريبەلەر ەنگىزىلگەن.
«Ybyrai mektebi» جوباسى ق ۇلىنجون مەكتەبىنىڭ تۇلەگى ايدىن راحىمباەۆتىڭ باستاماسىمەن «Aidyn & Anar Rakhimbayev Foundation» قورىنىڭ قاراجاتىمەن جۇزەگە اسىرىلىپ جاتقانىن اتاپ ءوتۋ كەرەك. اتالعان جوباعا سالىنعان ينۆەستيتسيا كولەمى شامامەن 2 ميلليون دوللاردى قۇرادى.
اۋىل مەكتەبىندە قايتا قۇرۋ, كۇردەلى جوندەۋ جۇمىستارى جانە جاڭا كوممۋنالدىق ورتالىق قۇرىلىسىنىڭ جۇمىستارى جۇرگىزىلدى. عيمارات زاماناۋي جابدىقتارمەن جابدىقتالعان. بۇگىنگى كۇنى بۇل 1 جاستان 5 جاسقا دەيىنگى بالالارعا ارنالعان بوبەكجاي, باستاۋىش مەكتەپ, ورتا جانە جوعارى مەكتەپ, سونداي-اق اۋىلدىڭ بارلىق تۇرعىندارى ءۇشىن كوميۋنيتي ورتالىعى بار ۇلكەن كەشەنگە اينالىپ وتىر. اتالعان مودەل ۇزدىكسىز وقۋ پروتسەسىن, بالالاردىڭ بالا باقشادان باستاۋىش مەكتەپكە دەيىن سترەسسىز ءوتۋىن جانە ودان ءارى وقىتۋدىڭ بىرىڭعاي ءتاسىلىن قامتيدى. ماڭىزدىسى ءوزارا بايلانىستىڭ بولۋى, ياعني قوعامداستىق ورتالىعىنىڭ جۇمىسى مىندەتتى تۇردە ءۇش جاقتى - بالانىڭ, مۇعالىمنىڭ جانە اتا-انانىڭ قاتىسۋىنا باعىتتالعان.
«Ybyrai mektebi تۇجىرىمداماسىندا 0-6 سىنىپتاردى باستاۋىش مەكتەپ رەتىندە قاراستىرامىز جانە ۇزدىكسىز جۇيەنى ۇسىنامىز. ەڭ ماڭىزدىسى, بالا كەز كەلگەن داعدىنى يگەرۋ كەرەك. ول ءۇشىن ءبىز لوگيكانى (دۇرىس ويلاۋ قابىلەتى), ريتوريكانى (دۇرىس سويلەۋ قابىلەتى), گرامماتيكانى (دۇرىس جازا ءبىلۋ) جانە ونەرتاپقىشتىق ماسەلەلەردى شەشۋ تەورياسىن جەتىلدىرۋگە نازار اۋدارامىز. جوعارى سىنىپتى اياقتاعان ءاربىر وقۋشىمىز بولاشاقتا ءوزىنىڭ كىم بولاتىنىن ناقتى ءتۇسىنۋى قاجەت. گاللاپ سىناعى ارقىلى ولار 9-10 سىنىپتاردا ءوز قابىلەتتەرى بويىنشا تولىق تالداۋ الادى. ءبىز سونداي-اق اتا-انالار مەن بارلىق اۋىل تۇرعىندارى ءۇشىن قولايلى جاعداي جاسايمىز, باسقاشا ايتقاندا, ولاردى وقۋ پروتسەسىنە تارتامىز. بۇل - زاماناۋي كىتاپحاناسى, كينوتەاترى, حورەوگرافيالىق زالى, قولدانبالى ونەر, مۋزىكا كابينەتتەرى, بالالار جانە ەرەسەكتەر ويىن الاڭدارى, پلانەتاريى بار قاۋىمداستىق ورتالىعى. ەگەر ءبىز اۋىلدى الەمگە شىعارا الماساق, الەمدى اۋىلعا اكەلە الامىز», دەيدى ق ۇلىنجون مەكتەبىنىڭ ديرەكتورى ارالبەك بەرىك ۇلى.